ເພື່ອປະຕິບັດຕາມ 3 ລັກສະນະ 5 ຫຼັກມູນການສຶກສາ, ແຜນພັດທະນາວຽກງານກິລາ-ກາຍະກຳ ແລະ ວຽກງານສິນລະປະ-ວັນນະຄະດີ ຂອງຫ້ອງການສຶກສາທິການ ແລະ ກິລາເມືອງ ແຕ່ນີ້ຮອດ ປີ 2020.
ໃນຕອນເຊົ້າມື້ນີ້ ທີ່ເມືອງຫີນເຫີບ ແຂວງວຽງຈັນ, ໄດ້ຈັດພິທີເປີດການແຂ່ງຂັນກິລາ ແລະ ສິລະປະ ວັນນະຄະດີ ນັກຮຽນມັດທະຍົມສຶກສາ ຄັ້ງທີ V ທົ່ວເມືອງຂື້ນ ຢູ່ທີ່ເດີ່ນກິລາຂອງເມືອງດັ່ງກ່າວ. ໂດຍການເປັນປະທານຂອງ ທ່ານ ຄໍາສອນ ຈັນທະລັງສີ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງຫີນເຫີບ, ໃຫ້ກຽດເຂົ້າຮ່ວມໂດຍ ທ່ານ ຄໍາຫຼ້າ ບຸນຍະສິນ ຄະນະປະຈໍາພັກເມືອງ ຮອງເລຂາພັກເມືອງ ປະທານກວດກາພັກລັດເມືອງຫີນເຫີບ, ມີຮອງຫົວໜ້າຫ້ອງການກິລາເມືອງ, ແຂກຖືກເຊີນ, ຄູອາຈານ ແລະ ນ້ອງໆນັກຮຽນທົ່ວເມືອງຫີນເຫີບເຂົ້າຮ່ວມ.
ທ່ານ ຄຳສອນ ຈັນທະລັງສີ ຫົວໜ້າຫ້ອງການສຶກສາທິການ ແລະ ກິລາ ເມືອງຫີນເຫີບ ລາຍງານການກະກຽມການຈັດການແຂ່ງຂັນໃນຄັ້ງນີ້ວ່າ : ການແຂ່ງຂັນກິລາ ແລະ ສິນລະປະ-ວັນນະຄະດີ ນັກຮຽນມັດທະຍົມສຶກສາທົ່ວເມືອງຫີນເຫີບໃນຄັ້ງນີ້ ເພື່ອເປັນສ້າງຂະບວນການຂໍ່ານັບຮັບຕ້ອນວັນສຳຄັນຕ່າງໆຂອງຊາດ ໃຫ້ມີຂະບວນຟົດຟື້ນມ່ວນຊື່ນ, ທັງເປັນການຄັດເລືອກນັກກິລາ ແລະ ນັກສິນລະປະຜູ້ມີພອນສະຫວັນດີເດັ່ນ ເປັນຕົວແທນໃຫ້ແກ່ເມືອງເຂົ້າຮ່ວມການແຂ່ງຂັນລະດັບແຂວງ ແລະ ພ້ອມທັງເປັນການຮັດແໜ້ນຄວາມສາມັກຄີ ແລກປ່ຽນບົດຮຽນເຊິ່ງກັນ ແລະ ກັນພາຍໃນເມືອງ.
ການແຂ່ງຂັນກິລາ ແລະ ສິນລະປະ-ວັນນະຄະດີ ນັກຮຽນມັດທະຍົມສຶກສາທົ່ວເມືອງຫີນເຫີບ ໃນຄັ້ງນີ້ມີທັງໝົດ 7 ໂຮງຮຽນທົ່ວເມືອງເຂົ້າຮ່ວມຄື : ມສ ຫີນເຫີບ, ມສ ຄອນແກ້ວ, ມສ ນາຊໍາ, ມຕ ວຽງຄຳ, ມຕ ປ່ອງຊ່ອງ, ມຕ ວັງຄີ, ມຕ ສົມສະນຸກ ແລະ ມຕ ຜາບ່ອງ.
ເຊິ່ງການແຂ່ງຂັນກິລາມີທັງໝົດ 5 ປະເພດຄື : ກິລາບານເຕະຊາຍ, ບານສົ່ງຍິງ-ຊາຍ, ກະຕໍ້ຊາຍ, ເປຕັງຍິງ-ຊາຍ ແລະ ກິລາແລ່ນ ໂດຍການແຂ່ງຂັນແຕ່ລະປະເພດແບ່ງເປັນ 2 ລຸ້ນຄື ມຕົ້ນ ແລະ ມປາຍ
ສຳລັບ ຂອງຂວັນລາງວັນໃນຄັ້ງນີ້ມີ:
-ກິລາບານເຕະ ຊະນະເລີດຈະໄດ້ຮັບຂັນລາງວັນ 1 ໜ່ວຍ ແລະ ເງິນລາງວັນ 600,000 ກີບ, ຮອງຊະນະເລີດ 500,000 ກີບ, ແລະ ອັນດັບ3 ຮັບ 400,000 ກີບ.
-ບານສົ່ງ ຊະນະເລີດຈະໄດ້ຮັບຂັນ 1 ໜ່ວຍ ແລະ ເງິນ 300,000 ກີບ, ຮອງຊະນະເລີດ 400,000 ກີບ ແລະ ອັນດັບ3 ຮັບ 300,000 ກີບ
-ກະຕໍ້ ຊະນະເລີດ ໄດ້ຮັບຂັນ ແລະ ເງິນລາງວັນ 400,000 ກີບ, ຮອງຊະນະເລີດ 300,000 ກີບ, ອັນດັບ3 ຮັບ 200,000 ກີບ.
-ເປຕັງ ຊະນະເລີດໄດ້ຮັບຂັນ ແລະ ເງິນລາງວັນ 400,000 ກີບ, ຮອງຊະນະເລີດ 300,000 ກີບ, ອັນດັບ3 ຮັບ 200,000 ກີບ
-ກິລາແລ່ນ ຊະນະເລີດໄດ້ຮັບເງິນລາງວັນ 300,000 ກີບ, ຮອງຊະນະເລີດ 200,000 ກີບ ແລະ ອັນດັບ3 ຮັບ 100,000 ກີບ.
ສຳລັບການປະກວດການແຂ່ງຂັນສິນລະປະ-ວັນນະຄະດີ ມີ 2 ປະເພດຄື : ບົດເພງ ແລະ ບົດຟ້ອນ ບົດຟ້ອນ ຊະນະເລີດຈະໄດ້ຮັບເງິນລາງວັນ 500,000 ກີບ, ຮອງຊະນະເລີດ 400,000 ກີບ, ອັນດັບທີ3 ຮັບ300,000 ກີບ ; ບົດເພງ ຊະນະເລີດ 300,000 ກີບ, ຮອງຊະນະເລີດ 200,000 ແລະ ອັນດັບ3 ຮັບ 100,000 ກີບ ; ກິດຈະກຳໃນຄັ້ງນີ້ແມ່ນຈະດຳເນີນໄປເປັນເວລາ 5 ວັນຈື່ງຈະອັດລົງ.

Editor: ພູເງິນ ບົວທອງ ນັກຂ່າວແຂວງວຽງຈັນອອນລາຍ