ໃນຕອນເຊົ້າຂອງວັນທີ 19 ເມສາ 2018 ຜ່ານມານີ້, ຢູ່ທີ່ໂຮງຮຽນມູນລະປະຖົມບ້ານນາເລົາ ເມືອງວັງວຽງ ແຂວງວຽງຈັນ.ໄດ້ມີພິທີມອບ-ຮັບໂຮງຮຽນມູນລະປະຖົມບ້ານນາເລົາ. ໂດຍການເຂົ້າຮ່ວມຂອງທ່ານ ຄໍາຜອງ ດວງວິໄລ, ກໍາມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີທ່ານ ໂຍຊົວ ຫົວໜ້າອຳນວຍການໂຮງຮຽນ ຄຣິດສະຕຽນໂກນວໍ ຈາກປະເທດ ສ ເກົາຫຼີ, ມີບັນດາທ່ານຮອງເຈົ້າເມືອງ, ຮອງຫົວຫນ້າຫ້ອງການສືກສາທິການ ແລະ ກິລາເມືອງ, ຫົວໜ້າກຸ່ມບ້ານ, ອຳນາດການປົກຄອງບ້ານ, ພໍ່ແມ່ປະຊາຊົນພາຍໃນບ້ານ, ນ້ອງນັກຮຽນໂຮງຮຽນມູນລະປະຖົມບ້ານນາເລົາ ແລະ ໂຮງຮຽນ ຄຣິດສະຕຽນໂກນວໍ ຈາກປະເທດ ສ ເກົາຫຼີ ເຂົ້າຮ່ວມຢ່າງພ້ອມພຽງ.
ທ່ານ ຄໍາດີ ນາມມະໄຊ ນາຍບ້ານໆນາເລົາ ໄດ້ຂຶ້ນຜ່ານບົດສະຫຼຸບ ການກໍ່ສ້າງໂຮງຮຽນມູນລະປະຖົມບ້ານ
ນາເລົາວ່າ: ບ້ານນາເລົາ ແມ່ນບ້ານໜຶ່ງທີ່ນອນໃນ 63 ບ້ານໃນທົ່ວເມືອງວັງວຽງ ແລະ ທັງແມ່ນບ້ານດຽວທີ່ເປັນບ້ານທຸກຍາກ. ເບື້ອງຕົ້ນ ໂຮງຮຽນມູນລະປະຖົມບ້ານນາເລົາ ແມ່ນມີ 1 ຫ້ອງ, ແອ້ມດ້ວຍຝາໄມ້ເຮຍ, ມີຄູສອນ 1 ຄົນ,ຄູອາສາ 1 ຄົນ, ມີນັກຮຽນ 3 ຊັ້ນຮຽນ ປໍ1 ປໍ2 ປໍ3 ເຊິ່ງລວມມີ ນັກຮຽນທັງໝົດ 50 ຄົນ, ຍິງ 32 ຄົນ. ດ້ວຍຫ້ອງຮຽນມີຄວາມຄັບແຄບ, ບໍ່ສາມາດທົນທານທຸກສະພາບອາກາດ ເຊິ່ງເປັນສາເຫດໜຶ່ງທີ່ສ້າງຄວາມລຳບາກ ແກ່ການຮຽນ-ການສອນ ດັ່ງນັ້ນ ຄະນະນຳຂອງເມືອງ ຈຶ່ງໄດ້ຈັດຫາງົບປະມານ ເພື່ອກໍ່ສ້າງພື້ນຖານໂຄງລ່າງຈຳນວນ ໜຶ່ງເປັນຕົ້ນ ຕັ້ງເສົາ ຈຳນວນ 5 ຫ້ອງຮຽນ ມີມູນຄ່າ 40 ລ້ານກີບ, ໂດຍນຳໃຊ້ທຶນພັດທະນາທ້ອງຖິ່ນປີ 2015-2016 ນອກຈາກນີ້ ກໍ່ຍັງໄດ້ຮັບທຶນຊ່ວຍເຫຼືອຈາກນິຕິບຸກຄົນ, ນັກທຸລະກິດ ທັງພາຍໃນແລະຕ່າງປະເທດ. ເປັນຕົ້ນແມ່ນ ສະມາຄົມໂຮງຮຽນເກົາຫຼີ ຄຣິດສະຕຽນໂກນວໍ ຊ່ວຍກໍ່ສ້າງໂຄງຫຼັງຄາ, ເພດານ, ກໍ້ຝາ, ພາສີ ແລະ ສ້າງຫ້ອງການຄູ 1 ຫ້ອງລວມມູນຄ່າທັງໝົດຈຳນວນ 185 ລ້ານກວ່າກີບ, ສ່ວນແຮງງານການກໍ່ສ້າງແມ່ນປະຊາຊົນ
ພາຍໃນບ້ານເປັນຜູ້ຮ່ວມແຮງຮ່ວມໃຈກັນປະກອບສ່ວນຈັດຕັ້ງປະຕິບັດ ການກໍ່ສ້າງແມ່ນໃຊ້ເວລາຢູ່ 02 ເດືອນ ປະຈຸບັນໂຮງຮຽນຫຼັງດັ່ງກ່າວແມ່ນສຳເລັດ ຮ້ອຍສ່ວນຮ້ອຍ.
ໃຫ້ກຽດຂື້ນມອບໂຮງຮຽນມູນລະປະຖົມບ້ານນາເລົາ ໂດຍແມ່ນທ່ານ ໂຍຊົວ ຫົວໜ້າອໍານວຍການໂຮງຮຽນ ຄຣິດສະຕຽນໂກນວໍ ຈາກປະເທດ ສ ເກົາຫຼີ ແລະ ກ່າວຮັບໂດຍ ທ່ານ ອ່ອນຈັນ ຫົວຫນ້າໂຮງຮຽນມູນລະປະຖົມບ້ານນາເລົາ. ພ້ອມທັງໃຫ້ກຽດ ເປີດແຖບຜ້າ.

Editor:  ແຂວງວຽງຈັນ