ຕະຫຼາດຫຼັກຊັບລາວ ໄດ້ຈັດງານສໍາມະນາ ເປີດໂລກແຫ່ງການລົງທຶນ ພາຍໃຕ້ຫົວຂໍ້ “ການວິເຄາະຫຼັກຊັບດ້ວຍປັດໄຈພື້ນຖານ” ຂຶ້ນທີ່ຕະຫຼາດຫຼັກຊັບລາວ ໃນວັນເສົາຜ່ານມາ ໂດຍການບັນຍາຍຂອງທ່ານ ປອ ເທບສະຫວັນ ກິຕິຍະວົງ ຜູ້ອຳນວຍການໃຫຍ່ ບໍລິສັດ ຫຼັກຊັບ ທຄຕລ-ກທ ຈຳກັດ.
ທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວ ກ່າວວ່າ: ການຈັດງານສຳມະນາໃນຄັ້ງນີ້ ກໍ່ແມ່ນເພື່ອເປັນການເຜີຍແຜ່ຄວາມຮູ້, ຄວາມເຂົ້າໃຈກ່ຽວກັບ ການວິເຄາະຫຼັກຊັບດ້ວຍປັດໄຈພື້ນຖານ. ນີ້ຄືໂອກາດສຳລັບທ່ານທີ່ຈະເປີດແງ່ມູມຄວາມຮູ້ກ່ຽວກັບການວິເຄາະຫຼັກຊັບ, ປັດໄຈຕ່າງໆທີ່ເຮັດໃຫ້ລາຄາຮຸ້ນມີການປ່ຽນແປງ, ເພາະແນ່ນອນວ່າກ່ອນທີ່ທ່ານຈະລົງທຶນໃຫ້ປະສົບຜົນສຳເລັດ ສິ່ງທີ່ຂາດບໍ່ໄດ້ກໍຄືຄວາມຮູ້ ແລະ ຄວາມເຂົ້າໃຈທີ່ຖືກຕ້ອງກ່ຽວກັບຕະຫຼາດທຶນ ແລະ ວິທີການລົງທຶນ.
ການຊື້ຮຸ້ນກໍຄືການຊື້ທຸລະກິດ, ຫົວໃຈຂອງການລົງທຶນ ໃຫ້ປະສົບຜົນສຳເລັດແມ່ນຢູ່ທີ່ການຊື້ບໍລິສັດ ທີ່ມີຜົນປະກອບການດີ ມີກຳໄລທີ່ດີຕໍ່ເນື່ອງ ໃນລາຄາທີ່ເໝາະສົມ ແລ້ວລໍຖ້າຮັບຜົນຕອບແທນຈາກເງິນປັນຜົນ ຫຼື ສ່ວນຕ່າງຂອງລາຄາຮຸ້ນ ທີ່ເພີ່ມຂຶ້ນຕາມສັດສ່ວນຈຳນວນຮຸ້ນທີ່ເຮົາຖືຄອງ.
ສະນັ້ນ, ຜູ້ທີ່ສາມາດປະເມີນທຸລະກິດ ຫຼື ປະເມີນມູນຄ່າຮຸ້ນໄດ້ຖືກຕ້ອງ ແລະ ແນ່ນອນກວ່າ ຈະສາມາດສ້າງຜົນຕອບແທນສູງ ເພາະຫາກທ່ານສາມາດເປັນເຈົ້າຂອງທຸລະກິດທີ່ດີໃນລາຄາຖືກ ຍ່ອມໄດ້ຜົນຕອບແທນທີ່ສູງກວ່າ.

Editor: ເສດຖະກິດ-ການຄ້າ