ໃນວັນທີ 25 ພຶດສະພາ 2018 ນີ້, ທີ່ໂຮງຮຽນລຽວໂຕວ໌ ນະຄອນຫລວງວຽງຈັນ, ໄດ້ຈັດການແຂ່ງຂັນເວົ້າພາສາຈີນເພື່ອຄັດເລືອກນັກຮຽນມັດທະຍົມເຂົ້າຮ່ວມການແຂ່ງຂັນ "ຂົວພາສາຈີນ" ສໍາລັບນັກຮຽນມັດທະຍົມທົ່ວໂລກ ຄັ້ງທີ 11 ໂດຍແມ່ນສະຖານທູດ ສປ. ຈີນ ປະຈຳ ສປປ ລາວ ເປັນເຈົ້າພາບ ແລະ ຈັດງານໂດຍໂຮງຮຽນລຽວໂຕວ໌, ເປັນກຽດເຂົ້າຮ່ວມໂດຍ ທ່ານ ສົມປະສົງ ຈັນທະວົງ ຜູ້ອຳນວຍການ ໂຮງຮຽນມັດທະຍົມສົມບູນລຽວໂຕວ໌, ທ່ານ ຈ້າວເຊິນກາງ ທີ່ປຶກສາການເມືອງ ສະຖານທູດຈີນ ປະຈຳລາວ, ມີຜູ້ຕ່າງໜ້າຈາກກະຊວງສຶກສາທິການ ແລະ ກິລາ ພ້ອມດ້ວຍຄູ-ອາຈານ ແລະ ນັກຮຽນເຂົ້າຮ່ວມຢ່າງຫຼວງຫຼາຍ.

ການແຂ່ງຂັນໃນຄັ້ງນີ້ ມີຜູ້ເຂົ້າຮ່ວມແຂ່ງຂັນ 12 ຄົນ. ທີ່ມາຈາກໂຮງຮຽນມັດທະຍົມສົມບູນລຽວໂຕວ໌, ໂຮງຮຽນຈີນ ແຂວງຈໍາປາສັກ, ໂຮງຮຽນຈຸງເຕັກ ແຂວງສະຫວັນນະເຂດ ແລະ ໂຮງຮຽນ ຈີນລຽວກົງ ແຂວງຫຼວງນໍ້າທາ. ສໍາລັບ ການແຂ່ງຂັນເວົ້າພາສາຈີນ ໃນຄັ້ງນີ້ ປະກອບດ້ວຍ 3 ຫົວຂໍ້ ຄື: ການເວົ້າພາສາຈີນ, ການຕອບຄໍາຖາມຄວາມຮູ້ຮອບຕົວ ແລະ ການສະແດງຄວາມສາມາດ ເຊິ່ງນັກຮຽນທຸກຄົນແມ່ນໄດ້ສະແດງຄວາມມັກຮັກໃນພາສາຈີນ ແລະ ວັດທະນະທໍາຈີນ, ຜ່ານການແຂ່ງຂັນດັ່ງກ່າວ ນາງ ນ້າເຟິງ ມາຈາກໂຮງຮຽນລຽວໂຕວ໌ ແລະ ນາງ ລີຈິນຕິ່ງ ມາຈາກໂຮງຮຽນ ຈຸງເຕັກ ແຂວງສະຫວັນນະເຂດ ສາມາດຄວ້າລາງວັນ ຊະນະເລີດອັນດັບໜຶ່ງ ເຊິ່ງທັງສອງຄົນ ຈະໄດ້ເປັນຕົວແທນຂອງປະເທດລາວ ເພື່ອເຂົ້າຮ່ວມແຂ່ງຂັນ “ຂົວພາສາຈີນ” ທີ່ຄຸນໝິງ ປະເທດຈີນ ທີ່ຈະໄດ້ຈັດຂຶ້ນໃນເດືອນກັນຍາ 2018 ນີ້.

Editor: ກຳປານາດ ລັດຖະເຮົ້າ