ໃນວັນທີ 3 ກໍລະກົດ 2018 ຜ່ານມານີ້, ຄະນະກຳມະການຄຸ້ມຄອງການລົງທຶນຂອງລັດຂັ້ນເມືອງໂພນທອງ, ແຂວງຫລວງພະບາງ ນໍາໂດຍ ທ່ານນາງ ວັນເພັງ ພະຫົງຈັນ ຮອງເຈົ້າເມືອງໂພນທອງ, ທ່ານ ບຸນລອດ ຫົວໜ້າຜູ້ປະສານງານໂຄງການ ຫຼຸດຜ່ອນຄວາມທຸກຍາກປະຈໍາເມືອງໂພນທອງ, ທ່ານ ບຸນຍົງ ຮອງປະດິດ ຕາງໜ້າບໍລິສັດ ໂຊກແສງຄໍາ ກໍ່ສ້າງເຄຫະສະຖານ, ພ້ອມດ້ວຍ ຜູ້ຕາງໜ້າຂະແໜງການທີກ່ຽວຂ້ອງ ຕະຫຼອດຮອດອົງການ ປົກຄອງບ້ານຫວ້ຍລານ ໄດ້ລົງຢ້ຽມຢາມກວດກາໂຄງການກໍ່ສ້າງໂຮງຮຽນ ປະຖົມສຶກສາ 3 ຫ້ອງຢູ່ບ້ານ ຫ້ວຍລານ, ກຸ່ມນາຊອນ ເມືອງໂພນທອງ.

ໂຄງການການກໍ່ສ້າງ ໂຮງຮຽນປະຖົມສຶກສາ 3 ຫ້ອງຢູ່ບ້ານຫ້ວຍລານ, ກຸ່ມນາຊອນເປັນອາຄານຊັ້ນດຽວ ຂະໜາດກ້ວາງ 9 ແມັດ, ຍາວ 24 ແມັດ, ມີ 1 ຫ້ອງນໍ້າ 3 ຫ້ອງຮຽນ ໂຄງສ້າງເບຕົງເສີມເຫຼັກ, ພື້ນປູດ້ວຍຊີມັງ, ຫຼັງຄາມຸງດ້ວຍສັງກະສີອາລຸນຊິງ, ຝາກໍ່ດ້ວຍດ້ວຍດິນບ໊ອກອັດແຮງ, ເລີ່ມລົງມືກໍ່ສ້າງແຕ່ ວັນທີ 24 ເມສາ 2018 ເຖິງປັດຈຸບັນແມ່ນສໍາເລັດ 40 ສ່ວນຮ້ອຍ, ໂດຍໄດ້ຮັບທຶນຊ່ວຍເຫຼືອຈາກໂຄງການ ກອງທືນຫຼຸດຜ່ອນຄວາມທຸກຍາກ ໃນຮອບວຽນ ທີ 15 ປະຈໍາປີ 2018 ມອບໃຫ້ບໍລິສັດ ໂຊກແສງຄໍາ ກໍ່ສ້າງ-ເຄຫາສະຖານ ຈໍາກັດ ເປັນຜູ້ຮັບເໝົາກໍ່ສ້າງ ໃນມູນຄ່າການກໍ່ສ້າງທັງໝົດ 337 ລ້ານກວ່າກີບ.

ຄາດວ່າການກໍ່ສ້າງຈະສຳເລັດ ໃນທ້າຍ ເດືອນ ກໍລະກົດ 2018 ນີ້, ໃນໂອກາດດັ່ງກ່າວ ທ່ານຮອງເຈົ້າເມືອງໂພນທອງ ໄດ້ຮຽກຮ້ອງໃຫ້ຄະນະກຳມະການຄຸ້ມຄອງການລົງທຶນຂອງລັດຂັ້ນເມືອງ ແລະ ພາກສ່ວນທີກ່ຽວຂ້ອງ ສືບຕໍ່ເອົາໃຈໃສ່ຊີ້ນໍາກວດກາໃຫ້ຖືກຕ້ອງຕາມເຕັກນິກ ຮັບປະກັນມາດຖານ ໃຫ້ມີຄຸນນະພາບດີ, ພ້ອມທັງໄດ້ສະແດງຄວາມຂອບໃຈ ຕໍ່ໂຄງການກອງທືນຫຼຸດຜ່ອນຄວາມທຸກຍາກ ທີ່ໃຫ້ການຊ່ວຍເຫຼືອກໍ່ສ້າງໂຮງຮຽນດັ່ງກ່າວ.

ແຫລ່ງຂ່າວ ທີມຂ່າວເມືອງໂພນທອງ

Editor: ກຳປານາດ ລັດຖະເຮົ້າ