ຄະນະອັກສອນສາດ ມະຫາວິທະຍາໄລແຫ່ງຊາດ, ກຽມຈັດງານເທດສະການສະໝອງ ຄັ້ງທີ 3 ໃນລະຫວ່າງ ວັນທີ 9-11 ພຶດສະພາ 2018 ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ ເພື່ອເປັນການປູກຈິດສໍານຶກໃຫ້ເຍົາວະຊົນ-ຊາວຫນຸ່ມ, ນັກຮຽນ-ນັກສຶກສາລາວ ໃຫ້ກາຍເປັນຄົນມັກອ່ານ ແລະ ຮັກການຂຽນຂື້ນ, ເຮັດໃຫ້ສັງຄົມລາວ ກາຍເປັນສັງຄົມແຫ່ງການອ່ານ-ການຂຽນ ແລະ ສັງຄົມແຫ່ງການຮຽນຮູ້ ຕະຫລອດຊີວິດ.

ທ່ານ ປອ ໄຊຍະເພັດ ຊາພິຈິດ ວ່າການຫົວຫນ້າພະແນກການສຶກສາ ຫລັງປະລິນຍາຕຣີ, ຄະນະອັກສອນສາດ, ມະຫາວິທະຍາໄລແຫ່ງຊາດ ໄດ້ກ່າວຕໍ່ນັກຂ່າວ ເມື່ອບໍ່ດົນມານີ້ວ່າ: ງານເທດສະການອາຫານສະໝອງ ຖືວ່າ ເປັນກິດຈະກໍາຫນຶ່ງ ຂອງ ຄະນະອັກສອນສາດ ເຊີ່ງໄດ້ເລີ່ມຕົ້ນມາແຕ່ປີ 2016 ເຊີ່ງມີແນວຄວາມຄິດໃນການລິເລີ່ມ, ສໍາລັບປີນີ້ ເປັນຄັ້ງທີ 3 ເຊີ່ງແຕ່ລະປີ ມີຫົວຂໍ້ທີ່ແຕກຕ່າງກັນ ສໍາລັບປີ 2018 ມີຫົວຂໍ້: ການອ່ານ ແລະ ການນໍາໃຊ້ພາສາລາວ. ເພື່ອສ້າງໃຫ້ນັກວິຊາການຮຸ້ນສຶບທອດ,ເຍົາວະຊົນ, ຊາວຫນຸ່ມ, ນັກຮຽນ-ນັກສຶກສາລາວ ໃຫ້ມີຄວາມມັກຮັກໃນພາສາ ແລະ ວັດທະນະທໍາລາວ, ພ້ອມກັນນັ້ນ ຍັງເປັນການປູກຝັງຈິດສໍານຶກ ໃນຄໍາເວົ້າທີ່ວ່າ: ພາສາບອກຊາດ. ດ້ວຍການຮ່ວມການນໍາໃຊ້ ແລະ ພັດທະນາພາສາລາວ ໃຫ້ສອດຄ່ອງກັບສະພາບຄວາມເປັນຈິງ, ພ້ອມດຽວກັນນັ້ນ ຍັງເປັນການສົ່ງເສີມການສ້າງຜົນງານທາງດ້ານການອ່ານ ແລະ ການຂຽນ ໃຫ້ຫລາຍຂື້ນ ເປັນການປະກອບສ່ວນສ້າງນັກວິຊາການດ້ານພາສາລາວ, ສ້າງເຍົາວະຊົນ-ສ້າງຊາວຫນຸ່ມ, ນັກຮຽນ-ນັກສຶກສາລາວ ໃຫ້ກາຍເປັນປັນຍາຊົນ ທີ່ມີຄວາມຮູ້-ຄວາມສາມາດ, ທັກສະ ແລະ ບົດຮຽນໃຫມ່ໆ ເພື່ອສາມາດແຂ່ງຂັນກັບຊາວຫນຸ່ມໃນບັນດາປະເທດອາຊຽນ.

Editor: ກຳປານາດ ລັດຖະເຮົ້າ