ໃນວັນທີ 8 ມີຖຸນາ 2016 ທີ່ຜ່ານມາ ຢູ່ທີ່ກະຊວງອຸດສະຫາກຳ ແລະການຄ້າ ໄດ້ຈັດກອງປະຊຸມສະຫລຸບຖອດຖອນບົດຮຽນ ກ່ຽວກັບການຈັດຕັ້ງປະຕິບັດວຽກງານວາງສະແດງສິນຄ້າທັງພາຍໃນ ແລະຕ່າງປະເທດ ພາຍໃຕ້ການເປັນປະທານຂອງ ທ່ານນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສະຫາກຳ ແລະການຄ້າ ພ້ອມດ້ວຍຮອງລັດຖະມົນຕີ ບັນດາຫົວຫນ້າກົມ ຮອງກົມ ຂະແຫນງການ ແລະຕົວແທນຈາກພາກສ່ວນຫົວຫນ່ວຍທຸລະກິດ ໃນທຸກຂະແຫນງການເຂົ້າຮ່ວມກອງປະຊຸມສະຫລຸບຖອດຖອນບົດຮຽນ  

ຄັ້ງນີ້ ຈຸດປະສົງຫລັກ ເພື່ອຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ 10 ຂອງພັກໃຫ້ປະກົດຜົນເປັນຈິງ ແລະ ຍັງເປັນການສະຫລຸບຖອດຖອນບົດຮຽນກ່ຽວກັບການຈັດຕັ້ງປະຕິບັດ ວຽກງານວາງສະແດງສິນຄ້າ ທັງພາຍໃນ ແລະຕ່າງປະເທດ ຕະຫລອດໄລຍະຜ່ານມາ ເພຶ່ອເຮັດໃຫ້ເສດຖະກິດ-ສັງຄົມ ເຕີບໃຫຍ່ຂະຫຍາຍຕົວສູງຂື້ນ ກະຊວງອຸດສະຫະກຳ ແລະການຄ້າແມ່ນຢູ່ໃນໄລຍະຂອງການຂຸ້ນຂ້ຽວ ກະກຽມໃສ່ກອງປະຊຸມສຸດຍອດອາຊຽນ ແລະກຽມຄວາມພ້ອມຮັບມືກັບປະຊາຄົມເສດຖະກິດອາຊຽນ ແລະ ການຄ້າເສລີ ເຊິ່ງກະຊວງອຸດສະຫະກຳ ແລະການຄ້າ ໄດ້ກຳນົດນະໂຍບາຍຕ່າງໆ ເພື່ອເຮັດໃຫ້ການສົ່ງເສີມພາກທຸລະກິດ  ໂດຍຊຸກຍູ້ການຜະລິດສິນຄ້າໃຫ້ມີຄຸນນະພາບ ເພື່ອສະຫນອງກັບຄວາມຮຽກຮ້ອງຕ້ອງການຂອງຜູ້ຊົມໃຊ້ພາຍໃນ ແລະເປັນສິນຄ້າສົ່ງອອກໄປຍັງຕ່າງປະເທດ ພ້ອມດຽວກັນນັ້ນກໍ່ໄດ້ເອົາໃຈໃສ່ຊຸກຍູ້ສົ່ງເສີມການຄ້າ ທີ່ມີທ່າແຮງໄປສູ່ຕະຫລາດເປົ້າຫມາຍ ໃນຫລາຍຮູບການ ແລະສາມາດແຂ່ງຂັນກັບສິນຄ້າຂອງຕ່າງປະເທດ ໃນຍຸກແຫ່ງການເຊື່ອມໂຍງ ເກືອບ 2 ທົດສະຫວັດຜ່ານມາ  

ການສົ່ງເສີມພາກສ່ວນຫົວຫນ່ວຍທຸລະກິດຜູ້ທີ່ມີເງື່ອນໄຂເຂົ້າຮ່ວມງານວາງສະແດງທາງພາຍໃນ ແລະ ຕ່າງປະເທດ ລວມທັງຢູ່ໃນລະດັບພາກພື້ນ ແລະສາກົນ ເຫັນວ່າແຕ່ລະປີ ລັດຖະບານ ສປປ. ລາວ ແມ່ນໄດ້ຊຸກຍູ້ສົ່ງເສີມພາກສ່ວນຫົວຫນ່ວຍທຸລະກິດທີ່ມີທ່າແຮງ ແລະ ເງື່ອນໄຂຢ່າງພຽງພໍຢ່າງເຕັມທີ່ ເພື່ອໃຫ້ໄດ້ມີໂອກາດເຂົ້າຮ່ວມ ເປັນໂອກາດໃນການຊອກຫາຕະຫລາດ ແລະໄດ້ນຳສະເຫນີ ສິນຄ້າຂອງຕົນ ການຈັບຄູ່ຮ່ວມທຸລະກິດ ເຈລະຈາຊື້-ຂາຍສິນຄ້າຮ່ວມກັນ

ກອງປະຊຸມຖອດຖອນບົດຮຽນ ຄັ້ງນີ້ ນອກຈາກຈະເປັນເວທີໃນການປຶກສາຫາລື ຂໍ້ສະຫນີຕ່າງໆ ຂອງບັນດາຫົວຫນ່ວຍທຸລະກິດ ແລ້ວຍັງໄດ້ມີການມອບໂລ່ລາງວັນແກ່ພາກສ່ວນທີ່ມີຜົນງານ ທີ່ເຂົ້າຮ່ວມງານວາງສະແດງສິນຄ້າ ອາຊຽນ+ຈີນ ຫລື ຄາເອັກໂປຣ ຄັງທີ 12 ເມື່ອປີ 2015  ທີ່ຜ່ານມາ ທີ່ນະຄອນຫນານຫນິງ ແຂວງກວາງຊີ ສປ. ຈີນ