ວັນທີ 14 ພະຈິກ 2017 ຜ່ານມານີ້, ເມືອງຊຳໃຕ້ ແຂວງຫົວພັນ ໄດ້ຈັດພິທີກວດກາ 100% ແລະ ມອບ-ຮັບໂຮງຮຽນປະຖົມຫຼັງໃໝ່ ໃຫ້ຄຸ້ມຄັງໝ້ຽງ, ບ້ານພູແລ, ກຸ່ມບ້ານກະສອນ ຂື້ນເປັນທາງການ. ໂດຍພາຍໃຕ້ການເປັນປະທານຂອງ ທ່ານ ມີໄຊ ພອນທະວີສຸກ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງຊໍາໃຕ້, ເປັນກຽດເຂົ້າຮ່ວມຂອງ ທ່ານ ບຸນຍອດ ນະຕິກຸນ ກຳມະການພັກເມືອງເລຂາພັກກຸ່ມບ້ານກະສອນ, ມີຜູຕາງໜ້າຈາກບໍລິສັດ, ຈາກ ທລຍ ເມືອງ, ກຸ່ມບ້ານ ແລະ ອຳນາດການປົກຄອງບ້ານ ແລະ ປະຊາຊົນເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ບາຈົ່ງ ຮອງນາຍ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດໂຄງການຍ່ອຍທືນ ທລຍ ( ກອງທືນຫຼຸດຜ່ອນຄວາມທຸກຍາກ) ຮອບວຽງທີ່ 14 ສະໜັບສະໜູນ. ຄຸ້ມບ້ານຄັງໝ້ຽງ ຂື້ນກັບບ້ານພູແລ, ຕັ້ງຫ່າງຈາກເທດສະບານເມືອງຊຳໃຕ້ 20 ກິໂລແມັດ, ປະກອບມີ 50 ຫຼັງຄາເຮືອນ, ມີ 60 ຄອບຄົວ, ມີພົນລະເມືອງ 377 ຄົນ, ຍິງ193 ຄົນ, ເປັນເຜົ່າມົ້ງ100%, ປະຈຸບັນ ພາຍໃນບ້ານມີນັກຮຽນໃນເກນອາຍຸເຂົ້າໂຮງຮຽນປະຖົມທັງໝົດ 86 ຄົນ, ຍິງ 44 ຄົນ, ມີ 5 ຊັ້ນຮຽນແຕ່ຊັ້ນ ປ 1 ເຖິງ ຊັ້ນ ປ 5, ມີຄູສອນ 3 ຄົນ, ຍິງ 1 ຄົນ, ໃນໄລຍະຜ່ານບ້ານໄດ້ປຸກສ້າງອາຄານຮຽນແບບຊົ່ວຄາວ, ມາໃນປີ 2017 ນີ້ ທາງກອງທືນຫຼຸດຜ່ອນຄວາມທຸກຍາກ (ທລຍ)ໄດ້ໃຫ້ທືນສະໜັບສະໜູນການກໍ່ສ້າງອານຮຽນຖານວອນ 1ຫຼັງ, ຂະໜາດ 8 × 14 ແມັດ. ປະກອບມີ 2 ຫ້ອງຮຽນ ແລະ ຫ້ອງນໍ້າ 2 ຫ້ອງ, ມີລະບົບເຟີນີເຈີຄົບຊຸດ ແລະ ມີລະບົບນໍ້າລີນ.

ອານຄານຮຽນຫຼັງໃໝ່ນີ້ ໄດ້ເລີ່ມລົງມືກໍ່ສ້າງມາແຕ່ວັນທີ 28 ມີຖຸນາ ຫາ 28 ຕຸລາ 2017 ສຳເລັດ 100% ລວມມູນຄ່າການກໍ່ສ້າງທັງໝົດ 224 ລ້ານກ່ວາກີບ. ນອກນີ້, ຍັງມີທືນຊຸມຊົນປະກອບສ່ວນດ້ານແຮງງານປັບໜ້າດີນ, ເຮັດຮົ້ວໂຮງຮຽນ, ຂົນສົ່ງວັດສະດຸ ແລະ ອື່ນໆ ຄິດໄລ່ເປັນມູນຄ່າ 16 ລ້ານກ່ວາກີບ. ໂດຍແມ່ນບໍລິສັດ ສີຈະເລີນກໍ່ສ້າງ ເປັນຜູ້ຮັບເໝົາ. ຫຼັງຈາກນັ້ນໃນພິທີຍັງໄດ້ພ້ອມກັນປະກອບຄຳຄິດຄຳເຫັນເພື່ອເປັນບົດຮຽນໃນຕໍ່ໜ້າ. ຜ່ານການກວດກາ100% ຂອງຄະນະກຳມະການຄັ້ງນີ້ ເຫັນວ່າໂຄງການກໍ່ສ້າງໂຮງຮຽນປະຖົມແຫ່ງນີ້ ເຫັນມີການກໍ່ສ້າງຖຶກຕ້ອງຕາມເຕັກນິກອອກແບບ, ຖຶກຕາມບໍລິມາດ ແລະ ທັນກັບເວລາທີ່ກໍານົດໄວ້. ຫຼັງຈານັ້ນ ທ່ານ ສີທັນ ໄຊແສນຄໍາ ອຳນວຍການບໍລິສັດ ສີຈະເລີນກໍ່ສ້າງ ກຳກັດ ໄດ້ມີຄຳເຫັນ ແລະ ກ່າວມອບໃຫ້ຫ້ອງການສຶກສາທິການ ແລະ ກິລາເມືອງຊໍາໃຕ້ ເພື່ອມອບຕໍ່ໃຫ້ບ້ານ ແລະ ໂຮງຮຽນເປັນຜູ້ປົກປັກຮັກສາ ແລະ ນຳໃຊ້ໃຫ້ເກີດປະໂຫຍດສູງສຸດ.

ຂອບໃຈ ນັກຂ່າວ ຈາກຫ້ອງການ ຖວທ ເມືອງຊໍາໃຕ້

Editor: ກຳປານາດ ລັດຖະເຮົ້າ