ຫ້ອງການສຶກສາທິການ ແລະ ກິລາ ເມືອງເຊໂປນ ແຂວງສະຫວັນນະເຂດ ໄດ້ຈັດກອງປະຊຸມບໍລິຫານງານການສຶກສາ ແລະ ກິລາທົ່ວເມືອງເຊໂປນ ປະຈຳສົກປີ 2017-2018 ຂື້ນຢ່າງເປັນທາງການ, ໂດຍການເຂົ້າຮ່ວມຂອງ ທ່ານນາງ ຫຼິງທອງ ແສງຕາວັນ ກຳມະການພັກແຂວງ ຫົວໜ້າພະແນກສຶກສາທິການ ແລະ ກິລາ ແຂວງສະຫວັນນະເຂດ ພ້ອມຄະນະ, ທ່ານ ຄໍາຫຼ້າ ພົມມີໄຊ ຮອງເຈົ້າເມືອງເຊໂປນ, ມີບັນດາຫົວໜ້າໜ່ວຍງານ, ຫົວໜ້າໝວດໂຮງຮຽນ, ອໍານວຍການໂຮງຮຽນທົ່ວເມືອງ ພ້ອມດ້ວຍຫ້ອງການອ້ອມຂ້າງເມືອງທີ່ກ່ຽວຂ້ອງເຂົ້າຮ່ວມຈຳນວນ 63 ທ່ານ, ຍິງ16 ທ່ານ,
ທ່ານ ຄໍາຫຼ້າ ພົມມີໄຊຮອງ ເຈົ້າເມືອງເຊໂປນ ໄດ້ໃຫ້ກຽດຂື້ນກ່າວເປີດກອງປະຊຸມຢ່າງເປັນທາງການ, ຫຼັງຈາກນັ້ນ ທ່ານ ຄໍາເພັດ ໄຊຍະເທບ ຫົວໜ້າຫ້ອງການສຶກສາທິການ ແລະ ກິລາເມືອງເຊໂປນ ກໍ່ໄດ້ຂື້ນລາຍງານບົດສະຫຼຸບການ ຈັດຕັ້ງປະຕິບັດແຜນພັດທະນາການສຶກສາ ສົກປີ 2017-2018, ທິດທາງແຜນການສຶກສາສົກ 2018-2019 ແລະ ການຈັດຕັ້ງແຜນພັດທະນາການສຶກສາສົກປີ 2017-2018 ນີ້ໃນການຈັດຕັ້ງການຮຽນ-ການສອນແຕ່ວັນທີ 4/9/2017 ເປັນຕົ້ນມາການກະກຽມໄຂສົກຮຽນໃໝ່ ອຳນາດການປົກຄອງແຕ່ລະຂັ້ນ ກໍ່ໄດ້ປະກອບສ່ວນຢ່າງຕັ້ງໜ້າໃນການປຸກລະດົມຊຸກຍູ້ເດັກໃນເກນອາຍຸ ໃຫ້ໄດ້ເຂົ້າຮຽນ ແລະ ໂຮງຮຽນໄດ້ມີການປັບປຸງປົວແປງອາຄານສະຖານທີ່ ຮໍ່າຮຽນເຊິ່ງເປັນການປະກອບສ່ວນເຮັດໃຫ້ການຈັດຕັ້ງປະຕິບັດ ແຜນການສຶກສາເພື່ອທຸກຄົນ, ແຜນຍຸທະສາດເຕີບໂຕ ແລະ ລຶບລ້າງຄວາມທຸກຍາກ ແລະ ປະກົດຜົນເປັນຈິງເທື່ອລະກ້າວ.
ໃນກອງປະຊຸມບັນດາແຂກເຂົ້າຮ່ວມກໍ່ໄດ້ປະກອບຄຳຄິດຄຳເຫັນ ໃສ່ຮ່າງບົດສະຫຼຸບບັນຫາ ທີ່ຄົງຄ້າງເພື່ອເຮັດໃຫ້ບົດສະຫຼຸບດັ່ງກ່າວຄົບຖ້ວນຊັດເຈນ, ທິດທາງແຜນການ 2018-2019 ແມ່ນປຸກລະດົມໃຫ້ເດັກນ້ອຍເກນອາຍຸ 3-5 ປີ ໄດ້ເຂົ້າໂຮງຮຽນ, ເພີ່ມອັດຕາເຂົ້າໂຮງຮຽນໃນຊັ້ນມັດທະຍົມຕົ້ນໃຫ້ສູງຂື້ນ ໂດຍເລັ່ງໃສ່ເຂດຫ່າງໄກຊອກຫຼີກ ແລະ ວຽກງານດ້ານຕ່າງໆໃຫ້ບັນລຸຕາມແຜນການທີ່ວາງໄວ້ 100 ສ່ວນຮ້ອຍ
ສຸດທ້າຍ ທ່ານນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາ ແຂວງສະຫວັນນະເຂດ ກໍ່ໄດ້ໃຫ້ກຽດມີຄໍາເຫັນ ແລະ ໃຫ້ທິດເຍືອງທາງໃຫ້ບັນດາທ່ານແຂກເຂົ້າຮ່ວມກ່ອນອື່ນທ່ານກໍ່ເຫັນດີເປັນເອກະພາບນຳບົດສະຫຼຸບດັ່ງກ່າວ, ທ່ານຍັງຍ້ອງຍໍຊົມເຊີຍນໍາການນໍາຂັ້ນເມືອງທີ່ຊີ້ນຳການຈັດຕັ້ງວຽກງານວັດທະນະທຳ-ສັງຄົມ ເອົາໃຈໃສ່ໃນວຽກງານການສຶກສາ, ນອກນັ້ນທ່ານຍັງໄດ້ເນັ້ນໜັກການປະລະ, ອັດຕາການເຂົ້າຮຽນ ແລະ ອັດຕາຄ້າງຫ້ອງຍັງຕໍ່າ, ສະນັ້ນ ຈຶ່ງຮຽກຮ້ອງມາຍັງຄູອາຈານ, ຜູ້ປົກຄອງເດັກຢາກໃຫ້ເອົາໃຈໃສ່ຢ່າງໜັກແໜ້ນ ແລະ ເອົາໃຈໃສ່ທາງດ້ານບໍລິຫານ, ທາງດ້ານວິຊາການຊີ້ນໍາກ່ຽວກັບການສຶກສາທາງດ້ານກິດຈະກໍາການຮຽນ, ການສອນ ແລະ ຕ້ອງມີແຜນການ, ປະມວນການຮຽນການສອນໃຫ້ຖືກຕ້ອງຕາມແຜນການທີ່ໄດ້ກໍານົດໄວ້.
Editor: ກຳປານາດ ລັດຖະເຮົ້າ
