ໃນວັນທີ 24 ເມສາ 2018 ນີ້, ເມືອງຫົງສາ ແຂວງໄຊຍະບູລີ ໄດ້ຈັດຕັ້ງການສອບເສັງ ເອົາພະນັກງານລັດຖະກອນໃໝ່ ຂຶ້ນຢູ່ທີ່ສະໂມສອນໃຫຍ່ຂອງກອງບັນຊາການ ປກສ ເມືອງ. ໂດຍການເປັນປະທານ ແລະ ໃຫ້ກຽດເປີດຫົວບົດສອບເສັງຂອງ ທ່ານ ພອນສະຫວັນ ໄຊສົມພັນ ຮອງເຈົ້າເມືອງໆ ຫົງສາ, ມີຄະນະກຳມະການແຕ່ງຕັ້ງຮັບຜິດຊອບຂອງເມືອງ ແລະ ຜູ້ທີ່ຈະບັນຈຸເຂົ້າເປັນລັດຖະກອນໃໝ່ເຂົ້າຮ່ວມ.

ໃນການສອບເສັງຄັ້ງນີ້, ແມ່ນໃຊ້ຄຳຖາມແບບປາລາໄນ ແລະ ອັດຕາໄນ ລວມທັງໝົດ 41 ຂໍ້ ມີຢູ່ 3 ພາກຄື: ຄວາມຮູ້ທາງດ້ານກົດໝາຍລັດຖະກອນ, ການແຕ່ງເອກະສານທາງລັດຖະການ ແລະ ພາກຄວາມຮູ້ທົ່ວໄປ. ຊຶ່ງມີຜູ້ເຂົ້າຮ່ວມສອບເສັງທັງໝົດ 17 ຄົນ ຍິງ 10 ຄົນ ແລະ ໃຊ້ເວລາໃນການສອບເສັງ 2 ຊົ່ວໂມງເຕັ້ມ.

ສຳລັບຕົວເລກ ເມືອງຈະບັນຈຸເຂົ້າເປັນພະນັກງານລັດຖະກອນໃໝ່ນີ້, ມີ 1 ຕົວເລກ ເຊິ່ງຈະບັນຈຸເຂົ້າຫ້ອງການ ໂຄສະນາເມືອງ. ທັງນີ້, ກໍ່ເພື່ອເປັນການຄັດເລືອກຜູ້ທີ່ມີຄວາມຮູ້, ຄວາມສາມາດ ແລະ ມີຄຸນສົມບັດເຂົ້າເປັນລັດຖະກອນໃໝ່ຕາມຕົວເລກທີ່ລະບຸໄວ້ ແລະ ຮັບໃຊ້ໜ້າທີ່ວຽກງານໄດ້ເປັນຢ່າງດີ ແລະ ເພື່ອສ້າງເປັນພະນັກງານສຶບທອດໃນອະນາຄົດຕື່ມອີກ.

Editor: ກຳປານາດ ລັດຖະເຮົ້າ