ໃນວັນທີ 18 ມັງກອນ 2018 ນີ້ ພະແນກອຸດສາຫະກຳ ແລະ ການຄ້າແຂວງ ໄດ້ຮ່ວມກັບ ພະແນກການກ່ຽວຂ້ອງຈັດພິທີທຳລາຍສິນຄ້າທີ່ລະເມີດຕໍ່ລະບຽບການຄຸ້ມຄອງການນຳເຂົ້າ ຢູ່ທີ່ສະຖານທີ່ຖິ້ມຂີ້ເຫຍື້ອແຂວງຄຳມ່ວນ ເຊິ່ງປະກອບມີ: ເຄື່ອງໃນໝູປະເພດຕັບ ຈຳນວນ 107 ກິໂລ, ໂຄງໄກ່, ໄກ່ພັນປອກ, ສີ້ນສ່ວນໄກ່ ລວມທັງໝົດ 568 ກິໂລ, ເຫງືອກງົວ 30 ກິໂລ, ລີ້ນໝູ 20 ກິໂລ, ຕີນໄກ່ 60 ກິໂລ ດ້ວຍການຂຸດຂຸມຝັງ.
ສິນຄ້າດັ່ງກ່າວແມ່ນໄດ້ລະເມີດລະບຽບການຄຸ້ມຄອງນຳເຂົ້າ ໂດຍບໍ່ໄດ້ຜ່ານການກວດສອບ ຫລື ຢັ້ງຢືນມາດຕະຖານດ້ານສຸຂະອະນາໄມຈາກຂະແໜງການທີ່ກ່ຽວຂ້ອງ ອາດຈະສົ່ງຜົນສະທ້ອນໃນໄລຍະສັ້ນ-ໄລຍະຍາວຕໍ່ສຸຂະພາບ ແລະ ຕໍ່ຊີວິດ, ສົ່ງຜົນເສຍຫາຍຕໍ່ຊັບສິນ ສິດຜົນປະໂຫຍດຂອງຜູ້ຊົມໃຊ້. ສິນຄ້າທີ່ນຳມາທຳລາຍໃນເທື່ອນີ້ແມ່ນທາງເຈົ້າໜ້າທີ່ກວດພົບ ແລະ ຢຶດໄດ້ຕາມທ້ອງຕະຫລາດ ໃນເທດສະບານແຂວງເປັນສິນຄ້າລັກລອບນຳເຂົ້າຈາກ ສສ ຫວຽດນາມ ແລະ ໄທ. ສ່ວນມາດຕະການຕໍ່ຜູ້ກະທຳຜິດຄັ້ງນີ້ ທາງເຈົ້າໜ້າທີ່ໄດ້ມີການຕັກເຕືອນ ແລະ ປັບໃໝຕາມລະບຽບການ.
ເຂົ້າຮ່ວມໃນການທຳລາຍສິນຄ້າໃນຄັ້ງນີ້ມີ ທ່ານ ສີປະເສີດ ຈູນລາຊາ ຮອງຫົວໜ້າຂະແໜງການຄ້າພາຍໃນ ພະແນກອຸດສາຫະກຳ ແລະ ການຄ້າແຂວງ, ຕາງໜ້າຂະແໜງອາຫານ ແລະ ຢາ, ຂະແໜງລ້ຽງສັດ ແລະ ການປະມົງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.
Editor: ແຂວງຄຳມ່ວນ
