ເມື່ອບໍ່ດົນຜ່ານມານີ້ ໂຮງຮຽນການໂຮງແຮມ ແລະ ບໍລິຫານທຸລະກິດ ຈາກປະເທດສະວິດເຊີແລນ ຫລື B.H.M.S ຮ່ວມກັບ ສູນການສຶກສາ ໄມໂຄຣເທັກ ສປປ ລາວ, ໄດ້ຈັດງານສໍາມະນາ ກ່ຽວກັບການໄປສຶກສາຕໍ່ທີ່ປະເທດສະວິດເຊີແລນ ຂື້ນແກ່ຜູ້ທີ່ມີຄວາມສົນໃຈ ເດີນທາງໄປສຶກສາຕໍ່. ເຊີ່ງໃນນີ້ ທ່ານນາງ ພອນອຸມາ ທອງສະໄຫວ  ຜູ້ຈັດການພູມມີພາກອາຊຽນ ຈາກ B.H.M.S ໄດ້ກ່າວວ່າ: ການຈັດງານສໍາມະນາ ດັ່ງກ່າວແມ່ນເປັນຄັ້ງທໍາອິດ ທີ່ໂຮງຮຽນການໂຮງແຮມ ແລະ ບໍລິຫານທຸລະກິດ ຈາກປະເທດສະວິດເຊີແລນ ໄດ້ມາຈັດສໍາມານາ ທີ່ ສປປ ລາວ ເພື່ອແບ່ງປັນປະສົບການ, ຄວາມຮູ້-ຄວາມເຂົ້າໃຈ ກ່ຽວກັບການເດີນທາງໄປສຶກສາທີ່ປະເທດສະວິດເຊີແລນ, ເຂົ້າໃຈເຖິງຄວາມແຕກຕ່າງຈາກປະເທດອື່ນໆ ວ່າເປັນຄືແນວໃດ, ມີຂໍ້ດີ-ຂໍ້ສະດວກແນວໃດ, ເຊີ່ງໄດ້ຮູ້ກັນຢ່າງລະອຽດພາຍໃນງານສໍາມະນາຄັ້ງນີ້.  ທ່ານນາງ ພອນອຸມາ ທອງສະໄຫວ ຍັງກ່າວຕື່ມອີກວ່າ: ງານຄັ້ງນີ້ ນອກຈາກການນໍາສະເໜີກ່ຽວກັບປະເທດສະວິດ ແລ້ວ, ໃນງານຍັງມີອາດິດນັກສຶກສາ ທີ່ເຄີຍໄປສຶກສາທີ່ປະເທດສະວິດ ປະລິນຍາຕຣີ-ປະລິນຍາໂທ ໄດ້ມາແບ່ງປັນປະສົບການຕົວຈິງ ຈາກຫ້ອງຮຽນໃນປະເທດສະວິດ ໄດ້ຮູ້ ໄດ້ເຂົ້າໃຈໄປພ້ອມໆກັນ. ແລະ ພິເສດພາຍໃນງານສໍາມະນາ ຄັ້ງນີ້, ຜູ້ເຂົ້າຮ່ວມທັງໝົດ ຍັງໄດ້ຮຽນຮູ້ເຖິງວັດທະນະທໍາ ຂອງປະເທດສະວິດ ໂດຍສະເພາະກ່ຽວກັບວາຍ, ພ້ອມທັງການຮຽນຮູ້ກ່ຽວກັບວາຍ, ຄວາມແຕກຕ່າງຂອງວາຍ, ການເບີ່ງ, ການສັງເກດ, ການສໍາຜັດ ແລະ ການຊີມລົດຊາດ ເຊີ່ງໄດ້ນໍາມາຖ່າຍທອດໂດຍກົງແກ່ຜູ້ເຂົ້າຮ່ວມງານສໍາມະນາຄັ້ງນີ້ ອີກດ້ວຍ.

Editor: ກຳປານາດ ລັດຖະເຮົ້າ