ໃນຕອນເຊົ້າຂອງວັນທີ 19 ເມສາ 2018 ຜ່ານມານີ້, ຢູ່ທີ່ໂຮງຮຽນມູນລະປະຖົມ ບ້ານນາເລົາ ເມືອງວັງວຽງ, ແຂວງວຽງຈັນ. ໄດ້ມີພິທີມອບ-ຮັບໂຮງຮຽນມູນລະປະຖົມ ບ້ານນາເລົາ. ໂດຍການເຂົ້າຮ່ວມຂອງ ທ່ານ ຄໍາຜອງ ດວງວິໄລ ກໍາມະການພັກແຂວງ ເລຂາພັກເມືອງເຈົ້າເມືອງໆວັງວຽງ, ມີ ທ່ານ ໂຍຊົວ ຫົວໜ້າອຳນວຍການໂຮງຮຽນຄຣິດສະຕຽນໂກນວໍ ຈາກປະເທດ ສາທາລະນະລັດ ເກົາຫຼີ, ມີບັນດາທ່ານຮອງເຈົ້າເມືອງ, ຮອງຫົວຫນ້າຫ້ອງການສືກສາທິການ ແລະ ກິລາເມືອງ, ຫົວໜ້າກຸ່ມບ້ານ, ອຳນາດການປົກຄອງບ້ານ, ພໍ່ແມ່ປະຊາຊົນພາຍໃນບ້ານ, ນ້ອງນັກຮຽນໂຮງຮຽນມູນລະປະຖົມບ້ານນາເລົາ ແລະ ໂຮງຮຽນຄຣິດສະຕຽນໂກນວໍ ຈາກປະເທດ ສ ເກົາຫຼີ ເຂົ້າຮ່ວມຢ່າງພ້ອມພຽງ.

ທ່ານ ຄໍາດີ ນາມມະໄຊ ນາຍບ້ານໆນາເລົາ ໄດ້ຂຶ້ນຜ່ານບົດສະຫຼຸບ ການກໍ່ສ້າງໂຮງຮຽນມູນລະປະຖົມບ້ານນາເລົາ ວ່າ: ບ້ານນາເລົາ ແມ່ນບ້ານໜຶ່ງທີ່ນອນໃນ 63 ບ້ານໃນທົ່ວເມືອງວັງວຽງ ແລະ ທັງແມ່ນບ້ານດຽວທີ່ເປັນບ້ານທຸກຍາກ. ໃນເມື່ອກ່ອນນບ້ານນາເລົາ ແມ່ນຕັ້ງຢູ່ຝາກຝັ່ງແມ່ນ້ຳງາດ, ທາງທິດຕາເວັນອອກ ເຊິ່ງຫ່າງຈາກທາງເລກທີ 13 ເໜືອ ປະມານ 5 ກິໂລແມັດ. ເຫັນໄດ້ເຖິງພື້ນຖານໂຄງລ່າງໃນເມື່ອກ່ອນມີຄວາມຫຍຸ້ງຍາກພໍສົມຄວນ ເປັນຕົ້ນແມ່ນ: ຖະຫນົນຫົນທາງ,ເສັ້ນທາງ, ສຸກສະລາ ແລະ ດ້ານອື່ນໆ, ເຮັດໃຫ້ປະຊາຊົນບັນດາເຜົ່າພົບຄວາມຫຍຸ້ງຍາກໃນການເຂົ້າເຖິງຂອດບໍລິການ ຍ້ອນເຫັນໄດ້ສະພາບຄືດັ່ງກ່າວ ພັກ ແລະ ລັດຖະບານ ກໍ່ຄືອຳນາດການປົກຄອງໃນທຸກຂັ້ນຈຶ່ງໄດ້ສຸມທຶນຮອນເພື່ອຍົກຍ້າຍບ້ານນາເລົາ ມາຕັ້ງຢູ່ບ່ອນໃໝ່ ກໍ່ຄືບ້ານນາເລົາປະຈຸບັນ ໄດ້ວັນທີ 1 ມັງກອນ 2017. ເຊິ່ງມີຈຳນວນ 119 ຫຼັງຄາເຮືອນ, ມີປະຊາກອນທັງໝົດ 543 ຄົນ, ຍິງ 338 ຄົນ. ປະກອບມີ 3 ຊົນເຜົ່າ ຄື: ລາວລຸ່ມ, ຂະມຸ ແລະ ເຜົ່າມົ້ງ.

ເບື້ອງຕົ້ນ ໂຮງຮຽນມູນລະປະຖົມບ້ານນາເລົາ ແມ່ນ ມີ 1 ຫ້ອງ, ແອ້ມດ້ວຍຝາໄມ້ເຮ້ຍ, ມີຄູສອນ 1 ຄົນ, ຄູອາສາ 1 ຄົນ, ມີນັກຮຽນ 3 ຊັ້ນຮຽນ ປໍ1, ປໍ2, ແລະ ປໍ3 ເຊິ່ງລວມມີ ນັກຮຽນທັງໝົດ 50 ຄົນ, ຍິງ 32 ຄົນ. ດ້ວຍຫ້ອງຮຽນມີຄວາມຄັບແຄບ, ບໍ່ສາມາດທົນທານທຸກສະພາບອາກາດ ເຊິ່ງເປັນສາເຫດໜຶ່ງທີ່ສ້າງຄວາມລຳບາກ ແກ່ການຮຽນ-ການສອນ ດັ່ງນັ້ນ ຄະນະນຳຂອງເມືອງ ຈຶ່ງໄດ້ຈັດຫາງົບປະມານ ເພື່ອກໍ່ສ້າງພື້ນຖານໂຄງລ່າງຈຳນວນໜຶ່ງເປັນຕົ້ນ ຕັ້ງເສົາ ຈຳນວນ 5 ຫ້ອງຮຽນ ມີມູນຄ່າ 40 ລ້ານກີບ, ໂດຍນຳໃຊ້ທຶນພັດທະນາທ້ອງຖິ່ນ ປີ 2015-2016 ນອກຈາກນີ້, ກໍ່ຍັງໄດ້ຮັບທຶນຊ່ວຍເຫຼືອຈາກນິຕິບຸກຄົນ, ນັກທຸລະກິດ ທັງພາຍໃນ ແລະ ຕ່າງປະເທດ. ເປັນຕົ້ນແມ່ນສະມາຄົມໂຮງຮຽນເກົາຫຼີ ຄຣິດສະຕຽນໂກນວໍ ຊ່ວຍກໍ່ສ້າງໂຄງຫຼັງຄາ, ເພດານ, ກໍ່ຝາ, ທາສີ ແລະ ສ້າງຫ້ອງການຄູ 1 ຫ້ອງ ລວມມູນຄ່າທັງໝົດຈຳນວນ 185 ລ້ານກວ່າກີບ, ສ່ວນແຮງງານການກໍ່ສ້າງແມ່ນປະຊາຊົນພາຍໃນບ້ານເປັນຜູ້ຮ່ວມແຮງຮ່ວມໃຈກັນປະກອບສ່ວນຈັດຕັ້ງປະຕິບັດ, ການກໍ່ສ້າງແມ່ນໃຊ້ເວລາຢູ່ 02 ເດືອນ, ປະຈຸບັນໂຮງຮຽນຫຼັງດັ່ງກ່າວແມ່ນສຳເລັດ ຮ້ອຍສ່ວນຮ້ອຍ.

ໃນພິທີໃຫ້ກຽດຂື້ນມອບໂຮງຮຽນມູນລະປະຖົມບ້ານນາເລົາ ໂດຍແມ່ນ ທ່ານ ໂຍຊົວ ຫົວ ໜ້າອຳນວຍການໂຮງຮຽນຄຣິດສະຕຽນໂກນວໍ ຈາກປະເທດ ສາທາລະນະລັດ ເກົາຫຼີ ແລະ ກ່າວຮັບໂດຍ ທ່ານ ອ່ອນຈັນ ຫົວຫນ້າໂຮງຮຽນມູນລະປະຖົມບ້ານນາເລົາ. ໃຫ້ກຽດກ່າວມອບໃບຍ້ອງຍໍໂດຍແມ່ນ ທ່ານ ຄໍາຜອງ ດວງວິໄລ ກໍາມະການພັກແຂວງ ເລຂາພັກເມືອງເຈົ້າເມືອງໆວັງວຽງ ກ່າວຮັບໂດຍ ທ່ານ ໂຍຊົວ ຫົວໜ້າອຳນວຍການໂຮງຮຽນຄຣິດສະຕຽນໂກນວໍ ຈາກປະເທດ ສ ເກົາຫຼີ ພ້ອມທັງໃຫ້ກຽດ ເປີດແຖບຜ້າ.

ຕອນທ້າຍພິທີ ທ່ານ ຄໍາຜອງ ດວງວິໄລ ກໍາມະການພັກແຂວງ ເລຂາພັກເມືອງເຈົ້າເມືອງໆວັງວຽງ ກໍ່ໄດ້ໃຫ້ກຽດໂອ້ລົມ ແລະ ຊົມສິລະປະຈາກນັກຮຽນໂຮງຮຽນຄຣິດສະຕຽນໂກນວໍ ຈາກປະເທດ ສ ເກົາຫຼີ ແລະ ນ້ອງນັກຮຽນໂຮງຮຽນມູນລະປະຖົມບ້ານນາເລົາ ຕື່ມອີກ

Editor: ກຳປານາດ ລັດຖະເຮົ້າ