ສະໂມສອນໂຣຕາລີ ແຂວງໄອຈິ ປະເທດຍີ່ປຸ່ນ ໄດ້ຊ່ວຍສ້າງສິ່ງອຳນວຍຄວາມສະດວກອັນຈຳເປັນລວມມູນຄ່າ 140 ລ້ານກວ່າກີບ ໃຫ້ກັບໂຮງຮຽນປະຖົມບ້ານໂພນກາງ ເມືອງຫີນເຫີບ ແຂວງວຽງຈັນ ໃນນັ້ນ ມີລະບົບນ້ຳສະອາດ, ອ່າງລ້າງມືສຳລັບນັກຮຽນ ແລະ ຫ້ອງກຽມປະຖົມ ໂດຍມີພິທີ ມອບ-ຮັບ ໂຄງການດັ່ງກ່າວໃຫ້ກັບອຳນາດການປົກຄອງທ້ອງຖິ່ນ ໃນວັນທີ 8 ທັນວາ ໂດຍມີການເຂົ້າຮ່ວມຂອງ ທ່ານ ເອອັກຄະລັດຖະທູດປະເທດຍີ່ປຸ່ນປະຈຳລາວ ທ່ານ ທາເກຊີ ຮີກິຮາຣະ ແລະ ທ່ານເຈົ້າເມືອງ ເມືອງຫີນເຫີບ ທ່ານ ອຸດົງ ວົງສະຫວາດ ຄະນະຜູ້ແທນຈາກສະໂມສອນໂຣຕາລີ, ອຳນາດການປົກຄອງກ່ຽວຂ້ອງ ຄູອາຈານ ນັກຮຽນ ແລະ ພໍ່ແມ່ປະຊາຊົນບ້ານໂພນກາງເຂົ້າຮ່ວມ.
ໃນພິທີດັ່ງກ່າວ ຍັງມີການມອບ-ຮັບ ອຸປະກອນການສຶກສາ ແລະ ອຸປະກອນກິລາ ໃຫ້ກັບນັກຮຽນ ແລະ ຄູອາຈານຂອງໂຮງຮຽນດັ່ງກ່າວ ພ້ອມທັງມອບເບ້ຍໄມ້ໃຫ້ໝາກໃຫ້ພໍ່ແມ່ປະຊາຊົນ ແລະ ມີການປູກຕົ້ນໄມ້ ໂດຍແຂກທີ່ເຂົ້າຮ່ວມງານ ແລະ ວາງສີລາລຶກ ການສ້າງຫ້ອງກຽມປະຖົມຂອງໂຮງຮຽນປະຖົມບ້ານໂພນກາງ.

Editor: ຂ່າວສານປະເທດລາວ