ທິດຜ່ານມາ ພະແນກ ແຮງງານ ແລະ ສະຫວັດດີການ-ສັງຄົມ ແຂວງບໍ່ແກ້ວ ໄດ້ມອບໃບຢັ້ງຢືນໃຫ້ແກ່ຜູ່ເຂົ້າຝຶກອົບຮົມວິທີຖັກແສ່ວຜ້າຖົງ ເຜົ່າມູເຊີຂາວ ທີ່ບ້ານຫ້ວຍລົມ, ເມືອງຕົ້ນເຜີ້ງ ແຂວງບໍ່ແກ້ວ ຈຳນວນ 16 ຄົນ, ໂດຍໃຫ້ກຽດເປັນປະທານຂອງ ທ່ານ ແສງວອນ ບຸນເກີດ ຮອງຫົວໜ້າພະແນກ ແຮງງານ ແລະ ສະຫວັດດີການສັງຄົມແຂວງບໍ່ແກ້ວ ແລະ ໃຫ້ກຽດເຂົ້າຮ່ວມພິທີ ມີພະນັກງານກໍ່ສ້າງຮາກຖານບ້ານ ແລະ ອຳນາດການປົກຄອງບ້ານ ພະນັກງານວິຊາການ ພະແນກ ຮສສ ຂັ້ນແຂວງ ແລະ ຂັ້ນເມືອງ ມີຜູ່ເຂົ້າຮ່ວມ

ເພື່ອຢັ້ງຍືນຜົນສຳເລັດໃນການຈັດຕັ້ງປະຕິບັດ ໃນພິທີຍັງໄດ້ຮັບຟັງການຜ່ານບົດສະຫຼຸບລາຍງານການຈັດຕັ້ງປະຕິບັດຂອງໂຄງການຝຶກ ລາຍງານໂດຍ ທ່ານ ຄຳມ່ວນ ລໍມີໄຊ ຮອງຫົວໜ້າຫ້ອງການ ຮສສ ເມືອງຕົ້ນເຜີ້ງ ໄດ້ຍົກໃຫ້ເຫັນການຝຶກອົບຮົມວິທີຖັກແສ່ວຜ້າຖົງ ໄລຍະສັ້ນ 1 ເດືອນ, ເພື່ອປະກອບເປັນອາຊີບ ສາມາດ ສ້າງລາຍຮັບໃຫ້ແກ່ຕົນເອງ ແລະ ຄອບຄົວ ທັງເປັນພັດທະນາສີມື ໃນການຖັກແສ່ວຜ້າຖົງ ທີ່ເປັນເອກະລັກຂອງຊົນເຜົ່າມູເຊີຂາວ.

ໃນພິທີຍັງໄດ້ຮັບຟັງຄຳໂອ້ລົມຂອງ ທ່ານ ແສງວອນ ບຸນເກີດ ຮອງຫົວຫນ້າພະແນກແຮງງານ ແລະ ສະຫວັດດີການ-ສັງຄົມ ທ່ານໄດ້ເນັ້ນໜັກ ໃຫ້ແກ່ຜູ້ເຂົ້າຝືກ ເມື່ອຜ່ານການຝືກສີມືແຮງງານ ແລ້ວ ແມ່ນໃຫ້ມີຄວາມເອົາໃຈໃສ່ສືບຕໍ່ ນຳໄປຈັດຕັ້ງປະຕິບັດ ພ້ອມທັງສະເໜີໃຫ້ພະນັກງານກໍ່ສ້າງຮາກຖານ ແລະ ອຳນາດການປົກຄອງບ້ານຊ່ວຍສ້າງເງື່ອນໄຂ ພ້ອມທັງເປັນເຈົ້າການສົ່ງເສີມຊຸກຍູ້ ເສີມຂະຫຍາຍກຸ່ມຖັກແສ່ວຜ້າຖົງ ແລະ ຜະລິດອອກຈຳໜ່າຍສູ່ຕະຫລາດ ແລະ ສ້າງເປັນກອງທຶນເພື່ອພັດທະນາກຸ່ມຖັກແສ່ວໃຫ້ໄດ້ຫລາຍຂື້ນກວ່າເກົ່າ

Editor: ກຳປານາດ ລັດຖະເຮົ້າ