ກົມຮູບເງົາ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຈັດພິທີຖະແຫລງຂ່າວ ຜົນສໍາເລັດຂອງນ້ອງນັກຮຽນ ທີ່ສ້າງຜົນງານ ແລະ ຊື່ສຽງໃຫ້ແກ່ປະເທດຊາດ ໃນການແຂ່ງຂັນຮູບເງົາວີດີໂອເລື່ອງສັ້ນຢູ່ ປະເທດຍີ່ປຸ່ນ ແລະ ປະເທດຟີລີປິນ ຂື້ນໃນວັນທີ 27 ທັນວາ 2017 ນີ້ທີ່ກົມຮູບເງົາ ກະຊວງຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ, ໂດຍການເປັນປະທານຂອງ ທ່ານ ວິທູນ ສູນດາລາ ຫົວຫນ້າກົມຮູບເງົາ ພ້ອມດ້ວຍບັນດາ ແຂກທີ່ຖືກເຊີນ, ຄູ - ອາຈາກ, ນ້ອງນັກຮຽນ ແລະ ພາກສ່ວນກກ່ຽວຂ້ອງເຂົ້າຮ່ວມ.
ໂຄງການແຂ່ງຂັນຮູບເງົາວີດີໂອເລື່ອງສັ້ນຂອງນ້ອງນັກຮຽນມໍຕົ້ນ ແລະ ມໍປາຍ ເພື່ອຄັດເລືອກເອົາຮູບເງົາດີເດັ່ນ ເຂົ້າຮ່ວມແຂ່ງຂັນ ຮູບເງົາເດັກນ້ອຍສາກົນອາຊີ ຢູ່ປະເທດຍີ່ປຸ່ນ ສໍາລັບ ສປປລາວ, ແມ່ນໄດ້ເລີ່ມມາແຕ່ປີ 2009 ຕະຫຼອດໄລຍະ 9 ປີ ຂອງການເຂົ້າຮ່ວມແຂ່ງຂັນງານດັ່ງກ່າວ ມີບາງປີນ້ອງນັກຮຽນຂອງລາວເຮົາ ກໍສາມາດຍາດໄດ້ລາງວັນ ແລະ ສໍາລັບປີ 2017 ນີ້ ກົມຮູບເງົາ ກໍໄດ້ມີການຈັດຕັ້ງປະຕິບັດໂຄງການຝຶກອົບຮົມ, ແຂ່ງຂັນ ໃຫ້ແກ່ນ້ອງນັກຮຽນ, ຊາວ ໜຸ່ມ - ເຍົາວະຊົນ ແລະ ໄດ້ຄັດເລືອກເອົາຮູບເງົາ 3 ເລື່ອງ, ຈາກ 51 ເລື່ອງ ທີ່ມາຈາກໂຮງຮຽນມັດທະຍົມມຕ່າງໆໃນທົ່ວປະເທດ, ຮູບເງົາທັງ 3 ເລື່ອງ ທີ່ໄດ້ເຂົ້າຮ່ວມການແຂ່ງຂັນທີ່ປະເທດຍີ່ປຸ່ນ ແມ່ນຮູບເງົາທີ່ມີຊື່ວ່າ: ຄູສາຍພັນໃຫມ່, ຮູບເງົາໂອກາດ ແລະ ຮູບເງົາສໍດໍາ, ຜ່ານການເຂົ້າຮ່ວມການແຂ່ງຂັນ ໃນວັນທີ 25 ພະຈິກ 2017 ຜ່ານມາ, ຮູບເງົາຂອງນ້ອງນັກຮຽນຈາກ ສປປ ລາວ ເຮົາ 2 ເລື່ອງ ສາມາດຍາດໄດ້ລາງວັນ ຮູບເງົາດີເດັ່ນ ( Award for Excellence ) ຄື: ຮູບເງົາເລື່ອງສັ້ນ ໂອກາດ ແລະ ຮູບເງົາເລື່ອງສັ້ນ ຄູສາຍພັນໃຫມ່ ໄດ້ຮັບລາງວັນຜູ້ຊະນະ ( Award Winner ). ໃນຂະນະດຽວກັນການແຂ່ງຂັນຮູບເງົາເດັກນ້ອຍອາຊຽນ ຄັ້ງທີ 1 ທີ່ໄດ້ຈັດຂື້ນທີ່ ປະເທດຟີລີປີນ ໃນລະຫວ່າງ ວັນທີ 27 – 30 ພະຈິກ 2017 ຜ່ານມາ ໃນຫົວຂໍ້ ພູມໃຈໃນຕົວເອງ, ຄຸນຄ່າຂອງຄອບຄົວ ແລະ ຮີດຄອງປະເພນີ. ຮູບເງົາຂອງນ້ອງນັກຮຽນລາວເຮົາ ທີ່ສົ່ງເຂົ້າປະກວດ ກໍໄດ້ຮັບລາງວັນ 2 ເລື່ອງຄື: ຮູບເງົາເລື້ອງສັ້ນ ທີມີຊື່ວ່າ: ແກະດໍາ ໄດ້ຮັບລາງວັນຊະນະເລີດປະເພດ ພູມໃຈໃນຕົວເອງ ແລະ ຮູບເງົາເລື້ອງສັ້ນ ຄູບ້ານນອກ ໄດ້ຮັບລາງວັນຊະນະເລີດ ປະເພດ ພູມໃຈໃນຄອບຄົວ
ພິເສດສໍາລັບ ນ້ອງນັກຮຽນທີ່ໄດ້ຮັບລາງວັນ ທັງ 4 ລາງວັນ ແມ່ນນ້ອງນັກຮຽນທີ່ມາຈາກ ໂຮງຮຽນ ຫ້ອມສະຫວັນ, ເມືອງຫາດຊາຍຟອງ ນະຄອນຫຼວງວຽງຈັນ, ພ້ອມນັ້ນໃນພິທິຂອງການຖະແຫລງຂ່າວໃນຄັ້ງນີ້, ກໍໄດ້ມີການມອບ ລາງວັນປະເພດຕ່າງໆ ໃຫ້ແກ່ນ້ອງ ທີ່ໄດ້ຮັບລາງວັນຈາກ ການແຂ່ງຂັນຮູບເງົາວີດີໂອເລື່ອງສັ້ນຢູ່ ປະເທດຍີ່ປຸ່ນ ແລະ ປະເທດຟີລີປິນ ນອກນັ້ນນ້ອງນັກຮຽນທັງ 4 ກຸ່ມ, ກໍໄດ້ສະແດງຄວາມຮູ້ສຶກ, ບອກເລົ່າປະສົບການ ແລະ ແຮງບັນດາໃຈໃນການພະລິດຮູບເງົາຂອງຕົ້ນ ທີ່ຍາດໄດ້ລາງວັນອັນມີກຽດ ແລະ ສ້າງຊື່ສຽງໃຫ້ແກ່ປະເທດຊາດ, ໃນຕອນທ້າຍຂອງພິທີ ຍັງໄດ້ມີການສາຍຮູບເງົາ ທີ່ໄດ້ຮັບລາງວັນ ໃຫ້ບັນດາແຂກທີ່ເຂົ້າຮ່ວມພາຍໃນງານໄດ້ຮັບຊົມອີກດ້ວຍ.
Editor: ກຳປານາດ ລັດຖະເຮົ້າ
