ເມື່ອບໍ່ດົນມານີ້ ທີ່ພິພິທະພັນ ອະນຸສອນສະຖານ ປະທານສຸພານຸວົງ ນະຄອນຫລວງວຽງຈັນ ຄະນະບໍລິຫານງານ ຊາວຫນຸ່ມປະຊາຊົນ ປະຕິວັດລາວ ເມືອງໄຊເສດຖາ ໄດ້ຈັດພິທີຮັບເອົາມະຫາຊົນຜູ້ກ້າວຫນ້າ ເຂົ້າເປັນສະມາຊິກເຍົາວະຊົນ-ອະນຸຊົນ ທົ່ວເມືອງໄຊເສດຖາ 40 ໂຮງຮຽນ ມີ ຈໍານວນທັງໝົດ 2.289 ນ້ອງ, ຍິງ 1.164 ນ້ອງ ແລະ ໃນນັ້ນ ມີສະມາຊິກເຍົາວະຊົນ ຈໍານວນ 1.301 ນ້ອງ, ຍິງ 654 ນ້ອງ ແລະ ອະນຸຊົນ ຈໍານວນ 988 ນ້ອງ, ຍິງ 510 ນ້ອງ.

ພິທີຮັບ ເອົາສະມາຊິກເຍົາວະຊົນທັນ ຜູ້ກ້າວຫນ້າ ຄັ້ງນີ້ ເຂົ້າຮ່ວມມີ ທ່ານ ໄຊຍະບັດ ຊຸມມະນີວົງ ຮອງເລຂາຄະນະບໍລິຫານງານ ຊາວຫນຸ່ມນະຄອນຫລວງວຽງຈັນ, ມີ ທ່ານ ທະວີໄຊ ເໝົາຊົມພູ ຮອງເລຂາພັກເມືອງ, ຮອງເຈົ້າເມືອງໄຊເສດຖາ, ທ່ານ ວິໄລທອງ ແກ້ວມະນີວົງ ຮັກສາການຫົວຫນ້າພະແນກອະນຸສອນສະຖານ ປະທານສຸພານຸວົງ, ພ້ອມນີ້ ຍັງມີຄະນະບໍລິຫານງານ ຊາວຫນຸ່ມນະຄອນຫລວງ, ຄະນະບໍລິຫານງານ ຊາວຫນຸ່ມເມືອງໄຊເສດຖາ ຄູອາຈານ ແລະ ສະມາຊິດເຍົາວະຊົນທັນວາ ແລະ ອະນຸຊົນ ເຂົ້າຮ່ວມ ຢ່າງພ້ອມພຽງ.

ຈຸດປະສົງ ໃນການຮັບເອົາສະມາຊິກເຍົາວະຊົນທັນວາ ຄັ້ງນີ້ ເພື່ອເປັນການສ້າງຂະບວນການຂໍ່ານັບຮັບຕ້ອນວັນສ້າງຕັ້ງກອງເຍົາວະຊົນທັນວາ ຄົບຮອບ 62 ປີ, ວັນຊາດ 2 ທັນວາ ຄົບຮອບ 42 ປີ, ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 97 ປີ, ແລະ ວັນສໍາຄັນອື່ນໆ ຂອງຊາດ. ໃຫ້ເປັນຂະບວນການຟົດຟື້ນ. ໃນພິທີຍັງໄດ້ມີການຝູກແພສີແດງ ໃຫ້ແກ່ສະມາຊິກເຍົາວະຊົນ ແລະ ແພສີຟ້າ ແກ່ສະມາຊິກອະນຸຊົນ.

Editor: ກຳປານາດ ລັດຖະເຮົ້າ