ເມື່ອບໍ່ດົນມານີ້ ໂຮງຮຽນ ເມຈິກພາມສ໌ ຕາງຫນ້າ ສປປ ລາວ ເຂົ້າຮ່ວມແຂ່ງຂັນ ລະດັບນາໆຊາດ ທີ່ ມະຫາວິທະຍາໄລ ມາເລເຊຍ ເປີຣິດ ປະເທດມາເລເຊຍ ໃນຫົວຂໍ້: ການປະຍຸກ ຕໍ່ຍອດ ສົ່ງເສີມປະດິດສ້າງ ເຊີ່ງງານໄດ້ຈັດຂື້ນໃນລະຫວ່າງວັນທີ 13 ຫາ 15 ເມສາ 2018 ຜ່ານມາ ເຊິງສາມາດຍາດ ໄດ້ຫຼາຍລາງວັນ ແລະ ສ້າງສື່ສຽງໃຫ້ແກ່ປະເທດຊາດ.

ໂຮງຮຽນ ເມຈິກພາມສ໌ ເປັນໂຮງຮຽນເອກກະຊົນ ພາຍໃຕ້ການຊີ້ນໍາຂອງ ກະຊວງສຶກສາທິການ ແລະ ກິລາ ໂດຍໄດ້ເປີດຢ່າງເປັນທາງການ ມາຕັ້ງແຕ່ງປີ 2004 ເປັນໂຮງຮຽນ ທີ່ ໃຫ້ການສິດສອນນັບແຕ່ ອານຸບານ ຈົນເຖິງ ມັດຖະຍົມຕອນຕົ້ນ, ຕັ້ງຢູ່ບ້ານໂພນທັນ, ເມືອງໄຊເສດຖາ ນະຄອນຫຼວງວຽງຈັນ, ສໍາລັບຜົນງານທີ່ສາມາດຍາດມາໄດ້ ໃນການເຂົ້າຮ່ວມແຂ່ງຂັນ ໃນລະດັບນາໆຊາດ ຄັ້ງນີ້ ແມ່ນເປັນຄັ້ງທໍາອິດຂອງ ໂຮງຮຽນເມຈິກພາມ ສະນັ້ນຜູ້ອໍານວຍການ ພ້ອມດ້ວຍຄູ - ອາຈານ ຈຶ່ງໄດ້ສຸມທຸກທຸກສະຕິກປັນຍາ - ເຫື່ອແຮງ ໃນການກະກຽມ ແລະ ສ້າງສັນຜົນງານ ພ້ອມກັບຝຶກຝົນໃຫ້ແກ່ນ້ອງໃນຮຽນ ໃນການເຂົ້າຮ່ວມປະກວດ ໃນງານດັ່ງກ່າວ ນໍາພາເຂົ້າຮ່ວມການແຂ່ງຂັນໂດຍ ອາຈານ ບັນພົດ ແສນທິຈັກ ພ້ອມດ້ວຍຄະນະ ແລະ ນ້ອງນັກຮຽນ 11 ຄົນ, ເຊິງເປັນຕົວແທນ ໃນແກ່ ສປປລາວ ໃນການ ນໍາເອົາຜົນເຂົ້າຮ່ວມແຂ່ງຂັນ, ການແຂ່ງຂັ້ນ ການປະຍຸກ ຕໍ່ຍອດສົ່ງເສີມ ປະດິດສ້າງ ທີ່ ປະເທດມາເລເຊຍຄັ້ງນີ້ ມີ 16 ປະເທດເຂົ້າຮ່ວມ ແລະ ມີ 408 ຜົນງານ

ສໍາລັບໂຮງຮຽນ ເມຈິກພາມສ໌ ໄດ້ນໍາເອົາ 3 ຜົນງານສົ່ງເຂົ້າປະກວດ ແລະ ທີ່ສໍາຄັນ ທັງ 3 ຜົນງານທີ່ສົ່ງເຂົ້າປະກວດ ໄດ້ຮັບລາງວັນ ທັງ 3 ຜົນງານ ຄື: ຜົນງານການປະດິດ ລະບົບກັ່ນຕອງນໍາ ແບບສະຫຼາດ ໄດ້ຮັບລາງວັນ ຫຼຽນຄໍາ, ຜົນງານການປະດິດ ໂຮງແຫຼມສໍ ພະລັງງານແສງຕາເວັນ ໄດ້ຮັບລາງວັນ ຫຼຽນຄໍາ ແລະ ຜົນງານການປະດິດ ເຄື່ອງດູດ ແລະ ບົດໃບໄມ້ ໄດ້ຮັບລາງວັນຫຼຽນເງີນ, ພ້ອມກັບໄດ້ຮັບລາງວັນພິເສດ ຄື: ລາງວັນຮັກສາສິ່ງແວດລ້ອມດີເດັ່ນ ຈາກປະເທດໂລມາເນຍ ຕື່ມອີກ.

ຜົນສໍາເລັດດັ່ງກ່າວຂອງ ໂຮງຮຽນ ເມຈິກພາມສ໌ ຖືວ່າເປັນອີກໜຶ່ງຜົນງານທີ່ໂຮງຮຽນ ສາມາດຍາດໄດ້ ໃນລະດັບນາໆຊາດ ແລະ ເປັນຄວາມສໍາເລັດທີ່ຍິ່ງໃຫຍ່ ໃນການນໍາເອົານັກຮຽນລະດັບ ມໍຕົ້ນ ຂອງ ສປປ ລາວ ໄປສ້າງສື່ສຽງໃຫ້ແກ່ປະເທດຊາດ ແລະ ຍັງເປັນການສົ່ງເສີມຍົກລະດັບວຽກງານການສຶກສາ ເຮັດໃຫ້ນາງປະເທດ ໃນພາກພື້ນ ແລະ ສາກົນ ເຫັນເຖິງ ຄວາມສາມາດຂອງນັກຮຽນລາວ ອີກດ້ວຍ

Editor: ກຳປານາດ ລັດຖະເຮົ້າ