ເພື່ອເປັນການສ້າງບັນຍາກາດ ແຫ່ງຄວາມມ່ວນຊື່ນ ແກ່ຜູ້ທີ່ມາທ່ຽວງານ ວາງສະແດງເຄື່ອງເຮືອນລາວ ຄັ້ງທີ 3 ປະຈໍາປີ 2018 ເຊີ່ງຈັດຂື້ນທີ່ສູນການຄ້າ ລາວ-ໄອເຕັກ (ຕຶກເກົ່າ) ນະຄອນຫລວງວຽງຈັນ ໃນລະຫວ່າງວັນທີ 7-15 ກໍລະກົດ 2018 ນີ້ ຄະນະຮັບຜິດຊອບງານວາງສະແດງ ໄດ້ມີການຈັດກິດຈະກໍາສໍາລັບນ້ອງນ້ອຍ ເຍົາວະຊົນ ຂື້ນ ໂດຍຈັດໃຫ້ມີເວທີປະກວດເຕັ້ນແບບເປັນທີມ

ຈຸດປະສົງ ແລະ ເປົ້າຫມາຍ ເພື່ອເປັນການສົ່ງເສີມຄວາມສາມາດ ແລະ ພອນສະຫວັນ ແກ່ນ້ອງນ້ອຍເຍົາວະຊົນ ໃຫ້ມີເວທີ ສະແດງອອກ ວ່າ: ເດັກນ້ອຍສະໄຫມນີ້ ມີຄວາມສາມາດຫລາຍດ້ານ ທີ່ເປັນທັກສະ ການພັດທາງກາຍະ, ຄວາມຄິດສ້າງສັນ ແລະ ພອນສະຫວັນ ທີ່ກ້າສະແດງອອກ. ເຊີ່ງເປີດໂອກາດ ໃຫ້ບັນດາໂຮງຮຽນປະຖົມ-ມັດທະຍົມ ໄດ້ສ້າງທີມເຕັ້ນປະຈໍາໂຮງຮຽນ ແລະ ໄດ້ມີໂອກາດ ນໍາສະເໜີທີມເຕັ້ນປະຈໍາໂຮງຮຽນຂອງຕົນ.

ສໍາລັບທີມເຕັ້ນ ທີ່ເຂົ້າຮ່ວມແຂ່ງຂັນ ມີ 20 ກວ່າທີມ ທີ່ມາຈາກໂຮງຮຽນ ປະຖົມ-ມັດທະຍົມ ທັງພາກລັດ ແລະ ເອກະຊົນ ພາຍໃນນະຄອນຫລວງວຽງຈັນ ເຊີ່ງງານປະກວດເຕັ້ນ ຄັ້ງນີ້ ຈັດຂື້ນຄວບຄູ່ກັບງານວາງສະແດງ ເຄື່ອງເຮືອນລາວ ປະຈໍາປີ 2018 ເປັນການສ້າງບັນຍາກາດ ແລະ ຄວາມມ່ວນຊື່ນ ທັງເປັນການດຶງດູດເອົາຜູ້ຄົນ ເຂົ້າມາທ່ຽວງານ ໃຫ້ຫລາຍຂື້ນ.

Editor: ກຳປານາດ ລັດຖະເຮົ້າ