ທ້າຍອາທິດທີ່ຜ່ານມາ ປກສ ເມືອງ ປາກຊັນ ແຂວງ ບໍລິຄໍາໄຊ ໄດ້ຈັດພິທີປິດສະຫຼຸບຜົນການລົງຝຶກງານຂອງ ນັກຮຽນ ໂຮງຮຽນ ປກສ ຊັ້ນຕົ້ນ ເລກ 4 ຮຸ້ນ VII ຂື້ນ ຢູ່ທີ່ຫ້ອງປະຊຸມ ປກສ ເມືອງ ປາກຊັນ, ໂດຍການເປັນປະທານຂອງ ທ່ານ ພັນໂທ ທົນທະວີ ໂພຄໍາ ຄະນະພັກຮາກຖານ, ຮອງຫົວໜ້າກອງບັນຊາການ ປກສ ເມືອງ ປາກຊັນ, ມີບັນດາພະແນກ, ປກສ ບໍລິການປະຊາຊົນ, ຄູ-ອາຈານ ຕະຫຼອດນັກຮຽນລົງຝຶກງານເຂົ້າຮ່ວມຢ່າງພ້ອມພຽງ.
ທ່ານ ຮ້ອຍໂທ ວິໄລສັກ ທອງວິໄລ ຄະນະຊີ້ນໍານັກຮຽນລົງຝຶກງານ ໄດ້ຂື້ນຜ່ານບົດສະຫຼຸບຜົນສໍາເລັດການລົງຝຶກງານຂອງນັກຮຽນ ໂຮງຮຽນ ປກສ ຊັ້ນຕົ້ນ ເລກ 4 ຮຸ້ນ VII ຢູ່ ປກສ ເມືອງປາກຊັນ ໃນວັນທີ 28 ພຶດສະພາ ຫາ 29 ມິຖຸນາ 2018 ທີ່ຜ່ານມາ ເຊິ່ງມີນັກຮຽນລົງຝຶກງານທັງໝົດ ຈໍານວນ 70 ສະຫາຍ, ຍິງ 13 ສະຫາຍ ຜ່ານການຈັດຕັ້ງລົງຝຶກງານ ປະຕິບັດວຽກງານຕົວຈິງເຫັນວ່າ: ແຕ່ລະສະຫາຍແມ່ນມີແນວຄິດອຸ່ນອ່ຽນທຸ່ນທ່ຽງ, ເຊື່ອ ໝັ້ນຕໍ່ການນໍາພາຂອງພັກ-ລັດ, ມີຄວາມບຸກບືນຫ້າວຫັນຕໍ່ອຸປະສັກໃນການປະຕິບັດໜ້າທີ່ວຽກງານ, ມີຄວາມສາມັກຄີເປັນປຶກແຜ່ນລະຫວ່າງຂັ້ນເທິງ ແລະ ຫມູ່ເພື່ອນດ້ວຍກັນ. ໃນໄລຍະ 1 ເດືອນຜ່ານມາສາມາດກວດກາປຶ້ມຮ່າງໃຫຍ່-ຮ່າງນ້ອຍ ໄດ້ 18 ຫົວ, ອານາໄມລວມຫ້ອງການ ແລະ ອ້ອມຂ້າງກົມກອງ ໄດ້ 76 ຄັ້ງ, ກວດກາເອກະສານປ່ຽນຊື່ ແລະ ນາມສະກຸນ, ເອກະສານຍົກຍ້າຍມາຕ່າງເມືອງ, ຕ່າງແຂວງ ໄດ້ 26 ຄົນ, ຈໍ້າກາຍ້າຍອອກຈາກສໍາມະໂນຄົວມີ 22 ຄົນ, ກວດກາໃບອານຸຍາດຮັບເອົາ ຫຼື ບຸກຄົນທີ່ຍ້າຍມາ 6 ຊຸດ, ຂຽນບິນຮັບເງິນຫ່ວງສໍາມະໂນຄົວ ແລະ ບິນຖອນເງິນນໍ້າມັນເຄື່ອນໄຫວວຽກງານໄດ້ 136 ໃບ, ລົງເກັບກໍາຂໍ້ມູນນໍາພະນັກງານຫ້ອງການເມືອງ ຢູ່ 5 ກຸ່ມບ້ານ, ສົມທົບກັບ ພະແນກຄຸ້ມຄອງສໍາມະໂນຄົວ ແລະ ອໍານາດການປົກຄອງບ້ານ ຫ່າງຊິງສະຫວ່າງລົງຂຽນປຶ້ມ 5 ຊະນິດ ຈໍານວນ 2 ຄັ້ງ, ລົງວຽກຮ່ວມກັບພະແນກສັນຕິບານເມືອງ ແລະ ແຂວງ ກ່ຽວກັບວຽກງານຄຸ້ມຄອງຄົນຕ່າງປະເທດໄດ້ 5 ຄັ້ງ, ເຂົ້າຮ່ວມຮັບຟັງເຊື່ອມຊຶມບັນດາເອກະສານຈາກຂັ້ນເທິງໄດ້ 2 ຄັ້ງ, ເຂົ້າຮ່ວມແກ້ໄຂຄະດີຂາຍຫວຍເຖື່ອນ ໄດ້ 4 ຄັ້ງ, ລົງຕິດຕາມເປົ້າໝາຍຄ້າ-ຂາຍຢາເສບຕິດໄດ້ 2 ຄັ້ງ, ກວດກາ, ສໍາຫຼວດ ສະຖິຕິພົນລະເມືອງ ແລະ ຄົນພັກເຊົາຊົ່ວຄາວໄດ້ 16 ບ້ານ ຈໍານວນ 14 ຄັ້ງ, ກວດກາເອກະສານຂໍເຮັດປຶ້ມສໍາມະໂນຄົວໃໝ່ 12 ຫົວ, ລົງເກັບກໍາສະຖິຕິຮ້ານກິນດື່ມ ແລະ ກວດກາລາດຕະເວນ, ເຂດຈຸດຫຼໍ່ແຫຼມໄດ້ 37 ຄັ້ງ, ປ້ອງກັນງານບຸນບັ້ງໄຟປະຈໍາປີໄດ້ 1 ຄັ້ງ, ເຂົ້າຮ່ວມແກ້ໄຂຄະດີເສດຖະກິດໄດ້ 5 ເລື່ອງ, ສຶກສາອົບຮົມຜູ້ລະເມີດກົດໝາຍບ້ານເມືອງໄດ້ 04 ຄັ້ງ, ປະຈໍາການ 30 ຄັ້ງ, ເຂົ້າຮ່ວມເອົາຄໍາໃຫ້ການ 4 ຄັ້ງ ລົງກວດກາສະຖານທີ່ເກີດເຫດອື່ນໆໄດ້ 10 ຄັ້ງ, ເຂົ້າຮ່ວມຈັບກຸມເປົ້າໝາຍຄະດີຢາເສບຕິດໄດ້ 4 ລາຍ, ຜູ້ຖືກຫາ 19 ຄົນ, ຂອງກາງຢາບ້າ 1,621 ເມັດ, ລົດຈັກ 05 ຄັນ, ໂທລະສັບມືຖື 05 ເຄື່ອງ, ອາວຸດລ່າເນື້ອ 04 ກະບອກ.
ໃນພິທີ ຍັງໄດ້ຜ່ານຂໍ້ຕົກລົງຂອງເຈົ້າເມືອງປາກຊັນ ສະບັບເລກທີ 254/ມປຊ, ລົງວັນທີ 28 ມິຖຸນາ 2018 ວ່າດ້ວຍການຍ້ອງຍໍ ໃຫ້ແກ່ຜູ້ທີ່ມີຜົນງານດີເດັ່ນໃນການລົງຝຶກງານ ຢູ່ກອງບັນຊາການ ປກສ ເມືອງ ປາກຊັນ ແຂວງ ບໍລິຄໍາໄຊ ຈໍານວນ 70 ສະຫາຍ, ຍິງ 13 ສະຫາຍ.
Editor: ຄຳໄຊ
