ງານວາງສະແດງສິນຄ້າຈີນ-ອາຊຽນ ຄັ້ງທີ14 ປະຈຳປີ 2017 ທີ່ພວມດຳເນີນງານຢູ່ໃນປະຈຸບັນນີ້ ທີ່ຫນານຫນິງ, ສປ ຈີນ ກຳລັງມີບັນຍາກາດຄຶກຄັກ ຂະນະທີ່ທາງດ້ານທ່ານ ກອງມາລາ ພົມມາໄລ, ເຈົ້າຂອງໂຮງງານ ເຄແອນບີ ເຟີນິເຈີ ເປັນອີກຫນຶ່ງຫົວຫນ່ວຍທຸລະກິດ ໃນແຖວຫນ້າຂອງປະເທດ ໃນດ້ານເຟີນິເຈີ ທີ່ໄດ້ນໍາສິນຄ້າຂອງຕົນເຂົ້າເຮົາງານ ແລະ ໄດ້ເປີດເຜີຍກັບລາຍການເມືອງລາວວັນນີ້ ວ່າ: ງານວາງສະແດງສິນຄ້າຈີນ-ອາຊຽນ ຖືວ່າມີບົດບາດຄວາມສຳຄັນຫລາຍຕໍ່ຜູ້ປະກອບການຂອງປະຊາຄົມອາຊຽນ ກໍ່ຄື ສປປ ລາວ ຕະຫລອດຮອດລູກຄ້າຊາວຈີນ ທີ່ໄດ້ມີເວທີເລືອກຊົມ ແລະ ຊື້ ສິນຄ້ານາໆຊະນິດໄວ້ຊົມໃຊ້ໃນຄົວເຮືອນ ຊຶ່ງຈະເປັນຊ່ອງທາງຫນຶ່ງໃນການສົ່ງເສີມ ແລະ ສ້າງລາຍຮັບໃຫ້ແກ່ຜູ້ປະກອບການ ໃຫ້ມີຄວາມເຂັ້ມແຂງສາມາດຢືນຢູ່ໃນຕະຫລາດພາກພື້ນ ແລະ ສາກົນໄດ້.
ດ້ານໂຮງງານ ເຄແອນບີ ເຟີນິເຈີເອງ ສຳລັບງານດັ່ງກ່າວແມ່ນໄດ້ເຂົ້າຮ່ວມເປັນປີທີ 5 ແລ້ວ ແລະ ກໍ່ເຫັນວ່າໂຕເລກຄວາມຕ້ອງການສິນຄ້າຂອງທາງໂຮງງານແມ່ນເພີ່ມຂື້ນທຸກປີ ແລະ ໃນນີ້ເອງ ເຄແອນບີ ເຟີນິເຈີ ກໍ່ໄດ້ຂົນກອງທັບເຟີນິເຈີເຂົ້າຮ່ວມວາງສະແດງ ແລະ ຂາຍ ຫລາຍກວ່າ 50-60 ລາຍການ ທີ່ມີການອອກແບບທີ່ເປັນເອກະລັກບໍ່ຊ້ຳໃຜ ໂດຍຈະເນັ້ນຄວາມເປັນລາວປະສົມຄວາມເປັນສາກົນເລັກຫນ້ອຍ ເພື່ອໃຫ້ຜະລິດຕະພັນເຟີນິເຈີອອກມາແບບທັນສະໄຫມ. ຊຶ່ງນັບແຕ່ມື້ເປີດງານວັນທີ 12 ເປັນຕົ້ນມາ ເຫັນວ່າລູກຄ້າຊາວຈີນໃຫ້ຄວາມສົນໃຈ ແລະ ຈັບຈອງເປັນເຈົ້າຂອງຫລາຍລາຍການ ຊຶ່ງຄາດວ່າຕະຫລອດງານແຕ່ລະວັນ ຈົນເຖິງມື້ປິດງານ ຈະມີຍອດຂາຍທະລຸ 70 ສ່ວນຮ້ອຍ ຂອງສິນຄ້າທີ່ນຳເຂົ້າຮ່ວມງານວາງສະແດງ ຊຶ່ງມີມູນຄ່າທັງຫມົດ 2 ແສນໂດລາສະຫະລັດ.
Editor: ຕະວັນ ແສງສະຫວັນ
