ສໍານັກງານຜູ້ຕາງຫນ້າສະຫະພາບເອີຣົບ ປະຈໍາ ສປປ ລາວ ຮ່ວມກັບ ສະພາການຄ້າ ແລະ ອຸດສາຫະກໍາເອີຣົບ ແລະ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ພ້ອມກັນຈັດງານເທດສະການອາຫານເອີຣົບ ຄັ້ງທີ 7 ປະຈໍາປີ 2018 ຂື້ນ ໃນຈວັນທີ 24 ມີນາ 2018 ທີ່ເດີ່ນຫໍວັດທະນະທໍາ ແຫ່ງຊາດ, ນະຄອນຫລວງວຽງຈັນ. ເຊີ່ງງານເທດສະການອາຫານດັ່ງກ່າວ ມີນັກທ່ອງທ່ຽວຊາວຕ່າງຊາດ ແລະ ມວນຊົນ ເຂົ້າຮ່ວມເປັນຈໍານວນຫລວງຫລາຍ.
ກ່ອນຫນ້ານີ້ ທ່ານ ລີໂອ ຟາເບີ ເອກອັກຄະລັດຖະທູດ ສະຫະພາບເອີຣົບ ປະຈໍາ ສປປ ລາວ ໄດ້ກ່າວວ່າ: ງານເທດສະການອາຫານເອີຣົບ ໃນປີນີ້ ແມ່ນເປັນຄັ້ງທີ 7 ໂດຍມີຈຸດປະສົງໃນການນໍາສະເໜີຄວາມຫລາກຫລາຍ ແລະ ຄວາມອຸດົມສົມບູນຂອງອາຫານເອີຣົບ ແລະ ຍັງເປັນໂອກາດທີ່ດີ ເພື່ອໃຫ້ຄົນເອີຣົບ ແລະ ຄົນລາວ ໄດ້ມີການແລກປ່ຽນວັດທະນະທໍາ, ຄວາມມ່ວນຊື່ນ ທີ່ຫລາກຫລາຍ ແລະ ຄົ້ນພົບລົດຊາດໃຫມ່ໆ.
ງານເທດສະການອາຫານເອີຣົບ ໄດ້ເປີດໂອກາດໃຫ້ທຸກຄົນໄດ້ເຂົ້າຮ່ວມ ແລະ ສໍາຜັດກັບລົດຊາດອາຫານ-ເຄື່ອງດື່ມ ເຊີ່ງເຂົ້າຮ່ວມ ມີຫລາຍເຖິງ 35 ຮ້ານ ລວມມີ ຮ້ານອາຫານແບນຊິກ, ຮ້ານອາຫານຝຣັ່ງ. ຮ້ານອາຫານເຢຍລະມັນ, ອີຕາລີ, ແອັດສະປາຍ ແລະ ຣັດເຊຍ. ໂອກາດສໍາຄັນກວ່ານັ້ນ ປີ 2018 ຍັງເປັນປີທ່ອງທ່ຽວລາວ ງານເທດສະການອາຫານເອີຣົບ ຍັງເປັນການດຶງດູດນັກທ່ອງທ່ຽວ ໃຫ້ມາຢ້ຽມຢາມ ສປປ ລາວໃຫ້ຫລາຍຂື້ນ
Editor: ກຳປານາດ ລັດຖະເຮົ້າ
