ໃນວັນທີ 24 ກໍລະກົດ 2019 ນີ້ ໄດ້ມີພິທີມອບ-ຮັບໂຮງຮຽນສາມັນສຶກສາມິດຕະພາບ ລາວ-ຫວຽດນາມ ຂື້ນໂດຍໃຫ້ກຽດເຂົ້າຮ່ວມຂອງ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ມີ ທ່ານ ຖາວອນ ຕາງໜ້າກະຊວງສຶກສາ ແລະ ກິລາ, ທ່ານ ຫງຽນ ຫ້າຍ ແທັງ ຕາງໜ້າ ກະຊວງສຶກສາ ແລະ ບຳລຸງສ້າງ ສັງຄົມນິຍົມ ຫວຽດນາມ.
ໂຮງຮຽນສາມັນສຶກສາມິດຕະພາບລາວ-ຫຽດນາມ ເລີ່ມລົງມືກໍ່ສ້າງມາ ແຕ່ວັນທີ 16 ພະຈິກ 2017 ເຖີງວັນທີ 31 ມິຖຸນາ 2019 ຈິ່ງສຳເລັດ, ລວມມູນຄ່າລົງທຶນທັງໝົດ 39.573 ຕຶ້ດົງ, ( 3 ຫມື່ນ 9 ພັນ 5 ຮ້ອຍ 7 ສີບ 3 ຕື້ດົງ ) ແລະ ຈະເປີດຮຽນທາງການເລີ່ມແຕ່ ວັນທີ 4 ກັນຍາ 2019 ພ້ອມທັງມີລົດຮັບສົ່ງ. ໂດຍແມ່ນຄະນະຄຸ້ມຄອງບັນດາໂຄງການ ກະຊວງສຶກສາ ທິການ ສາທາລະນະລັດ ສັງຄົມນິຍົມ ຫວຽດນາມເປັນເຈົ້າຂອງໂຄງການ ແລະ ບໍລິສັດ ເປັນຜູ້ຮັບ ເໝົາກໍ່ສ້າງ, ມີຫຼາຍຊັ້ນຮຽນ ແຕ່ຊັ້ນປະຖົມສຶກສາ, ຊັ້ນມັດທະຍົມຕົ້ນ ແລະ ຊັ້ນມັດທະຍົມປາຍ ລວມທັງໝົດ 24 ຫ້ອງຮຽນ, ນອກນັ້ນ ໂຄງການຍັງມີຫ້ອງເສີມທັກສະເພື່ອຮັບໃຊ້ແກ່ການຮຽນຂອງນັກຮຽນເຊັ່ນ: ຫ້ອງປະຕິບັດຕົວຈິງວິຊາຄອມພິວເຕີ, ຫ້ອງທົດລອງຊີວະ, ຫ້ອງທົດລອງເຄມີ, ຫ້ອງທົດລອງຟີຊິກ, ຫ້ອງຮຽນພາສາຕ່າງປະເທດ, ຫ້ອງພະນັກງານຄູ-ອາຈານ, ບໍລິຫານຄຸ້ມຄອງ ແລະ ຫ້ອງປະຖົມພະຍາບານ ພ້ອມນັ້ນ ຍັງມີບ່ອນຈອດລົດ ແລະ ສິ່ງອໍານວຍຄວາມສະດວກຄົບຊຸດ
ຈາກນັ້ນ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ກໍ່ໄດ້ສະແດງຄວາມຂອບໃຈມາຍັງຕໍ່ພັກ-ລັດຖະບານ ແລະ ປະຊາຊົນຫວຽດນາມທີ່ຍາມໃດກໍ່ໄດ້ເອົາໃຈໃສ່ອູ້ມຊູ່ຊ່ວຍເຫຼືອປຽບດັ່ງອ້າຍນ້ອງຮ່ວມອຸທອນດຽວກັນຕໍ່ ສປປ ລາວກໍ່ຄືຊາວແຂວງສະຫວັນນະເຂດຂອງພວກເຮົາ ແລະ ຂໍໃຫ້ຄຳໝັ້ນສັນຍາວ່າ ຈະຊີ້ນຳ ພະແນກການ, ອຳນາດການປົກຄອງ ແລະ ພາກສ່ວນກ່ຽວຂ້ອງໂດຍສະເພາະແມ່ນ ສະມາຄົມຫວຽດນາມ ແຂວງສະຫວັນນະເຂດ ຊ່ວຍກັນປົກປັກຮັກສາ, ຖະນຸຖະໝອມນຳໃຊ້ໂຮງຮຽນທີ່ສວຍງາມແຫ່ງນີ້ໃຫ້ເກີດປະໂຫຍດສູງສຸດ.