ໃນວັນທີ 12 ຫາ 15 ມິຖຸນາ 2018 ນີ້; ໃນທົ່ວເມືອງ ອາດສະພັງທອງ ແຂວງສະຫວັນນະເຂດ ໄດ້ເປີດບັ້ນການສອບເສັງຊັ້ນມັດທະຍົມຕົ້ນ ມໍ 4 ປະຈໍາສົກຮຽນ ປີ 2017-2018 ໂດຍການເຂົ້າຮ່ວມຂອງທ່ານ ສຸລິໂຍ ສີລາວົງ ຮອງເຈົ້າເມືອງອາດສະພັງທອງ ປະທານຊີ້ນໍາລວມໃນສູນສອບເສັ່ງ ໃນທົ່ວເມືອງອາດສະພັງທອງ, ມີທ່ານ ບຸນໜັກ ດວງສະຫວ່າງ ພະແນກສຶກສາທິການ ແລະ ກິລາ ແຂວງສະຫວັນນະເຂດ ຄະນະປະທານຊີ້ນໍາລວມໃນສູນສອບເສັ່ງໃນທົ່ວເມືອງອາດສະພັງທອງ, ມີຫົວໜ້າຫ້ອງການສຶກສາທິການ ແລະ ກິລາເມືອງ, ຜູ້ອໍານວຍການໂຮງຮຽນຕະຫຼອດຮອດ ຄູ-ອາຈານ ແລະ ນັກຮຽນຈໍານວນ 595 ຄົນ, ຍິງ 356 ຄົນ ເຂົ້າຮ່ວມສອບເສັງ.
ໃນສົກປີ 2017-2018 ນີ້: ໃນທົ່ວເມືອງອາດສະພັງທອງ ໄດ້ເປີດບັ້ນດໍາເນີນການສອບເສັງຂຶ້ນໄປພ້ອມໆກັນ ໂດຍໃຊ້ເວລາສອບເສັງເປັນເວລາ 3 ວັນຄື: ນັບແຕ່ວັນທີ 12 ຫາ ວັນທີ 15 ມິຖຸນາ ຈຶ່ງຈະສໍາເລັດຕາມຄາດໝາຍທີ່ວາງໄວ້. ໃນນັ້ນ; ໃນທົ່ວເມືອງ ອາດສະພັງທອງ ໄດ້ແບ່ງສູນສອບເສັງອອກເປັນ 4 ສູນສອບເສັງຄື: ສູນສອບເສັງໂຮງຮຽນມັດທະຍົມຕົ້ນດົງເຫັນ, ສູນສອບເສັງໂຮງຮຽນມັດທະຍົມສົມບູນ ໂນນສະຫວ່າງ, ສູນສອບເສັງໂຮງຮຽນມັດທະຍົມສົມບູນສາມັກຄີໄລ ແລະ ສູນສອບເສັງໂຮງຮຽນມັດທະຍົມຕົ້ນແຈລະມ໋ອງ ໂດຍໄດ້ແບ່ງອອກເປັນ 29 ຫ້ອງສອບ, ສ່ວນວິຊາທີ່ນໍາມາສອບເສັງໃນສົກປີນີ້; ມີທັງໝົດ 6 ວິຊາຄື: ວິຊາພາສາລາວ-ວັນນະຄະດີ, ວິຊາສຶກສາພົນລະເມືອງ, ວິຊາວິທະຍາສາດທໍາມະຊາດ, ວິຊາສັງຄົມສາດ, ວິຊາຄະນິດສາດ ແລະ ວິຊາພາສາອັງກິດ.
ສ່ວນຄາດໝາຍສູ້ຊົນໃນທົ່ວເມືອງແມ່ນໃຫ້ໄດ້ 95% ຂຶ້ນໄປ. ທັງນີ້ ກໍ່ເພື່ອເປັນການສອບເສັງເອົານັກຮຽນຊັ້ນມັດທະຍົມຕົ້ນຂຶ້ນໄປຮຽນຕໍ່ຊັ້ນມັດທະຍົມປາຍ ໃຫ້ໄດ້ຄຸນນະພາບ ແລະ ປະລິມານ ຕາມແນວທາງຂອງກະຊວງສຶກສາທິການ ແລະ ກິລາວາງອອກໃຫ້ບັນລຸ ຕາມລະດັບຄາດໝາຍ.

Editor: ນັກຂ່າວເມືອງອາດສະພັງທອງ