ຂະບວນແຫ່ ສະເຫລີມສະຫລອງແຄນລາວ ເຂົ້າເປັນມໍລະດົກໂລກ, ມໍລະດົກວັດທະນະທໍາ ນາມມະທໍາ ຂອງມວນມະນຸດ, ຈາກອົງການຢູເນັສໂກ UNESCO ໄດ້ຈັດຂື້ນຢ່າງຍິ່ງໃຫຍ່ ສວຍງາມ ສົມກັບການໄດ້ເປັນມໍລະດົກໂລກ ແລະ ເປັນຄວາມພາກພູມໃຈ ຂອງຄົນລາວ, ຊາດລາວ ແລະ ຄວາມເອກະອ້າງທະນົງໃຈ, ພູມໃຈ ສຸດຍິ່ງໃຫຍ່. ເຊີ່ງພິທີດັ່ງກ່າວ ໄດ້ຈັດຂື້ນໃນເຊົ້າວັນທີ 11 ເມສາ 2018 ນີ້, ທີ່ນະຄອນຫລວງວຽງຈັນ. ໂດຍໄດ້ຮັບກຽດເຂົ້າຮ່ວມໃນຂະບວນແຫ່ ສະເຫລີມສະຫລອງສຽງແຄນລາວ ເປັນມໍລະດົກໂລກ ຂອງ ທ່ານ ສອນໄຊ ສີພັນດອນ ຮອງນາຍົກລັດທະມົນຕີ ແຫ່ງ ສປປ ລາວ, ມີ ທ່ານ ສາດສະດາຈານ ດຣ. ບໍ່ແສງຄໍາ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ພ້ອມດ້ວຍຄະນະ ຮອງລັດຖະມົນຕີ, ຫົວຫນ້າກົມ-ຮອງກົມ, ພະແນກການ ອ້ອມຂ້າງ ກະຊວງ ຖວທ ເຂົ້າຮ່ວມ ຢ່າງພ້ອມພຽງ.
ພິທີເລີ່ມຕົ້ນ ຢູ່ທີ່ສວນອານຸສາວະລີ ເຈົ້າຟ້າງຸ່ມ ເພື່ອເຮັດພິທີລາຍງານ ແລະ ຄອບໄຫວ ຕໍ່ບັນພະບູລຸດລາວ ຜູ້ກ້າແກ່ນ ເຕົ້າໂຮມແຜນດິນລາວລ້ານຊ້າງເປັນຜຶນແຜ່ນດຽວ ທີ່ເຂັ້ມແຂງ ແລະ ຈະເລີນຮຸ່ງເຮືອງ ສີວິໄລ. ພ້ອມກັນນັ້ນ ຄະນະການນໍາ ແລະ ຄະນະທຸກຂັ້ນ ໄດ້ພ້ອມກັນວ່າງ ດອກໄມ້ ຕໍ່ຮູບເປັນຫລໍ່ ພະຍາເຈົ້າຟ້າງຸ່ມ ເພື່ອຄອບໄຫວ ແລະ ຍິນດີອັນສຸດຊື່ງ ທີ່ສຽງແຄນລາວ ຖືກຮັບຮອງເຂົ້າເປັນມໍລະດົກໂລກ ມໍລະດົກວັດທະນະທໍາ ນາມມະທໍາ ຂອງມວນມະນຸດ ຈາກອົງການຢູເນັສໂກ ແລະ ປະກາດຢ່າງເປັນທາງການ ໃນວັນທີ 7 ທັນວາ 2017 ທີ່ຜ່ານມາ. ເຮັດໃຫ້ໂລກຮັບຮູ້ ສຽງແຄນລາວ ແມ່ນມໍລະດົກທີ່ລໍ່າຄ່າ ຂອງຄົນລາວ, ຊາດລາວ ແລະ ເປັນມໍລະດົກໂລກ ອີກດ້ວຍ.
ຫລັງຈາກສໍາເລັດການຄອບໄຫວ ທີ່ອານຸສາວະລີ ພະຍາເຈົ້າຟ້າງຸ່ມ ເປັນທີ່ຮຽບຮ້ອຍແລ້ວ ຂະບວນ ໄດ້ແຫ່ອອ້ມ ຕົວເມືອງນະຄອນຫລວງວຽງຈັນ ຕາມຖະຫນົນສຸພານຸວົງ, ຖະຫນົນເສດຖາທີຣາດ, ຖະຫນົນລ້ານຊ້າງ, ຖະຫນົນ 23 ສິງຫາ, ຖະຫນົນໄກສອນ ພົມວິຫານ ໂດຍຜ່ານຈຸດທີ່ສໍາຄັນ ໃນຫລາຍຈຸດ, ຜ່ານຫໍຄໍາ, ປະຕູໄຊ, ພ້ອມກັນນັນ ຍັງໄດ້ເຮັດພິທີລາຍງານ ແລະ ຄອບໄຫວຕໍ່ນັກຮົບ ແລະ ປະຊາຊົນລາວບັນດາເຜົ່າ ທີ່ໄດ້ເສຍສະຫລະເລຶອດເນື້ອ ແລະ ຊີວິດ ເພື່ອປະເທດຊາດ ( ຢູ່ທີ່ອານຸສາວະລີດາວແດງ ) ເດີນສະຫນາມຫລວງ.
ຈາກນັ້ນ ຂະບວນ ໄດ້ເຄື່ອນມາຕາມຖະຫນົນໄກສອນ ພົມວິຫານ ໄປສູ່ພິພິທະພັນ ໄກສອນ ພົມວິຫານ ເພື່ອລາຍງານ ແລະ ຄອບໄຫວ ກ່ຽວກັບການຮັບຮອງສຽງແຄນລາວ ເປັນມໍລະດົກໂລກ ມໍລະດົກວັດທະນະທໍານາມມະທໍາ ຂອງມວນມະນຸດ ພ້ອມວາງດອກໄມ້ ແລະ ການເປົ່າແຄນ ລວມຫມູ່ຍິງ-ຊາຍ
Editor: ກຳປານາດ ລັດຖະເຮົ້າ
