ໂດຍປະຕິບັດຕາມມະຕິ 03/ກມສພ ວ່າດ້ວຍການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ. ໃນວັນທີ 5 ມີນາ ຜ່ານມານີ້ ຢູ່ທີ່ບ້ານ ອາລາງ, ເມືອງຊົນນະບູລີ, ແຂວງສະຫວັນນະເຂດ ໄດ້ຈັດພິທີແບ່ງໜ້າທີ່ຮັບຜິດຊອບຜູ້ຊີ້ນໍາໜ່ວຍພັກຮາກຖານກຸ່ມບ້ານ ລະຫວ່າງ ຜູ້ເກົ່າ ແລະ ຜູ້ໃໝ່. ໂດຍການເປັນປະທານຂອງສະຫາຍ ພັນໂທ ອິນປັນ ຫຼວຍຍະລາດ ຫົວໜ້າກອງບັນຊາການ ປກສ ເມືອງ, ສະຫາຍ ບົວຜັນ ສຸວັນນະແສງ ຮອງເຈົ້າເມືອງຊົນນະບູລີ, ສະຫາຍ ສອນເພັດ ແກ້ວວົງສັກ ຜູ້ຊີ້ນໍາກຸ່ມບ້ານທີ 7 ມີຄະນະຈຸດສຸມ, ເລຂາໜ່ວຍພັກຄະນະພັກອໍານາດການປົກຄອງ ແລະ ພໍ່ແມ່ປະຊາຊົນໃນ 8 ບ້ານເຂົ້າຮ່ວມ.
ໃນພິທີສະຫາຍ ສອນເພັດ ແກ້ວວົງສັກ ຜູ້ຊີ້ນໍາກຸ່ມບ້ານ ທີ 7 ໄດ້ຜ່ານບົດສະຫຼຸບວຽກງານຮອບດ້ານໃນໄລຍະຜ່ານ ແລະ ທິດທາງແຜນການປີ 2018-2019 ຈາກນັ້ນ ສະຫາຍ ນາງ ຄໍາສອນ ສີຫາເທບ ຄະນະຈັດຕັ້ງເມືອງ ກໍ່ໄດ້ຜ່ານມະຕິຕົກລົງຂອງຄະນະປະຈໍາພັກເມືອງ ວ່າດ້ວຍການແບ່ງຄວາມຮັບຜິດຊອບ ໃຫ້ສະຫາຍຄະນະພັກເມືອງ ລົງຊີ້ນໍາໜ່ວຍພັກຮາກຖານບ້ານ ພາຍໃນເມືອງຊົນນະບູລີ ໂດຍອີງຕາມການຄົ້ນຄ້ວາຕົກລົງເປັນເອກະພາບຂອງຄະນະປະຈໍາພັກເມືອງ ເຫັນດີແບ່ງຄວາມຮັບຜິດຊອບໃຫ້ ສະຫາຍ ບົວຜັນ ສຸວັນນະແສງ ຮອງເຈົ້າເມືອງຊົນນະບູລີ ລົງຮັບຜິດຊອບຊີ້ນໍາໆພາ 3 ໜ່ວຍພັກ ຄື: ໜ່ວຍພັກບ້ານອາລາງ, ໜ່ວຍພັກບ້ານປົ່ງ, ໜ່ວຍພັກບ້ານດົງອາລາງ ແທນ ສະຫາຍ ສອນເພັດ ແກ້ວວົງສັກ ແລະ ໃຫ້ ສະຫາຍ ສອນເພັດ ແກ້ວວົງສັກ ຮັບຜິດຊອບຊີ້ນໍາ-ນຳພາ 3 ໜ່ວຍພັກ ຄື: ໜ່ວຍພັກບ້ານນາສະໂນ, ໜ່ວຍພັກບ້ານນາມີໄຊ, ໜ່ວຍພັກບ້ານນາລະແອນ. ການແບ່ງຄວາມຮັບຜິດຊອບໃນຄັ້ງນີ້ ກໍ່ເພື່ອເປັນການພັດທະນາວຽກງານຢູ່ຂັ້ນຮາກຖານ ໃຫ້ມີຄວາມເຂັ້ມແຂງໃນແຕ່ລະຂົງເຂດວຽກງານໃຫ້ດີຂຶ້ນເປັນກ້າວໆ.
ພ້ອມນັ້ນ ກໍ່ໄດ້ມີການເຊັນສັນຍາຮ່ວມກັນໃນການແບ່ງໜ້າທີ່ຄວາມຮັບຜິດຊອບ ລະຫວ່າງ ຜູ້ເກົ່າ ແລະ ຜູ້ໃໝ່ ໂດຍການເປັນສັກຂີພິຍານຂອງປະທານ ແລະ ອໍານາດການປົກຄອງພ້ອມດ້ວຍພໍ່ແມ່ປະຊາຊົນ.

Editor: ເມືອງຊົນນະບູລີ