ກອງປະຊຸມສະຫຼຸບວຽກງານ ຂອງກອງພັນປ້ອງກັນເຄື່ອນທີ່ ແຂວງຊຽງຂວາງ ປະຈໍາປີ 2017 ແລະ ວາງທິດທາງແຜນການປີ 2018 ໄດ້ຈັດຂື້ນໃນວັນທີ 20 ເມສາ 2018 ຢູ່ທີ່ສະໂມສອນ ປກສ ແຂວງຊຽງຂວາງ ໂດຍໃຫ້ກຽດເປັນປະທານຂອງທ່ານ ພັນໂທ ຄຳເມີງ ພິມມະວົງ, ຫົວໜ້າກອງພັນປ້ອງກັນເຄື່ອນທີ່, ເຂົ້າຮ່ວມກອງປະຊຸມໃນຄັ້ງນີ້ມີທ່ານ ພັນໂທ ຄຳເພັດ ສໍສຳພັນໄຊ ຮອງກອງບັນຊາການ ປກສ ແຂວງ, ມີບັນດາຄະນະພັກຄະນະກອງບັນຊາການ ພ້ອມດ້ວຍພະນັກງານນັກຮົບ ແລະ ແຂກຖືກເຊີນເຂົ້າຮ່ວມ.
ໃນວາລະດຳເນີນກອງປະຊຸມໄດ້ພ້ອມກັນສັງເກດຕີລາຄາຄືນ ກ່ຽວກັບຜົນການຈັດຕັ້ງປະຕິບັດໃນໄລຍະ 1 ປີຜ່ານມາ ເຫັນວ່າ ຄະນະພັກຄະນະກອງພັນປ້ອງກັນເຄື່ອນທີ່ໄດ້ເອົາໃຈໃສ່ໃນການສຶກສາອົບຮົມການເມືອງນຳພາແນວຄິດ ໃຫ້ສະມາຊິກພັກ - ພະນັກງານ ນັກຮົບ ໄດ້ເປັນປົກກະຕິ ເຮັດໃຫ້ພະນັກງານນັກຮົບມີຄວາມອຸ່ນອຽນທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ - ປະຕິບັດລະບຽບກົດໝາຍຂອງລັດ ກໍ່ຄືຂອງກຳລັງ ປກສ ຢ່າງເຂັ້ມງວດພາຍໄຕ້ການຊີ້ນຳ - ນໍາພາຂອງຂັ້ນເທີງ. ໃນນັ້ນ ກອງພັນປ້ອງກັນເຄື່ອນທີ່ ໄດ້ກາຍເປັນໜື່ງໃນກຳລັງຫຼັກແຫຼ່ງຂອງວຽກງານປ້ອງກັນຄວາມສະຫງົບທາງດ້ານສັງຄົມພາຍໃນແຂວງ ໂດຍສະເພາະແມ່ນການກວດກາລາດຕາເວັນ ຕາມຈຸຫຼໍ່ແຫຼມຕາມເສັ້ນທາງ ແລະ ສະຖານທີ່ສຳຄັນຕ່າງໆໄດ້ 149 ຄັ້ງ, ສົມທົບກັບຫ້ອງທີ່ກ່ຽວຂ້ອງແກ້ໄຂລາຍຄະດີ 6 ຄັ້ງ, ປ້ອງກັນວັນບຸນທີ່ສໍາຄັນຂອງພັກ-ຂອງຊາດ, ງານບຸນປະເພນີຂອງຊົນເຜົ່າ ແລະ ປ້ອງກັນແຂກມີ 44 ຄັ້ງ, ແກ້ໄຂວຽກນຳກະສິກຳແຂວງ 4 ຄັ້ງ, ເອົາກໍາລັງໄປແກ້ໄຂພວກອາລະວາດຕີກັນຢູ່ຕາມເສັ້ນທາງ, ຕາມຮ້ານບັນເທີງຕ່າງໆໄດ້ 6 ຄັ້ງ, ເອົາກໍາລັງໄປວາງພວງມາລາໄດ້ 13 ຄັ້ງ, ເຝິກຊ້ອມວິຊາສະເພາະໃຫ້ກຳລັງຢ່າງເປັນປົກກະຕິ 1 ເດືອນ ຕໍ່ 2 ຄັ້ງ, ພ້ອມນີ້ ໄດ້ເອົາໃຈໃສ່ບູລະນະຄ້າຍຄູ ສ້າງຫ້ອງນ້ຳໄດ້ 3 ຫ້ອງ ແລະ ຍັງໄດ້ເອົາໃຈໃສ່ເພີ່ມພູນຜະລິດຜົນ ເປັນຕົ້ນແມ່ນ ປູກຝັງລ້ຽງສັດ ມີງົວຈຳນວນ 36 ໂຕ, ແບ້ 23 ໂຕ ມາຮອດປີ 2017 ມີເງິນກອງທືນພາຍໃນຄ້າຍ ທັງໝົດ 138.435.000 ກີບ.
ໃນໂອກາດດຽວກັນນີ້ທ່ານ ພັນໂທ ຄຳເພັດ ສໍສຳພັນໄຊ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ແລະ ຍັງໄດ້ເນັ້ນໜັກໃຫ້ບັນດາສະຫາຍ ຈົ່ງພ້ອມກັນສືບຕໍ່ປັງປຸງກຳລັງໃຫ້ມີຄວາມເຕີບໃຫຍ່ເຂັ້ມແຂງມີຄວາມສຳນິສຳນານໃນການປະຕິບັດໜ້າທີ່ວຽກງານວິຊາສະເພາະຢ່າງມີປະສິດທິຜົນສູງ.
Editor: ປກສ ແຂວງຊຽງຂວາງ
