ພິທີດັ່ງກ່າວ ໄດ້ຈັດຂຶ້ນຢ່າງເປັນທາງການໃນທ້າຍອາທິດທີ່ຜ່ານມາ ຢູ່ທີ່ ພະແນກກະສິກຳ ແລະ ປ່າໄມ້ ແຂວງວຽງຈັນ, ໂດຍການເປັນກຽດເຂົ້າຮ່ວມຂອງ ທ່ານນາງ ຈັນທະບູນ ໂພສະລາດ ກຳມະການພັກແຂວງ ປະທານສະຫະພັນແມ່ຍິງ ແຂວງວຽງຈັນ, ມີ ທ່ານ ພູວົງ ບຸນຊູ ກຳມະການພັກແຂວງ ຫົວຫນ້າພະແນກກະສິກຳ ແລະ ປ່າໄມ້ ແຂວງວຽງຈັນ, ມີບັນດາຫົວຫນ້າຫນ່ວຍສະຫະພັນແມ່ຍິງພະແນກການ, ອົງການອ້ອມຂ້າງ ແລະ ບັນດາສະມາຊິກແມ່ຍິງພາຍໃນພະແນກກະສິກໍາ ແລະ ປ່າໄມ້ ແຂວງວຽງຈັນ ເຂົ້າຮ່ວມ.

ທ່ານນາງ ໄກສອນ ສໍພາບມີໄຊ ຫົວຫນ້າຫນ່ວຍສະຫະພັນແມ່ຍິງ ພະແນກກະສິກຳ ແລະ ປ່າໄມ້ ແຂວງວຽງຈັນ ໄດ້ຂຶ້ນຜ່ານບົດສະຫລຸບ ການຈັດຕັ້ງປະຕິບັດຂໍ້ແຂ່ງຂັນ 3 ດີ ໃນໄລຍະຜ່ານມາ, ຄະນະຫນ່ວຍສະຫະພັນແມ່ຍິງພະແນກກະສິກໍາ ແລະ ປ່າໄມ້ ແມ່ນໄດ້ຖືເອົາວຽກງານສຶກສາອົບຮົມການເມືອງແນວຄິດເປັນວຽກງານສຳຄັນເພື່ອເຮັດໃຫ້ບັນດາສະມາຊິກ ເອື້ອຍນ້ອງແມ່ຍິງໄດ້ເຊື່ອມຊຶມກຳແຫນ້ນແນວທາງຂອງພັກ, ລະບຽບກົດຫມາຍຂອງລັດ ແລະ ມະຕິຄໍາສັ່ງຕ່າງໆໂດຍສະເພາະແມ່ນການຈັດຕັ້ງປະຕິບັດຂໍ້ແຂ່ງຂັນ 3 ດີຂອງສະຫະພັນແມ່ຍິງລາວວາງອອກ. ຜ່ານການຈັດຕັ້ງປະຕິບັດຂໍ້ແຂ່ງຂັນດັ່ງກ່າວສາມາດສະຫລຸບຕີລາຄາຄືນ ສາມາດສັງລວມໄດ້ເອື້ອຍນ້ອງແມ່ຍິງ ພົນລະເມືອງດີ ໄດ້ຈຳນວນ 72 ສະຫາຍ, ພັດທະນາດີ 67 ສະຫາຍ, ສ້າງຄອບຄົວດີໄດ້ 71 ສະຫາຍ ແລະ ໄດ້ຈັດແບ່ງປະເພດເອື້ອຍນ້ອງແມ່ຍິງກໍຄືບຸກຄົນ 3 ດີ ປະເພດ 1 ໄດ້ ຈຳນວນ 66 ສະຫາຍ ແລະ ບຸກຄົນ 3 ດີ ປະເພດ 2 ມີ 6 ສະຫາຍ.

ໂອກາດດັ່ງກ່າວນີ້ຍັງໄດ້ມອບໃບຍ້ອງຍໍ ແລະ ໃບຢັ້ງຢືນໃຫ້ບັນດາສະມາຊິກເອື້ອຍນ້ອງແມ່ຍິງພະແນກກະສິກຳ ແລະ ປ່າໄມ້ ແຂວງວຽງຈັນ ເປັນກຽດຂຶ້ນມອບຂອງ ທ່ານນາງ ຈັນທະບູນ ໂພສະລາດ ປະທານສະຫະພັນ ແມ່ຍິງແຂວງວຽງຈັນ ແລະ ເປັນກຽດຂຶ້ນຮັບຂອງ ທ່ານນາງ ໄກສອນ ສໍພາບມີໄຊ ຫົວຫນ້າຫນ່ວຍສະຫະພັນແມ່ຍິງ ພະແນກກະສິກຳ ແລະ ປ່າໄມ້ ແຂວງວຽງຈັນ

ທີມຂ່າວ ແຂວງວຽງຈັນ

Editor: ກຳປານາດ ລັດຖະເຮົ້າ