ວັນທີ 22 ກຸມພາ 2017 ທ່ານ ປອ ສິນລະວົງ ຄຸດໄພທູນ ເຈົ້າຄອງ ນະຄອນຫລວງວຽງຈັນ ພ້ອມດ້ວຍ ທ່ານ ວົງເດືອນ ບຸນຍະແສງ ເຈົ້າເມືອງປາກງື່ມ, ທ່ານ ນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະ ສະຫວັດດີການ-ສັງຄົມ; ມີພະແນກສຶກສາ ແລະ ກິລາ ພ້ອມດ້ວຍຂະແໜງການກ່ຽວຂ້ອງ ລົງກວດກາພື້ນທີ່ ທີ່ຖືກຜົນກະທົບຈາກພາຍຸລະດູຮ້ອນ ໃນຕອນແລງຂອງວັນທີ 21 ທີ່ຜ່ານມາ. ເຫດດັ່ງກ່າວໄດ້ເຮັດໃຫ້ຫຼັງຄາຂອງໂຮງຮຽນປະຖົມດອນສ້າງໄຜ່ ຖືກລົມພັດຮື້ອອກເປັນບໍລິເວນກ້ວາງ, ກ້ຽງຄຽງກັນແມ່ນເຮັດໃຫ້ບ້ານເຮືອນປະຊາຊົນບ້ານດອນສ້າງໄຜ່ ແລະ ໜອງແຄນ ເສຍຫາຍກ່ວາ 74 ຫຼັງຄາເຮືອນ; ຖືກລົມພັດຫັກເພທັງຫຼັງ 3 ຫຼັງ. ການເສຍຫາຍເບື້ອງຕົ້ນແມ່ນຍັງຢູ່ໃນຂັ້ນຕອນການປະເມີນຄວາມເສຍຫາຍຢູ່. ເພື່ອສະແດງຄວາມເຫັນໃຈ ແລະ ເປັນການຊ່ວຍເຫຼືອ ບັນເທົ່າການແກ້ໄຂເຫດຈາກໄພທຳມະຊາດນີ້ ນະຄອນຫຼວງວຽງຈັນ ໄດ້ປະກອບທຶນຮອນໃນສ້ອມແປງໂຮງຮຽນ ຕ່າງໜ້າມອບໂດຍ ທ່ານ ສິນລະວົງ ຄຸດໄພທູນ ເຈົ້າຄອງ ນະຄອນຫລວງວຽງຈັນ, ຈໍານວນ 20 ລ້ານກີບ; ພະແນກ ແຮງງານ ແລະ ສະຫວັດດີການ-ສັງຄົມ ນະຄອນຫລວງວຽງຈັນ ມອບແຜນສັງກະສີ ຈຳນວນ 350 ແຜນ; ແລະ ພະແນກສຶກສາທິການ ແລະ ກິລາ ນະຄອນຫລວງວຽງຈັນ ມອບຊ່ວຍ ຈໍານວນ 150 ແຜນ.
ໂອກາດນີ້ ທ່ານ ເຈົ້າຄອງນະຄອນຫລວງວຽງຈັນ ກໍໄດ້ມີທິດຊີ້ນຳ ມອບໃຫ້ອົງການປົກຄອງເມືອງປາກງື່ມ ສົມທົບກັບພະແນກການ, ຫ້ອງການກ່ຽວຂ້ອງ ຮີບສືບຕໍ່ເລັ່ງສຳຫຼວດຜົນເສຍຫາຍທັງໝົດ ແລ້ວລາຍງານໃຫ້ການນຳ ນະຄອນຫລວງ ຊາບໂດຍໄວ. ສ່ວນການແກ້ໄຂເບື້ອງຕົ້ນນີ້ ທັງກຳລັງແຮງງານ, ທຶນຮອນ ແລະ ອັນຈຳເປັນອື່ນໆ ກໍແມ່ນໃຫ້ລະດົມກຳລັງແຮງທີ່ມີພາຍໃນເມືອງເພື່ອແກ້ໄຂກ່ອນສະເພາະໜ້າກ່ອນ.
Editor: ກຳປານາດ ລັດຖະເຮົ້າ
