ເມືອງປາກລາຍ ແຂວງໄຊຍະບູລີ ເປີດການສອບເສັງຈົບຊັ້ນ ມ7 ສົກຮຽນ 2017-2018 ຂື້ນຢ່າງເປັນທາງການໃນລະຫວ່າງວັນທີ 19-20 ມິຖຸນາ 2018 ນີ້ ທີ່ໂຮງຮຽນ ມໍປາຍ ປາກລາຍ ໂດຍການເຂົ້າຂອງ ທ່ານ ບຸນລັບ ແສງອາພອນ ເລຂາພັກເມືອງ ເຈົ້າເມືອງ ເມືອງປາກລາຍ ມີທ່ານ ໄພລັດ ສີວິໄລ ຮອງຫົວໜ້າຫ້ອງການສືກສາທິການ ແລະ ກິລາເມືອງ ມີຄະນະຊີ້ນຳ-ກຳມະການ ຜູ້ຕ່າງໜ້າຈາກພະແນກສຶກສາແຂວງໄຊຍະບູລີ ມີ ຄູ-ອາຈານ, ນ້ອງນັກຮຽນພ້ອມດ້ວຍຂະແໜງການທີ່ກຽ່ວຂ້ອງເຂົ້າຮ່ວມ.
ໃນໂອກາດດັ່ງກ່າວ ທ່ານ ບຸນລັບ ແສງອາພອນ ກໍາມະການພັກແຂວງ ເລຂາພັກເມືອງເຈົ້າເມືອງ ເມືອງປາກລາຍ ກໍ່ໄດ້ເປີດຫົວບົດສອບເສັງ ພາຍໃນຫ້ອງສອບເສັງ ເຊີ່ງແມ່ນວິຊາພາສາລາວ-ວັນນະຄະດີ ເປັນວິຊາທໍາອິດໃນການສອບເສັງ, ຊຶ່ງລວມທັງໝົດມີ 4 ວິຊາສອບເສັງ ຄື: ວິຊາພາສາລາວ-ວັນນະຄະດີ, ວິຊາຟີຊິກສາດ,ຄະນິດສາດ ແລະ ວິຊາປະຫວັດສາດ ແບ່ງອອກເປັນ 2 ສູນສອບເສັງ ຄື: ສູນສອບເສັງຢູ່ມໍຕົ້ນປາກລາຍ ແລະ ສູນສອບເສັງຢູ່ ມໍປາຍ ປາກລາຍ ມີທັງໝົດ 38 ຫ້ອງ ມີນັກຮຽນເຂົ້າສອບເສັງທັງໝົດ 844 ຄົນ,ຍິງ 447 ຄົນ ເຊີ່ງມາຈາກໂຮງຮຽນ ມສ ແລະ ມໍປາຍ ທັງໝົດ 8 ແຫ່ງ ໃນທົ່ວເມືອງ ຄື: ມໍປາຍ ປາກລາຍ, ມສ ນ້ໍາຊົງ, ມສ ນ້ໍາພູນ,ມສ ບ້ານມ່ວງ, ມສ ເມືອງປາ, ມສ ເມືອງວາ, ມສ ບວມເລົາ ແລະ ມສ ປ່າໄລ່ .
ຈາກນັ້ນ ທ່ານ ບຸນລັບ ແສງອາພອນ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງປາກລາຍ ກໍ່ໄດ້ກ່າວເປີດການສອບເສັງຈົບຊັ້ນມັດທະຍົມຕອນປາຍ ປະຈຳສົກຮຽນ 2017-2018 ຢ່າງເປັນທາງການ ພ້ອມທັງ ຮຽກຮ້ອງໃຫ້ນັກສອບເສັງ ຈົ່ງໄດ້ເອົາໃຈໃສ່ນຳເອົາບົດຮຽນ ທີ່ໄດ້ຮໍ່າຮຽນມາ ສຸມໃສ່ໃນການສອບເສັງ ຄັ້ງນີ້ ໃຫ້ໄດ້ຮັບຜົນດີ ຮັກສາຄວາມສະຫງົບພາຍໃນຫ້ອງເສັງໃນເວລາສອບເສັງ ການສອບເສັງຈົບຊັ້ນມັດທະຍົມຕອນປາຍທົ່ວເມືອງປາກລາຍໃນຄັ້ງນີ້ ແມ່ນໃຊ້ເວລາ 2 ວັນ ຈື່ງຈະສໍາເລັດ.

Editor: ເມືອງປາກລາຍ