ງານສະເຫຼີມສະຫຼອງເມືອງ ທ່າແຕງຄົບຮອບ 25 ປີ ຈະເປີດຂື້ນຢ່າງເປັນທາງການໃນ ວັນທີ 8 ມັງກອນ 2018 ທີ່ຈະມາເຖິງ ໃນຂະນະປະຈຸບັນ ການກະກຽມບັນດາໜ້າວຽກງານສໍາເລັດແລ້ວ 85 ສ່ວນຮອຍ. ທ່ານ ຄອນສະຫວັນ ພັນໂຊດ ກໍາມະການພັກເມືອງ ຫົວໜ້າຫ້ອງການອຸດສະຫະກໍາ ແລະ ການຄ້າເມືອງເມືອງທ່າແຕງ ທັງເປັນຫົວໜ້າເຂດຈຸດສຸ່ມພັດທະນາທີ 1 ຄະນະກໍາມະການຈັດງານສະເຫຼີມສະຫຼອງເມືອງທ່າແຕງຄົບຮອບ 25 ປີ, ກ່າວໃນໂອກາດສໍາຫຼວດພື້ນທີ່ຮອງຮັບໃຫ້ແກ່ການຈັດງານດັ່ງກ່າວ ເມື່ອວັນທີ 11 ທັນວາ 2017 ຜ່ານມາວ່າ: ມາຮອດປະຈຸບັນ ການຈັດຕັ້ງປະຕິບັດບັນດາກິດຈະກໍາຕ່າງໆໄດ້ສໍາເລັດເປັນສວນໃຫ່ຍໂດຍສະເພາະ ການກໍານົດພື້ນທີ່ຮອງຮັບການວາງສະແດງສິນຄ້າທັງພາຍໃນ ແລະ ຕ່າງປະເທດ, ການປະດັບປະດາເສັ້ນທາງ, ສໍານັກງານ, ຫ້ອງການອ້ອມຂ້າງ ໄປພ້ອມກັບການສ້າງຂະບວນການຕ່າງໆ ເຊັ່ນ: ຂະບວນການອະນາໄມ, ຂະບວນການສິລະປະ, ຂະບວນການກິລາ ແລະ ອື່ນໆ ຢ່າງເປັນຂະບວນການກວ້າງຂວາງ, ຂະນະດຽວກັນ ທ່ານ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງທ່າແຕງ ໄດ້ຮຽກຮ້ອງໃຫ້ຄະນະກໍາມະການທຸກພາກສວນ ຈົ່ງສືບຕໍ່ເຮັດວຽກທີ່ບໍ່ທັນສໍາເລັດ ໂດຍສະເພາະ ການປັບປຸງເດີ່ນວາງສະແດງສິນຄ້າ, ສະຖານທີ່ສະຖາລະນາ, ວິທີການຈັດວາງບູດ ລະຫວ່າງ ສິນຄ້າທັງພາຍໃນ ແລະ ຕ່າງປະເທດ, ການກໍານົດຈຸດວາງສິນຄ້າ, ການຕົບແຕ່ງປະດັບປະດາໃນສະຖານທີ່ຕ່າງໆປຸກລະດົມຊຸກຍູ້ບັນດາຫົວໜ່ວຍທຸລະກິດ, ບໍລິສັດ, ລັດວິສາຫະກິດ, ນິຕິບຸກຄົນພ້ອມປະຊາຊົນລາວບັນດາເຜົ່າທຸກທົ່ວໜ້າໃນສັງຄົມ ໃຫ້ເຂົ້າມາວາງສະແດງສິນຄ້າແຕ່ລະປະເພດໃຫ້ໄດ້ຢ່າງຫຼວງຫຼາຍ, ພ້ອມນີ້ ບັນດາໜ້າວຽກໃດບໍ່ທັນສໍາເລັດ ກໍ່ໃຫ້ຄ້ຽວເຮັດໃຫ້ສໍາເລັດກ່ອນວັນທີ 25 ທັນວາ ທີ່ຈະມາເຖິງໃນມໍ່ໆນີ້ ເພື່ອເຮັດໃຫ້ການຈັດງານຕະຫຼາດນັດຄັ້ງນີ້ ໄດ້ລຸລ່ວງໄປດ້ວຍດີ, ມີຄວາມເປັນລະບຽບຮຽບຮ້ອຍ ແລະ ດໍາເນີນໄປດ້ວຍບັນຍາກາດຄຶກຄື້ນມ່ວນຊື່ນ ແລະ ມີຜົນສຳເລັດ. ເຊິ່ງບັ້ນການຫ້າງຫາກະກຽມໃນງານບຸນຄັ້ງນີ້ ຈະມີການສະແດງສິລະປະວັນນະຄະດີ, ບົດຟ້ອນ, ບົດເພງ, ບົດລໍາອື່ນໆ ທີ່ເປັນເອກະລັກຂອງເມືອງ ທ່າແຕງ, ບັນດາຫ້ອງການ, ລັດວິສາຫະກິດ ແລະ ບ້ານຕ່າງໆ, ການແຂ່ງຂັນກິລາ,ການວາງສະແດງສິນຄ້າຈາກພາຍໃນແລະຕ່າງປະເທດ.

ສ່ວນບັນດາບໍລິສັດ, ລັດວິສາຫະກິດ ທັງພາຍໃນ ແລະ ຕ່າງປະເທດ, ນິຕິບຸກຄົນ ຜູ້ທີ່ມີຄວາມສົນໃຈຢາກນໍາເອົາສິນຄ້າຂອງຕົນເອງມາວາງສະແດງ ສາມາດຕິດຕໍ່ໄດ້ທີ່ເບີໂທຄະນະກໍາມະການຈັດງານຕະຫຼາດນັດ ທີ່ເມືອງທ່າແຕງ

ຂ່າວຈາກ ຖວທ ເມືອງທ່າແຕງ

Editor: ກຳປານາດ ລັດຖະເຮົ້າ