ກະຊວງແຮງງານ ແລະ ສະຫວັດດີການ-ສັງຄົມ ໃຫ້ຮູ້ວ່າ: ປີຜ່ານມາ ອັດຕາສ່ວນໂຄງປະກອບກຳລັງແຮງງານໃນຂົງເຂດກະສິກຳ ຫຼຸດລົງຈາກ 64,8% ໃນປີ 2016 ມາເປັນ 64,5% ໃນປີ 2017 ສ່ວນຂົງເຂດອຸດສະຫະກຳ ເພີ່ມຂຶ້ນຈາກ 11,6% ມາເປັນ 11,8% ແລະ ຂົງເຂດບໍລິການກໍ່ ເພີ່ມຂຶ້ນເຊັ່ນກັນຈາກ 23,6% ມາເປັນ 23,7%.
ການປ່ຽນແປງຂອງກຳລັງແຮງງານນີ້ ຍ້ອນຂະແໜງການກ່ຽວຂ້ອງໄດ້ມີຄວາມພະຍາຍາມ ເອົາໃຈໃສ່ຊຸກຍູ້ສົ່ງເສີມໃນການສ້າງ ແລະ ພັດທະນາກຳລັງແຮງງານ ໃຫ້ມີສີມືນັບມື້ດີຂຶ້ນ ຄື: ໄດ້ປະສານສົມທົບກັບບັນດາສະຖາບັນພັດທະນາສີມືແຮງງານ, ສະຖາບັນການສຶກສາສູນເຝິກວິຊາຊີບ ທັງພາກລັດ-ພາກເອກະຊົນ ແລະ ຫົວໜ່ວຍທຸລະກິດຕ່າງໆ ໄດ້ຈັດຕັ້ງພັດທະນາສີມືແຮງງານຫຼາຍກວ່າ 88 ພັນຄົນ ໃນນີ້ ຂະແໜງກະສິກຳຫຼາຍກວ່າ 20 ພັນຄົນ ອຸດສະຫະກຳ 18 ພັນກວ່າຄົນ ແລະ ບໍລິການ ຫຼາຍກວ່າ 43 ພັນຄົນ ພ້ອມທັງໄດ້ອອກໃບຢັ້ງຢືນສີມືແຮງງານຕາມມາດຖານສີມືແຮງງານແຫ່ງຊາດ ໃນຂະແໜງລົດຍົນ, ກໍ່ສ້າງ ແລະ ການໂຮງແຮມ ໃຫ້ຜູ້ສຳເລັດການເຝິກອົບຮົມ ຫຼາຍກວ່າ 2.600 ຄົນ
ນອກນີ້ ຍັງໄດ້ລົງເກັບກຳຂໍ້ມູນຕຳແໜ່ງງານຢູ່ຕາມຫົວໜ່ວຍທຸລະກິດໂຮງຈັກ-ໂຮງງານຕ່າງໆ ຈຳນວນ 3.600 ກວ່າຫົວໜ່ວຍ ໃນນະຄອນຫຼວງວຽງຈັນ ປາກົດວ່າ ບັນດາຫົວໜ່ວຍທຸລະກິດເລົ່ານັ້ນ ແມ່ນມີຄວາມຕ້ອງການແຮງງານຫຼາຍກວ່າ 47 ພັນຄົນ ແລະ ເປັນທີ່ຕ້ອງການຫຼາຍກວ່າໝູ່ແມ່ນ ໜ້າວຽກທີ່ບໍ່ຈຳເປັນ ມີລັກສະນະສະເພາະດ້ານ (ກຳມະກອນທົ່ວໄປ) ມີເກືອບ 10 ພັນຄົນ.
Editor: ວຽງຈັນໃຫມ່
