ທ້າຍອາທິດຜ່ານມາ ທີ່ເມືອງຊໍໃຕ້, ແຂວງຫົວພັນ ໄດ້ມີພີທີກວດກາຄຸນນະພາບ 100 ສ່ວນຮ້ອຍ, ພ້ອມທັງມອບ-ຮັບ ໂຮງຮຽນປະຖົມຫລັງໃຫມ່ ໃຫ້ບ້ານສົບເປັ້ງ, ກຸ່ມບ້ານລ່ອງແກ້ມ ຂື້ນຢ່າງເປັນທາງການ ເຊີ່ງໂຮງຮຽນດັ່ງກ່າວ ໂດຍການສະຫນັບສະຫນູນທຶນຈາກກອງທຶນຫລຸດຜ່ອນຄວາມທຸກຍາກ ເປັນອາຄານຖາວອນ 1 ຫລັງ, ມີຂະຫນາດ 8 ແມັດ ຄູນ 14 ແມັດ, ປະກອບມີ 2 ຫ້ອງຮຽນ, 2 ຫ້ອງນໍ້າ, ມີລະບົບເຟີນີເຈີ ຄົບຊຸດ ແລະ ມີລະບົບນໍ້າລິນ ໃຫ້ຊົມໃຊ້ເພີ່ມຕື່ມ. ອາຄານຮຽນຫລັງໃຫມ່ນີ້ ໄດ້ເລີ່ມລົງມືກໍ່ສ້າງມາ ຕົ້ນເດືອນກໍລະກົດ 2017 ຈົນມາເຖິງ ກາງເດືອນຕຸລາ 2017 ຈິ່ງສໍາເລັດ 100 ສ່ວນຮ້ອຍ, ລວມມູນຄ່າການກໍ່ສ້າງທັງໝົດ 200 ລ້ານກວ່າກີບ, ນອກນີ້ຍັງມີທຶນສົມທົບຂອງຊຸມຊົນປະກອບສ່ວນດ້ານແຮງງານປັບຫນ້າດິນ, ເຮັດຮົ້ວໂຮງຮຽນ, ຂົນສົ່ງວັດສະດຸ ແລະ ອື້ນໆ ຄິດໄລ່ເປັນມູນຄ່າ 8 ລ້ານກວ່າກີບ.

ຜ່ານການກວດກາ 100 ສ່ວນຮ້ອຍ ຂອງຄະນະກໍາມະການ ຄັ້ງນີ້, ເຫັນວ່າໂຄງການກໍ່ສ້າງໂຮງຮຽນປະຖົມບ້ານສົບເປັ້ງ ກໍ່ສ້າງຖືກຕ້ອງຕາມເຕັກນິກການອອກແບບ, ຖືກຕາມບໍລິມາດ ແລະ ສໍາເລັດກ່ອນເວລາ ທີ່ກໍານົດໄວ້. ບ້ານສົບເປັ້ງ ແມ່ນຫ່າງຈາກເທດສະບານເມືອງຊໍາໃຕ້ 25 ກິໂລແມັດ ປະກອບມີ 63 ຫລັງຄາເຮືອນ, ພົນລະເມືອງ 400 ກວ່າຄົນ, ຍິງ 200 ຄົນ, ເປັນຊົນເຜົ່າໄຕແດງ 100 ສ່ວນຮ້ອຍ. ປະຈຸບັນພາຍໃນບ້ານມີນັກຮຽນໄວເກນອາຍຸເຂົ້າຮຽນປະຖົມ ທັງໝົດ 41 ຄົນ, ຍິງ 24 ຄົນ, ມີ 5 ຊັ້ນຮຽນ ( ປ1-ປ5 ) ມີຄູ 2 ຄົນ, ຍິງ 1 ຄົນ

ທີມຂ່າວ ຖວທ ເມືອງຊໍາໄຕ້

Editor: ກຳປານາດ ລັດຖະເຮົ້າ