ກອງປະຊຸມເຝິກອົບຮົມກ່ຽວກັບການກະກຽມຈັດບຸນນິທັດສະການປື້ມ ປະຈຳປີ 2018 ໄດ້ຈັດຂຶ້ນໃນ ລະຫວ່າງ ວັນທີ 19-20 ເມສາ 2018 ທີ່ ຫ້ອງປະຊຸມໃຫຍ່ພະແນກສຶກສາທິການ ແລະ ກິລາແຂວງຄຳມ່ວນ. ພາຍໃຕ້ການເປັນປະທານຮ່ວມຂອງ ທ່ານ ນັນຕະໄຊ ອິນທະສອນ ຮອງຫົວໜ້າພະແນກສຶກສາທິການ ແລະ ກິລາແຂວງຄໍາມ່ວນ, ທ່ານນາງ ບົວພັນ ພານິດສະວົງ ຕາງໜ້າຈາກຫໍສະໝຸດແຫ່ງຊາດ, ທ່ານນາງ ສຸລະພີ ວິຣະວົງສໍ ຫົວໜ້າຫ້ອງການສະມາຄົມຮ່ວມນ້ຳໃຈກັບເດັກນ້ອຍລາວ ( ALC ) ພ້ອມດ້ວຍຄູອາຈານກວ່າ 40 ໂຮງຮຽນພາຍໃນເມືອງທ່າແຂກເຂົ້າຮ່ວມຢ່າງພ້ອມພຽງ.

ງານດັ່ງກ່າວແມ່ນຈະໄດ້ຈັດຂື້ນ ພາຍໃຕ້ຫົວຂໍ້ “ ເປີດໂລກ ເປີດໃຈ ເປີດປື້ມອ່ານ ເປີດຈິນຕະນາການ “ ເພື່ອເປັນການສົ່ງເສີມການອ່ານ, ການຂຽນ, ການພີມຈໍາໜ່າຍ ສື່ສິ່ງພີມພາຍໃນປະເທດ, ເຮັດໃຫ້ງານເປັນເວທີສົນທະນາ ການພົບປະແລກປ່ຽນ ລະຫວ່າງ ຜູ້ອ່ານ ແລະ ຜູ້ຂຽນ ເພື່ອສ້າງກິດຈະກໍາຕ່າງໆ ກ່ຽວກັບການອ່ານ, ການຂຽນ ໂດຍໃຫ້ມວນຊົນໄດ້ມີສ່ວນຮ່ວມ ແລະ ໄດ້ມີຄວາມຮູ້ ຄວາມເຂົ້າໃຈກ່ຽວກັບປື້ມອ່ານ ຄາດວ່າຈະມີຄົນໃຫ້ຄວາມສົນໃຈຈາກສັງຄົມຈໍານວນຫລາຍ, ບຸນນິທັດສະການປື້ມໃນປີນີ້ ຈະເອົາໃຈໃສ່ເຄື່ອນໄຫວຊຸກຍູ້ສົ່ງເສີມ ຊາວໜຸ່ມ-ເຍົາວະຊົນ, ອະນຸຊົນ ແລະນັກຮຽນໃນໂຮງຮຽນ ເພື່ອເປັນການປູກຂິດສໍານຶກໃນການອ່ານ ການຈັດກອງປະຊຸມເທື່ອນີ້ຈະໄດ້ມີການວາງແຜນການຈັດຕັ້ງການວາງສະແດງປື້ມຈະເວົ້າເຖິງຄວາມສຳຄັນ ແລະ ຄຸນຄ່າ ຂອງປື້ມທີ່ມີຕໍ່ການພັດທະນາຂອງພູມປັນຍາ ແລະ ແນວຄວາມຄິດມະນຸດ.

Editor: ກຳປານາດ ລັດຖະເຮົ້າ