ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 17 ມັງກອນ 2018 ຜ່ານມານີ້ ທີ່ຫ້ອງປະຊຸມກອງບັນຊາການປ້ອງກັນຄວາມສະຫງົບ ເມືອງຊຳໃຕ້, ແຂວງຫົວພັນ, ໂດຍການເຂົ້າຮ່ວມເປັນປະທານຂອງ ທ່ານ ພັນໂທ ບົວເພັດ ບຸນມີໄຊ ຄະນະພັກ, ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງຫົວພັນ, ມີ ທ່ານ ຄຳເພັດ ໄຊວີເຮືອງ ກຳມະການພັກເມືອງ ຫົວໜ້າກອງບັນຊາການປ້ອງກັນຄວາມສະຫງົບເມືອງຊຳໃຕ້ ພ້ອມດ້ວຍນາຍ ແລະ ພົນຕຳຫຼວດ ໃນທົ່ວເມືອງເຂົ້າຮ່ວມຢ່າງພ້ອມພຽງ.
ທ່ານ ພັນຕີ ສ້າງສຸຊັນ ຫວັງຊື້ກື້ ຮອງຫົວໜ້າກອງບັນຊາການ ປກສ ເມືອງ ໄດ້ຂື້ນຜ່ານບົດສະຫຼຸບວຽກງານປ້ອງກັນຄວາມສະຫງົບທົ່ວເມືອງຊຳໃຕ້ ໃນໜຶ່ງປີຜ່ານມາ ເຊິ່ງໄດ້ຍົກໃຫ້ເຫັນວຽກງານທີ່ສຳຄັນພົ້ນເດັ່ນຫຼາຍດ້ານເປັນຕົ້ນ: ຄະນະພັກກອງບັນຊາການປ້ອງກັນຄວາມສະຫງົບທົ່ວເມືອງຊຳໃຕ້ ໄດ້ຖືເອົາວຽກງານສຶກສາອົບຮົມດ້ານການເມືອງແນວຄິດ, ທາດແທ້ມູນເຊື້ອຂອງກຳລັງປ້ອງກັນຄວາມສະຫງົບເປັນກົກ ມີຄວາມສາມັກຄີໜັກແໜ້ນ ຊີ້ນຳວຽກງານວິຊາສະເພາະ ສົມທົບກັບໄອຍາການເຂດ 1 ໄກ່ວເກ່ຍຄະດີຂັ້ນເມືອງໄດ້ 13 ລາຍມີຜູ້ຕ້ອງຫາ 28 ຄົນ ຍິງ 1 ຄົນ, ມ້າງຄະດີຢາເສບຕິດໄດ້ 6 ລາຍ, ມີຜູ້ຕ້ອງຫາ 6 ຄົນ, ຍິງ 1 ຄົນ, ຍຶດຂອງກາງໄດ້ຢາບ້າ ຈໍານວນ 1.054 ເມັດ, ເຮໂລອິນ ຈໍານວນ 2 ແທ່ງ, 19 ກ້ອນນ້ອຍ ແລະ 2 ແປັບນ້ອຍ, ປືນສັບປະເຫຼັກ 2 ກະບອກ, ລູກກະສູນ ເຊກາເຊ (CKC) 23 ນັດ, ລູກກະສູນ CP 75 ນັດ, ລູກກະສູນແຕ່ງ 10 ນັດ, ລູກກະສູນກິລາ 31 ນັດ, ກວດພົບສຶກສາອົບຮົມ ແລະ ປັບໃໝ ຜູ້ລະເມີດປູກຝີ່ນ ໄດ້ 61 ລ້ານກີບ, ປະເມີນຄືນບ້ານປ້ອງກັນຄວາມສະຫງົບ ຮອບວຽນທີ 2 ໄດ້ 6 ບ້ານ, ສ້າງບ້ານປ້ອງກັນຄວາມສະຫງົບໄດ້ 15 ບ້ານ, ມີ 893 ຄອບຄົວ, ເຝີກອົບຮົມພາລະບົດບາດ, ສິດ ແລະ ໜ້າທີ່ໃຫ້ ປກສ ບ້ານໄດ້ 1 ຊຸດ ມີຜູ້ເຂົ້າຮ່ວມ 70 ກວ່າສະຫາຍ, ຮິບຮື້ອາວຸດລ່າເນື້ອ ໄດ້ 1.580 ກະບອກ ເຫັນວ່າໄດ້ຮັບຜົນສຳເລັດຕາມທິດທາງ-ແຜນການທີ່ໄດ້ກຳນົດໃວ້ ແລະ ມີບາດກ້າວຂະຫຽາຍໂຕຂື້ນເລື້ອຍໆ, ນອກນັ້ນ ຍັງຍົກໃຫ້ເຫັນຈຸດອ່ອນຂໍ້ຄົງຄ້າງບາງດ້ານທີ່ຄະນະພັກ-ຄະນະບັນຊາທຸກຂັ້ນພ້ອມດ້ວຍພະນັກງານ-ນັກຮົບຕ້ອງພ້ອມກັນສຸມໃສ່ປັບປຸງແກ້ໄຂໃນຕໍ່ໜ້າໃຫ້ດີຂື້ນເປັນກ້າວໆ.
ສໍາລັບທິດທາງແຜນການໃນຕໍ່ໜ້າຈະສືບຕໍ່ຮັກສາຄວາມສະຫງົບ, ຄວມເປັນລະບຽບຮຽບຮ້ອຍໃນທົ່ວສັງຄົມກໍ່ຄືທົ່ວເມືອງໃຫ້ໄດ້ 100%. ແລະ ໂອກາດດັ່ງກ່າວ ທ່ານ ພັນໂທ ບົວເພັດ ບຸນມີໄຊ ຄະນະພັກ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງຫົວພັນ ຍັງໄດ້ມີຄໍາເຫັນໂອ້ລົມຕໍ່ກອງປະຊຸມ, ທ່ານຍັງໄດ້ຮຽກຮ້ອງໃຫ້ຄະນະພັກ ກອງບັນຊາການປ້ອງກັນຄວາມສະຫງົບເມືອງຊຳໃຕ້ ເອົາໃຈໃສ່ໃນສຶກສາອົບຮົມດ້ານການເມືອງແນວຄິດໃຫ້ຄະນະພັກ-ພະນັກງານ, ປັບປຸງແບບແຜນນຳພາ ແລະ ແບບແຜນວິທີເຮັດວຽກ, ປັບປູງກໍ່ສ້າງພັກ-ພະນັກງານໃຫ້ມີຄວາມໜັກແໜ້ນເຂັ້ມແຂງ ພ້ອມທັງເພີ່ມທະວີຄວາມສາມັກຄີໃຫ້ໃນໝູ່ຄະນະ ແລະ ພາຍນອກໃຫ້ແໜ້ນແຟ້ນ ແລະ ບັນຫາສຳຄັນອື່ນໆອີກ.
ຂ່າວໂດຍ: ທອງແດງ ສີແກ້ວ ວົງອິນນາ ຫ້ອງການຖະແຫຼ່ງຂ່າວເມືອງຊຳໃຕ້
Editor: ກຳປານາດ ລັດຖະເຮົ້າ
