ເຊົ້າວັນທີ 22 ພຶດສະພາ 2018 ນີ້, ຢູ່ໂຮງຮຽນແຫ່ງຕ່າງໆທົ່ວເມືອງເຊໂປນ ໄດ້ຈັດພິທີເປີດບັ້ນສອບເສັງນັກຮຽນຈົບຊັ້ນປະຖົມ ປໍ 5 ສົກປີ 2017-2018 ຂື້ນຢ່າງເປັນທາງການ, ຢູ່ສູນ ສອບເສັງປະຖົມອຸດົມສຸກ ເມືອງເຊໂປນ, ແຂວງສະຫວັນນະເຂດ, ໂດຍການເປັນປະທານຂອງ ທ່ານ ຄໍາຫລ້າ ພົມມີໄຊ ຮອງເຈົ້າເມືອງເຊໂປນ, ມີ ທ່ານ ສີສຸກກີ ຍາດຕາວັນ  ຮອງຫົວໜ້າຫ້ອງການສຶກສາທິການ-ກິລາເມືອງເຊໂປນ, ມີບັນດາທ່ານໃນຄະນະບ້ານອຸດົມສຸກ, ຄະນະຮັບຜິດຊອບການສອບເສັງຂັ້ນແຂວງ, ເມືອງ, ຄະນະກໍາມະການຍາມຫ້ອງສອບ ແລະ ນັກຮຽນເຂົ້າຮ່ວມຢ່າງພ້ອມພຽງ.  ໃນພີທີກໍ່ໄດ້ຜ່ານກົດລະບຽບຂອງການສອບເສັງ ແລະ ຮັບຟັງການໂອ້ລົມຈາກ ທ່ານ  ຄໍາຫລ້າ ພົມມີໄຊ ຮອງເຈົ້າເມືອງເຊໂປນ ໄດ້ຮຽກຮ້ອງມາຍັງນັກຮຽນທຸກຄົນຈົ່ງພ້ອມກັນເອົາໃຈໃສ່ ນໍາເອົາຄວາມຮູ້ທີ່ໄດ້ຮຽນມາຕັ້ງໃຈເຮັດຂໍ້ສອບຂອງຕົນໃຫ້ບັນລຸເປົ້າໝາຍທີ່ວາງໄວ້, ໃນພີທີກໍ່ໄດ້ຮ່ວມຕັດຫົວບົດເປີດການສອບເສັງຢ່າງເປັັນທາງການ, ທ່ານ ສີສຸກກີ ຍາດຕາວັນ ຮອງຫົວໜ້າຫ້ອງການສຶກສາທິການ-ກິລາເມືອງ ໄດ້ລາຍງານຕໍ່ຜູ້ສື່ຂ່າວ ວ່າ: ສົກປີ 2017-2018 ນີ້, ທົ່ວເມືອງເຊໂປນ ມີໂຮງຮຽນປະຖົມ 109 ແຫ່ງ, ໃນນັ້ນໂຮງຮຽນປະຖົມສົມບູນ 85 ແຫ່ງ, ແບ່ງເປັນ 13 ສູນສອບເສັງ ຄື: ສູນປະຖົມອຸດົມສຸກ, ສູນປະຖົມທ່າໂຂ່ງ, ສູນປະຖົມເມືອງຈັນ, ສູນປະຖົມດົງສະຫວັນ, ສູນປະຖົມຫ້ວຍສານ, ສູນປະຖົມແດນສະຫວັນ, ສູນປະຖົມລະໂກ, ສູນປະຖົມນາບໍ່, ສູນປະຖົມໂພນໄຮ, ສູນປະຖົມໂພໄຊ,ສູນປະຖົມລາດຫໍ້, ສູນປະຖົມກະດໍ, ສູນປະຖົມກະຕູບ, ນັກຮຽນຊັ້ນ ປໍ 5 ຕົ້ນປີມີທັງໝົດ 982 ຄົນ,ຍີງ 475 ຄົນ, ທ້າຍປີມີນັກຮຽນ 940 ຄົນ, ຍີງ462 ຄົນ, ມີໜ້າສອບເສັງຕົວຈິ່ງ 919 ຄົນ, ຍີງ455 ຄົນ, ປະກອບມີ 3 ວີຊາຫລັກ ທີ່ສອບເສັງ ຄື: ວີຊາພາສາລາວ(ຫັດແຕ່ງ) ແລະ ພາກຂຽນທວາຍ, ວີຊາຄະນິດສາດ, ວີຊາໂລກອອ້ມຕົວ ກໍານົດການສອບເສັງ 2 ວັນ ເລີ່ມແຕ່ວັນທີ 22-23ພຶດສະພາ 2018 ຈຶ່ງສໍາເລັດ,ສໍາລັບເມືອງເຊໂປນ ຄາດຫມາຍການສອບເສັງໃນສົກປີນີ້ ຈະໃຫ້ໄດ້100 ສ່ວນຮ້ອຍ.

Editor: ກຳປານາດ ລັດຖະເຮົ້າ