ໃນວັນທີ 7 ມີນາ 2018 ຜ່ານມານີ້ຢູ່ທີ່ຫ້ອງການແຜນການ-ການລົງທືນເມືອງ ທ່າແຕງ ແຂວງ ເຊກອງ ໄດ້ຈັດພິທີການກວດກາຄວາມຄົບຖ້ວນ ແລະ ຄວາມສອດຄ່ອງກັບມາດຖານເງື່ອນໄຂຕ່າງໆຂອງໂຄງການກໍ້ສ້າງ ແລະ ຕິດຕັ້ງອ່າງນ້ຳປະປາຊຸົມຊົນ ບ້ານ ວາງໃໝ່ ເມືອງທ່າແຕງ ແຂວງເຊກອງ ໂດຍການ ເປັນປະທານ ຂອງ ທ່ານ ສົມເພັດ ເລີດລັດດາ ຮອງເຈົ້າເມືອງ - ເມືອງທ່າແຕງ ຜູ້ຊີ້ນໍາຂົງເຂດເສດຖະກິດ, ມີທ່ານ ສີສັກດາ ແສງນາລີວົງ ກຳມະການພັກເມືອງ ຫົວໜ້າຫ້ອງການສາທາລະນະສຸກເມືອງທ່າແຕງ ພ້ອມດ້ວຍພາກສ່ວນທີ່ກ່ຽວຂ້ອງ ພ້ອມດ້ວຍບັນດາບໍລິສັດທີ່ເຂົ້າຮ່ວມປະມູນ ແລະ ຄະນະກຳມະການ - ການປະມູນຂັ້ນແຂວງ-ຂັ້ນເມືອງເຂົ້າຮ່ວມ.
ທ່ານ ສົມເພັດ ເລີດລັດດາ ຮອງເຈົ້າເມືອງໆທ່າແຕງ ຜູ້ຊີ້ນຳຂົງເຂດເສດຖະກິດ ກ່າວຕໍ່ພິທີເປີດການກວດກາຄວາມຄົບຖ້ວນ ແລະ ຄວາມສອດຄ່ອງກັບມາດຖານເງື່ອນໄຂຕ່າງໆຂອງໂຄງການກໍ້ສ້າງ ແລະ ຕິດຕັ້ງອ່າງນ້ຳປະປາຊຸົມຊົນ ບ້ານ ວາງໃໝ່ ເມືອງທ່າແຕງ ວ່າ: ພວກເຮົາຈຳເປັນຕ້ອງມີການປະມູນເພື່ອເຮັດໃຫ້ຖືກຕ້ອງຕາມມາດຖານເງື່ອນໄຂ ແລະ ສອດຄ່ອງກັບລະບຽບການຕ່າງໆ ເປັນຕົ້ນມາດຖານສຳລັບການປະມູນຂອງໂຄງການ ເຊິ່ງໂຄງການກໍ້ສ້າງ ແລະ ຕິດຕັ້ງອ່າງນ້ຳປະປາຊຸົມຊົນ ມີມູນຄ່າຫຼາຍກວ່າ 2 ຕື້ 200 ລ້ານກວ່າກີບ,ໂດຍແມ່ນ ຫ້ອງການສາທາລະນະສຸກ ເມືອງທ່າແຕງ ເປັນເຈົ້າຂອງໂຄງການ.
ພ້ອມດຽວກັນນີ້ໃນວັນທີ 8 ມີນາ 2018 ຜ່ານມານີ້ ຢູ່ທີ່ຫ້ອງການແຜນການ-ການລົງທືນ ເມືອງທ່າແຕງ ກໍ່ໄດ້ຈັດພິທີກວດກາຄວາມຄົບຖ້ວນ ແລະ ຄວາມສອດຄ່ອງກັບມາດຖານເງື່ອນໄຂຕ່າງໆຂອງໂຄງການກໍ່ສ້າງຊົນລະປະທານ ຫ້ວຍຕາຢືນ ຄຸ້ມປາຍ ບ້ານ ຈຸນລາ ແລະ ໂຄງການ ຊົນລະປະທານ ຫ້ວຍນ້ຳໃສ 1 ບ້ານ ຕຸ້ມຍໍ ໂດຍການເປັນປະທານຂອງ ທ່ານ ແສງສຸບັນ ໄຊສະຫວັນ ກຳມະການພັກເມືອງ, ຫົວໜ້າຫ້ອງການແຜນການ-ການລົງທຶນເ ມືອງທ່າແຕງ, ມີ ທ່ານ ທະວີສັກ ບຸດພຮົມ ຄະນະຫ້ອງຫານກະສິກຳ-ປ່າໄມ້ ເມືອງທ່າແຕງ, ພ້ອມດ້ວຍຄະນະກໍາມະການ-ການປະມູນຂັ້ນເມືອງ ແລະ 6 ບໍລິສັດເຂົ້າຮ່ວມປະມູນ ເຊິ່ງໂຄງການ ດັ່ງກ່າວມີມູນຄ່າ 3 ຕື້ ກວ່າກີບ, ໂດຍແມ່ນຫ້ອງການກະສິກໍາ -ປ່າໄມ້ເມືອງເປັນເຈົ້າຂອງໂຄງການ.
ສ່ວນການປະມູນໂຄງການກໍ່ສ້າງອ່າງນ້ຳປະປາຊຸົມຊົນ ບ້ານ ວາງໃໝ່ ແລະ ໂຄງການກໍ່ສ້າງຊົນລະປະທານ 2 ແຫ່ງ: ຫ້ວຍຕາຢືນ ບ້ານ ຈຸລາ ແລະ ຫ້ວຍນ້ຳໃສ 1 ບ້ານ ຕຸ້ມຍໍວ່າ ບໍລິສັດໃດໄດ້ຮັບຊະນະ ແລະ ເປັນຜູ້ລົງມືກໍ່ສ້າງນັ້ນ ທາງຄະນະກຳມະການ-ການປະມູນ ຈະແຈ້ງໃຫ້ຊາບຕາມພາຍຫຼັງ.
Editor: ສິງຫາ ເລືອງວັນ
