ໃນຕອນເຊົ້າຂອງວັນທີ 8 ມິຖຸນາ 2018 ນີ້ ທີ່ໂຮງຮຽນມັດທະຍົມສົມບູນໂພນທອງ ເມືອງໂພນທອງ, ແຂວງຫລວງພະບາງ ໄດ້ຈັດພິທີສະຫຼຸບວຽກງານ ການຮຽນ-ການສອນ ປະຈຳສົກຮຽນ 2017-2018 ແລະ ປິດສົກຮຽນຂື້ນຢ່າງເປັນທາງການ ໂດຍປະທານຂອງ ທ່ານ ທອງພັນ ແກ້ວມະນີ ອຳນວຍການໂຮງຮຽນມັດທະຍົມສົມບູນໂພນທອງ ,ມີ ທ່ານ ອຳຄາ ແກ້ວອໍາພອນ ຮອງຫົວໜ້າຫ້ອງການ ສຶກສາທິການ ແລະ ກິລາເມືອງ, ທ່ານ ສິງຄໍາ ແກ້ວອໍາພອນ ສະມາຄົມພໍ່ແມ່ນັກຮຽນ , ພ້ອມດ້ວຍແຂກຮັບເຊີນ, ອົງການປົກຄອງເມືອງ, ຄູ-ອາຈານ ແລະນ້ອງນັກຮຽນເຂົ້າຮ່ວມ.
ທ່ານ ພົງສະຫວັນ ອິນດາລັກ ຮອງອໍານວຍການໂຮງຮຽນ ມສ ໂພນທອງ ໄດ້ຂຶ້ນຜ່ານບົດສະຫຼຸບ ຜົນການຮຽນ-ການສອນ ປະຈຳສົກຮຽນ 2017-2018 ທາງດ້ານພົ້ນເດັ່ນ ແລະ ຂໍ້ຄົງຄ້າງ ໃຫ້ຮູ້ວ່າ: ໂຮງຮຽນ ມສ ໂພນທອງ ມີຄະນະອຳນວຍການ 3 ທ່ານ, ມີອາຈານສອນທັງໝົດ 38 ຄົນ, ຍິງ 21 ຄົນ ມີນັກຮຽນ 847 ຄົນ, ຍິງ 384 ຄົນ, ຕະຫຼອດໄລຍະ 1 ປີຜ່ານມາ ໄດ້ປະຕິບັດໜ້າທີ ຕາມຈັນຍາບັນຂອງຄູ ໃນການສຸມໃສ່ ຕາມ 3 ຫຼັກສະນະ 5 ຫຼັກມູນຂອງການສຶກສາ ພ້ອມທັງຍົກລະດັບການສຶກສາ ດ້ວຍການບຳລຸງຍົກລະດັບຄວາມຮູ້ຄວາມສາມາດຂອງຄູອາຈານ ຍົກລະດັບຄຸນນະພາບການຮຽນ ຂອງນັກຮຽນໃຫ້ສູງຂື້ນ ແລະເອົາໃຈໃສ່ຕໍ່ການແຕ່ງບົດສອນໃຫ້ຕໍ່ເນື່ອງ ຖືກຕາມແຜນການສອນ, ສາມາດຍາດໄດ້ຜົນງານ ໃນການບັນລຸຄຳຂວັນ ຄູສອນດີ-ນັກຮຽນຮຽນເກັ່ງ ຜົນການຮຽນປະຈຳພາກຮຽນທີ 2 ຂອງນັກຮຽນມີອັດຕາເສັງໄດ້ 100% ແລະ ສ້າງຄູປະສົບການໄດ້ຈໍານວນໜຶ່ງ, ນອກນີ້ ໄດ້ນໍາພານັກຮຽນໃນໜ່ວຍສີລະປະວັນນະຄະດີ ແລະ ນັກກິລາຂອງໂຮງຮຽນເຂົ້າຮ່ວມງານຕ່າງໆຂອງເມືອງຢ່າງເປັນປະຈຳ. ໃນຕໍ່ໜ້າ ຈະສືບຕໍ່ສ້າງຄູ-ອາຈານປະສົບການ ເພື່ອຕອບສະໜອງຕາມຄວາມຮຽກຮ້ອງຕ້ອງການ ຂອງວຽກງານການສຶກສາໃນໄລຍະໃໝ່, ສ້າງສື່ການຮຽນ-ການສອນໃຫ້ມີຄຸນນະພາບ ແລະ ສ້າງໃຫ້ເປັນໂຮງຮຽນແບບຢ່າງ ທາງດ້ານການສຶກສາ. ຈາກນັ້ນ ໄດ້ມອບຂອງຂັວນໃຫ້ກັບນັກຮຽນເກັ່ງປະຈໍາປີ 2017-2018 ຈຳນວນ 6 ນ້ອງ ຍິງ 2 ນ້ອງ ເປັນກຽດຂຶ້ນມອບຂອງ ທ່ານ ທອງພັນ ແກ້ວມະນີ.
ຕອນທ້າຍພິທີ ທ່ານ ອໍາຄາ ແກ້ວອໍາພອນ ຮອງຫົວໜ້າຫ້ອງການສຶກສາທິການ ແລະ ກິລາເມືອງ ກໍ່ໄດ້ມີຄໍາເຫັນໂອລົມ ກ່ອນອື່ນທ່ານ ໄດ້ຍ້ອງຍໍຊົມເຊີຍ ຕໍ່ພະນັກງານຄູ-ອາຈານແລະ ນັກຮຽນ ທີ່ສອບເສັງໄດ້ປະເພດເດັ່ນ, ປະຕິບັດວຽກງານ ການຮຽນການສອນຕະຫຼອດໄລຍະ 1 ປີຜ່ານມາ ພ້ອມທັງ ເນັ້ນໜັກໃຫ້ສືບຕໍ່ຮັກສາມູນເຊື່ອອັນດີງາມໄວ້ໃຫ້ໜັ້ນຄົງ.

Editor: ເມືອງໂພນທອງ