ລະຫວ່າງ ວັນທີ 19-20 ມີຖຸນາ 2018 ນີ້, ນັກຮຽນມັດທະຍົມປາຍປີສຸດທ້າຍ ຫຼື ມໍ 7 ໃນທົ່ວເມືອງໆຫົງສາ ໄດ້ສອບເສັງຢ່າງເປັນທາງການ. ໂດຍໃຫ້ກຽດເຂົ້າຮ່ວມ ພ້ອມເປີດຫົວບົດສອບເສັງຂອງ ທ່ານນາງ ດາວວິນ ລາດຊະກິດ ຮອງເຈົ້າເມືອງ ເມືອງຫົງສາ ປະທານສູນການສອບເສັງຈົບຊັ້ນມັດທະຍົມປາຍ, ມີ ທ່ານ ບຸນຫຼວນ ອິນເຕີ່ມ ຮອງຫົວໜ້າສູນການສຶກສານອໂຮງຮຽນ ພະແນກ ສຶກສາທິການ ແລະ ກິລາແຂວງໄຊຍະບູລີ, ມີຫົວໜ້າຫ້ອງການ ສຶກສາທິການ ແລະ ກິລາເມືອງຫົງສາ, ຜູ້ອໍານວຍການໂຮງຮຽນມັດທະຍົມພາຍໃນເມືອງ ພ້ອມດ້ວຍຄະນະກໍາມະການທີ່ຖືກແຕ່ງຕັ້ງຍາມຫ້ອງສອບເສັງ ແລະ ນ້ອງນັກຮຽນຊັ້ນ ມ 7 ເຂົ້າຮ່ວມສອບເສັງ.
ການສອບເສັງຈົບຊັ້ນສົກຮຽນປີນີ້, ນັກຮຽນມັດທະຍົມປາຍໃນທົ່ວເມືອງ ແມ່ນເຕັ້ມໄປດ້ວຍບັນຍາກາດອັນຟົດຟື້ນຄຶກຄື້ນພໍສົມຄວນ. ໂດຍສະເພາະ, ບັນດານັກຮຽນໄດ້ມີຄວາມຕັ້ງອົກຕັ້ງໃຈ, ສຸມໃສ່ການສອບເສັງ ເພື່ອຍາດເອົາຄະແນນດີ ແລະ ປະຕິບັດຕາມກົດລະບຽບຢ່າງເຄັ່ງຄັດ ຕະຫຼອດຮອດບັນດາຄະນະກຳມະການ ກໍມີຄວາມຮັບຜິດຊອບຕໍ່ການປະຕິບັດໜ້າທີ ທີ່ໄດ້ຮັບມອບໝາຍ ດ້ວຍຄວາມຮັບຜິດຊອບສູງ.
ທ່ານ ປ່ຽນ ຈິນດາ ຫົວໜ້າຫ້ອງການ ສຶກສາທິການ ແລະ ກິລາເມືອງຫົງສາ ຮອງປະທານສູນການສອບເສັງຈົບຊັ້ນມັດທະຍົມປາຍ ໄດ້ໃຫ້ຮູ້ວ່າ: ການສອບເສັງ ຈົບຊັ້ນ ມ7 ປີນີ້, ຖ້າທຽບໃສ່ປີຜ່ານມາ ເຫັນວ່າມີນັກສອບເສັງ ເພີ່ມຂຶ້ນ 32 ຄົນ ຍິງ 41 ຄົນ ແລະ ໄດ້ນໍາໃຊ້ 4 ວິຊາເຂົ້າໃນການສອບເສັງຈົບຄື: ວິຊາພາສາລາວ-ວັນນະຄະດີ, ວິຊາຄະນິດສາດ, ວິຊາຊີວະວິທະຍາ ແລະ ວິຊາພູມສາດ. ເຊິ່ງໃນທົ່ວເມືອງ ມີນັກສອບເສັງຈົບຊັ້ນມັດທະຍົມຕອນປາຍທັງໝົດ 287 ຄົນ, ຍິງ 136 ຄົນ ທີ່ມາຈາກໂຮງຮຽນ 5 ແຫ່ງ ຄື: ໂຮງຮຽນມັດທະຍົມສົມບູນ ຫົງສາ, ໂຮງຮຽນມັດທະຍົມສົມບູນ ນາປຸ່ງ, ໂຮງຮຽນມັດທະຍົມສົມບູນ ຄົກແອກ, ໂຮງຮຽນມັດທະຍົມສົມບູນ ບ້ານຫານ ແລະ ໂຮງຮຽນມັດທະຍົມສົມບູນ ພູແລ້ງ, ຈັດເປັນ 1 ສູນສອບເສັງ ແລະ ແບ່ງອອກເປັນ 14 ຫ້ອງສອບເສັງ, ຫ້ອງໜຶ່ງປະມານ 20-21 ຄົນ.
ທ່ານ ປ່ຽນ ຈິນດາ ຍັງໃຫ້ຮູ້ອີກວ່າ: ນັກສອບເສັງ ແມ່ນມີຄວາມເອົາໃຈໃສ່ຕໍ່ການປະຕິບັດລະບຽບຢ່າງເຂັ້ມງວດ, ເປັນຕົ້ນ. ການນຸ່ງຖື, ປະຕິບັດໂມງເວລາ, ການຫ້າມນໍາໃຊ້ເຄື່ອງເອເລັກໂຕນິກທຸກຊະນິດເຂົ້າໃນຫ້ອງສອບເສັງ. ພ້ອມນີ້ ທຸກພາກສ່ວນໃນສັງຄົມ, ຜູ້ປົກຄອງກໍໃຫ້ເອົາໃຈໃສ່ຕິດຕາມ ແລະ ຊຸກຍູ້ລູກຫຼານຂອງຕົນ ໃນຄົ້ນຄວ້າຮໍ່າຮຽນ, ຮັກສາສຸຂະພາບ, ສົ່ງລູກຫຼານໄປເຖິງສູນສອບເສັງ ແລະ ຕິດຕາມການເຄື່ອນໄຫວອື່ນໆ. ທີ່ຈະສົ່ງຜົນກະທົບຕໍ່ການສອບເສັງ ຈົບຊັ້ນ ມ7 ໃນຂອບເຂດ ທົ່ວເມືອງບັນລຸຕາມຄາດໝາຍທີ່ວາງໄວ້.ການສອບເສັງໃນຄັ້ງນີ້, ໄດ້ດໍາເນີນໄປເປັນເວລາ 2 ວັນຈຶ່ງສຳເລັດ
ແຫລ່ງຂ່າວ ທີມຂ່າວເມືອງຫົງສາ
Editor: ກຳປານາດ ລັດຖະເຮົ້າ