ໃນເມື່ອບໍ່ດົນນີ້ ຢູ່ທີ່ເດີ່ນໂຮງຮຽນປະຖົມສົມບູນ ບ້ານຄໍາປາແໜ, ເມືອງຈໍາພອນ ແຂວງສະຫວັນນະເຂດ ໄດ້ຈັດພິທີມອບ-ຮັບໂຮງຮຽນອະນຸບານຫຼັງໃໝ່ ເຊິ່ງໃຫ້ກຽດເປັນເຂົ້າຮ່ວມເປັນປະທານໂດຍທ່ານ ສັນຕິພາບ ພົມວິຫານ ກໍາມະການສູນກາງພັກ ເລຂາພັກແຂວງ ເຈົ້າແຂວງສະຫັວນນະເຂດ, ທ່ານນາງ ຫຼິງທອງ ແສງຕະວັນ ກໍາມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ, ມີບັນດາຮອງເຈົ້າເມືອງ, ຄະນະຮັບຜິດຊອບສູນສົ່ງເສີມອາຊີບຄົງທີ່ ແລະ ທໍາການຜະລິດແບບຍືນຍົງ, ຄູ-ອາຈານ, ນ້ອງນ້ອຍນັກຮຽນ ແລະ ອົງການຈັດຕັ້ງຂ້ັນບ້ານເຂົ້າຮ່ວມ.
ທ່ານ ສຸກະເສີມ ໂພທິສານ ປະທານກອງທຶນຊ່ວຍເຫຼືອເດັກດ້ອຍໂອກາດ ແຂວງສະຫວັນນະເຂດ ແລະ ທ່ານ ແກ້ວວົງຫວັນ ຈຸນລະມຸນຕີ ຮອງຫົວໜ້າຫ້ອງການສຶກສາ ແລະ ກິລາເມືອງ, ໄດ້ກ່າວຮັບໂຮງຮຽນຫຼັງໃໝ່ ໂດຍໄດ້ຮັບທຶນກໍ່ສ້າງຈາກ ກອງທຶນຊ່ວຍເຫຼືອເດັກດ້ອຍໂອກາດແຂວງສະຫວັນນະເຂດ ມູນຄ່າການກໍ່ສ້າງແມ່ນ: 150 ລ້ານກີບ, ເປັນອາຄານຖາວອນ ແລະ ມຸງດ້ວຍແຜນອາລູຊິ້ງ ມີລວງກ້ວາງ 8 ແມັດ, ລວງຍາວ 22 ແມັດ ມີ 2 ຫ້ອງຮຽນ, 1 ຫ້ອງການ, 1 ຫ້ອງນໍ້າ, ມີຈໍານວນໂຕະ 30 ຊຸດ, ໂຕະຄູ 2 ຊຸດ, ໂຕະຫ້ອງປະຊຸມ 8 ໜ່ວຍ, ຕັ່ງ 12 ໜ່ວຍ.

Editor: ນັກຂ່າວເມືອງຈຳພອນ