ເມື່ອບໍ່ດົນມານີ້ ຫ້ອງການຊາວໝຸ່ມເມືອງເຊໂປນ ໄດ້ຈັດພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກອະນຸຊົນ ແລະ ເຍົາວະຊົນທັນວາ ຂື້ນຢ່າງເປັນທາງການ ເພື່ອຕ້ອນຮັບ ແລະ ສະເຫລີມສະຫລອງວັນຊາດ 2 ທັນວາ ຄົບຮອບ 42 ປີ ເຊີ່ງໃນພິທີຄັ້ງນີ້ ໂດຍການເປັນປະທານ ແລະ ເປັນສັກຂີພະຍານໃນການຮັບເອົາມະຫາຊົນກ້າວໜ້າເຂົ້າເປັນສະມາຊິກອະນຸຊົນ ແລະ ເຍົາວະຊົນ ຂອງ ທ່ານ ບຸນມາ ໄຊຍະກູລາງ ຮອງເລຂາພັກເມືອງ ປະທານແນວລາວສ້າງຊາດເມືອງເຊໂປນ, ທັງເປັນຜູ້ຊີ້ນຳອົງການຈັດຕັ້ງມະຫາຊົນ, ມີ ທ່ານນາງ ເພັດສະໝອນ ພິລາວັນ ກໍາມະການພັກເມືອງ, ເລຂາຄະນະບໍລິຫານງານຊາວໝຸ່ມເມືອງເຊໂປນ, ມີບັນດາຄູອາຈານ ນ້ອງນັກຮຽນທີ່ມາຈາກໂຮງຮຽນປະຖົມອຸດົມສຸກ, ປະຖົມໂພນມ່ວງ ແລະ ໂຮງຮຽນປະຖົມທ່າໂຂ່ງ ໃນນັ້ນຈຳນວນເຍົາວະຊົນ 37 ຄົນ, ຍິງ 20 ຄົນ ແລະ ອານຸຊົນ 57 ຄົນ ,ຍິງ 38 ຄົນ

ໃນພິທີແມ່ນໄດ້ມີການມອບແພສີແດງ ແລະ ແພສີຟ້າໃຫ້ສະມາຊິກເຍົາວະຊົນທັນວາ ແລະ ອະນູຊົນ ໂດຍເປັນກຽດມອບແພໃນຄັ້ງນີ້ໂດຍ ທ່ານ ບຸນມາ ໄຊຍະກຸລາງ ປະທານແນວລາວສ້າງຊາດເມືອງ ພ້ອມດ້ວຍ ທ່ານນາງ ເພັດສະຫມອນ ພິລາວັນ ເລຂາຊາວໝຸ່ມເມືອງ ແລະ ຄູອາຈານເປັນຜູ້ຄ້ອງແພໃນຄັ້ງນີ້. ພາຍຫລັງສໍາເລັດການມັດແພ ແກ່ອະນຸຊົນ ແລະ ເຍົາວະຊົນ ໃນຕອນທ້າຍພິທີ ທ່ານ ບຸນມາ ໄຊຍະກຸລາງ ຍັງໄດ້ໃຫ້ກຽດມີຄຳເຫັນໂອລົມຕໍ່ລູກຫລານສະມາຊິກເຍົາວະຊົນ ແລະ ອະນຸຊົນ ຈົ່ງພ້ອມກັນເອົາໃຈໃສ່ໃນການສຶກສາຮໍ່າຮຽນ, ປະຕິບັດກົດລະບຽບຂອງເຍົາວະຊົນ ແລະ ອານຸຊົນຢ່າງເຂັ້ມງວດ,ຕັງຫນ້າຝຶກຝົນຫລໍ່ຫລອມຕົນເອງ ໃຫ້ເປັນຄົນດີ ມີລະບຽບວິໄນ, ມີຄຸນສົມບັດມາລະຍາດທີ່ດີ ປະຕິບັດໃຫ້ໄດ້ຕາມຄໍາຂວັນ 6 ຮັກ 3 ຊັງ ເພາະວ່າເດັກນ້ອຍໃນມື້ນີ້ ຄືຜູ້ໃຫຍ່ໃນມື້ໜ້າ ເປັນຫນໍ່ແຫນງຂອງຊາດ ເພື່ອປະກອບສ່ວນສໍາຄັນໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຮຸ່ງເຮືອງສີວິໄລ.

Editor: ກຳປານາດ ລັດຖະເຮົ້າ