ກອງປະຊຸມຜູ້ບໍລິຫານການສຶກສາ ແລະ ກິລາທົ່ວແຂວງໄຊຍະບູລີ ປະຈຳສົກປີ 2017-2018 ແລະ ເຜີຍແຜ່ຍຸດທະສາດ ການພັດທະນາຊັບພະຍາກອນມະນຸດ ຂັ້ນແຂວງ ໄດ້ຈັດຂື້ນໃນຕອນເຊົ້າຂອງວັນທີ່ 10 ກໍລະກົດ 2018 ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງໄຊຍະບູລີ ໂດຍພາຍໃຕ້ການເປັນປະທານຂອງ ທ່ານ ກາບແກ້ວ ສີບຸນມາ ຫົວໜ້າພະແນກສຶກສາທິການ ແລະກິລາແຂວງໄຊຍະບູລີ, ເປັນກຽດເຂົ້າຮ່ວມມີ ທ່ານນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ມີກໍາມະການພັກແຂວງ ຕາງໜ້າກະຊວງສຶກສາທິການ ແລະ ກິລາ, ສະມາຊິກສະພາປະຊາຊົນ, ມີເຈົ້າເມືອງ-ຮອງເຈົ້າເມືອງ 11 ເມືອງ ທົ່ວແຂວງ, ມີຫົວໜ້າພະແນກ ຮອງພະແນກການ ກົມກອງ, ອົງການຜູ້ອໍານວຍການໂຮງຮຽນ ຄູອາຈານ ແລະ ແຂກຖືກເຊີນເຂົ້າຮ່ວມ.

ໃນກອງປະຊຸມຜູ້ເຂົ້າຮ່ວມໄດ້ຮັບຟັງຮ່າງບົດສະຫຼຸບແຜນພັດທະນາການສຶກສາ ແລະ ກິລາ ປະຈໍາສົກຮຽນ 2017-2018 ແລະ ທິດທາງແຜນການ 2018-2019 ຈາກ ທ່ານ ອ່ອນຕາ ພົມມະຈິດ ຮອງຫົວໜ້າພະແນກສຶກສາທິການ ແລະ ກິລາແຂວງ ບົດວິໄຈສະພາບການຈັດຕັ້ງປະຕິບັດຕົວຊີ້ບອກແຜນພັດທະນາການສຶກສາ ແລະ ກິລາສົກຮຽນ 2017-2018 ການກະກຽມຄວາມພ້ອມ ເຂົ້າຮ່ວມກິລາແຫ່ງຊາດ ແລະ ແຜນການກະກຽມເປັນເຈົ້າພາບກິລາແຫ່ງຊາດ ຄັ້ງທີ່ 12 ປີ, 2021 ສະພາບການປະຕິບັດຍຸດທະສາດກິລາກາຍະກໍາ ແລະ ກອງທຶນກິລາກາຍະກໍາ ມາດຕະການປະຕິບັດ ຂໍ້ຕົກລົງຂອງ ທ່ານເຈົ້າແຂວງ ວ່າດ້ວຍການແກ້ໄຂການປະລະ ແລະ ປະຕິບັດຂໍ້ແຂ່ງຂັນຂະແໜງສຶກສາ ແລະ ກິລາ ມາດຕະການແກ້ໄຂປະກົດການຫຍໍ້ທໍ້ ຂອງຄູ ແລະ ນັກຮຽນໂດຍສະເພາະແມ່ນສິ່ງເສບຕິດຕ່າງໆ ສົມທຽບກັບປີຜ່ານມາການສ້າງໂຮງຮຽນຕາມມາດຖານຄຸນນະພາບ ແລະ ໂຮງຮຽນຕົວແບບຕິດພັນກັບຂະບວນການຍົກສູງຄຸນນະພາບການສອນຂອງຄູ ບົດຮຽນໃນການຄຸ້ມຄອງເງິນບໍລິຫານ ແລະ ນຳໃຊ້ງົບປະມານປະຈຳປີ ແລະ ການບຳລຸງຍົກລະດັບການສຶກສາໃຫ້ແກ່ປະຊາຊົນ ພະນັກງານ ແລະ ບັນຫາທ້າທາຍໃນການຮ່ວມມືກັບອົງການຈັດຕັ້ງສາກົນສະພາບການຈັດຕັ້ງປະຕິບັດຫຼັກສູດ ແລະ ການຝຶກອົບຮົມວິຊາອາຊີບຂອງໂຮງຮຽນເຕັກນິກວິຊາອາຊີບແບບປະສົມ ບັນຫາທ້າທາຍໃນການປັບປຸງຄຸນນະພາບ ການຮຽນການສອນ ແລະ ການບໍລິຫານຄຸ້ມຄອງວິທະຍາໄລເອກະຊົນບັນຫາທ້າທາຍໃນການປັບປຸງຄຸນນະພາບການຮຽນ ແລະ ການບໍລິຫານຄຸ້ມຄອງໂຮງຮຽນ

ພ້ອມດຽວກັນນີ້ ຫົວນ້າ ຮອງຫົວໜ້າ ຫ້ອງການສຶກສາທິການ ແລະ ກິລາບັນດາເມືອງ ພະແນກການ ຫ້ອງການ ອົງການ ຍັງໄດ້ພ້ອມກັນປະກອບຄຳຄິດຄຳເຫັນ ໃສ່ຮ່າງບົດສະຫຼຸບ ແລະ ທິດທາງແຜນການ ຂອງວຽກງານການສຶກສາ ຢ່າງກົງໄປກົງມາ ເພື່ອເຮັດໃຫ້ວຽກງານການສຶກສາ ຢູ່ແຂວງໄຊຍະບູລີ ໄດ້ຮັບການປັບປຸງ ໃຫ້ດີຂື້ນໄປເລື້ອຍໆ ກອງປະຊຸມຄັ້ງນີ້ຈະໄດ້ດຳເນີນໄປເປັນເວລາ 2 ວັນເຄິງຈື່ງຈະສຳເລັດ

Editor: ກຳປານາດ ລັດຖະເຮົ້າ