ເຂົ້າຮ່ວມໃນພິທີເປີດນຳໃຊ້ອາຄານຫ້ອງອ່ານ ມີ ທ່ານ ພຸດ ສິມມາລາວົງ, ຮອງອະທິການບໍດີມະຫາໄລແຫ່ງຊາດ, ທ່ານ ດາສັກ ອຸເທນທະປັນຍາ, ຄະນະບໍດີ ສະຖາປັດຕະຍະກໍາສາດ , ທ່ານ ຄໍາຫລ້າ ດວງພະສຸກ, ປະທານບໍລິສັດ ດວງພະສຸກ ກໍ່ສ້າງຂົວທາງ ເຄຫະສະຖານ ແລະ ຊົນລະປະທານ ຈຳກັດຜູ້ດຽວ, ທ່ານ ກິມ ຈິນ ກູ ຕ່າງ ໜ້າຈາກອົງການ ໂລຕາຣີ ຄຣັບ, ທ່ານ ຢອມ ກິ ຕັກ, ຕາງໜ້າຈາກສູນສຶກສາວັດຖະນະນະທຳ ເກົາຫລີ-ລາວ, ພ້ອມດ້ວຍ ຄູ-ອາຈານ ແລະ ນັກສຶກສາທີ່ກ່ຽວຂ້ອງ.
ດັ່ງນັ້ນ ໃນວັນທີ 7 ທັນວາ 2017 ຜ່ານມາ ຢູ່ທີ່ຄະນະສະຖາປັດຕະຍະກຳສາດ ມະຫາວິທິຍາໄລແຫ່ງຊາດ ໄດ້ຈັດພິທິເປີດນຳໃຊ້ອາຄານຫ້ອງອ່ານ ທີ່ໄດ້ຮັບການຊ່ວຍເຫຼືອຈາກອົງການ ໂລຕາຣີ ສາກົນ ໂດຍຫ້ອງອ່ານດັ່ງກ່າວຖືວ່າເປັນໜຶ່ງກິດຈະກຳ ທີ່ຂື້ນກັບສູນການຮຽນຮູ້ ຂອງຄະນະສະຖາປັດຕະຍາກຳສາດ ມະຫາວິທະຍາໄລແຫ່ງຊາດ, ແລະ ໄດ້ເລີ່ມການກໍ່ສ້າງແຕ່ເດືອນ ຕຸລາ 2017 ເປັນຕົ້ນມາ ແລະ ໃຊ້ເວລາໃນການກໍ່ສ້າງ 50 ວັນແມ່ນສຳເລັດ ໂດຍແມ່ນບໍລິສັດ ດວງພະສຸກ ກໍ່ສ້າງຂົວທາງ ເຄຫະສະຖານ ແລະ ຊົນລະປະທານ ຈຳກັດຜູ້ດຽວ ເປັນຜູ້ຮັບເຫມົາກໍ່ສ້າງ ດ້ວຍມູນຄ່າ 44 ພັນກວ່າໂດລາສະຫະລັດ ໃນນັ້ນ ປະກອບ ມີ ອາຄານຫ້ອງອ່ານ ຊຶ່ງຈະເປັນສະຖານທີ່ໃຫ້ນັກສຶກສາສະຖາປັດຕະຍະກໍາສາດ ໄດ້ສຶກສາຮູ້ກ່ຽວກັບການອ່ານ ແລະ ສົ່ງເສີມທາງດ້ານໄອທີ ລວມທັງເປັນສະຕູດີໂອນຳອີກ ພ້ອມນັ້ນ ກໍ່ຍັງມີການກໍ່ສ້າງຫ້ອງຕື່ມອີກ.
ສູນການຮຽນຮູ້ ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງາດລາວ ໄດ້ຮັບການສ້າງຕັ້ງຂື້ນ ພາຍໃຕ້ການຮ່ວມມື ລະຫວ່າງ ຄະນະສະຖາປັດຕະຍະກຳສາດ ແລະ ອົງກອນ ໂລຕາຣີ ສາກົນ ປະຈຳໜ່ວຍ 3630(ສາມຫົກສາມສູນ) ເຂດ 12 ສ (ສິບສອງ ສ) ຈາກສາທາລະນະລັດ ເກົາຫລີ ແລະ ສູນວັດທະນາທໍາ ລາວ-ເກົາຫລີ ເຊິ່ງສູນການຮຽນຮູ້ດັ່ງກ່າວ ແມ່ນການກໍ່ສ້າງອາຄານຫ້ອງອ່ານ ຂອງຄະນະສະຖາປັດຕະຍະກຳສາດ ໃຫ້ກາຍເປັນສູນການຮຽນຮູ້ ເພື່ອຮັບໃຊ້ ແລະ ຕອບສະໜອງຄວາມຮຽກຮ້ອງຕ້ອງການ ໃນການຍົກລະດັບ ການຮຽນ-ການສອນ ໃຫ້ນັບມື້ນັບດີຂື້ນ ໂດຍສູນການຮຽນຮູ້ນີ້ ຖືເປັນສະຖານທີ່ສຳລັບອ່ານໜັງສື ເປັນສະຖານທີ່ອົບຮົມການຕົບແຕ່ງພາຍໃນ ແລະ ການປຸງແຕ່ງອາຫານ-ເຄື່ອງດື່ມ ການອອກແບບຕົບແຕ່ງຈັດດອກໄມ້ ລວມທັງການເຝິກອົບຮົມການຫໍ່ຫຸ້ມເຂົ້າໜົມເປັນຕົ້ນ.

Editor: ຕະວັນ ແສງສະຫວັນ