ໃນສົກຮຽນ 2017 -2018 ນີ້ ບໍລິສັດ ເບຍລາວ ໄດ້ໃຫ້ທຶນການສຶກສາແກ່ນັກສຶກສາ ມະຫາວິທະຍາໄລຈໍາປາສັກ ຈຳນວນ 40 ທຶນ ເປັນເງິນ 118 ລ້ານກີບ ແລະ ນັກສຶກສາ ວິທະຍາໄລຄູປາກເຊ ຈຳນວນ 20 ທຶນ ເປັນເງິນ 64 ລ້ານກີບ. ພິທີມອບຮັບທຶນການສຶກສາດັ່ງກ່າວ ຈັດຂຶ້ນທີ່ ມະຫາວິທະຍາໄລຈຳປາສັກ ໃນເມື່ອບໍ່ດົນນີ້. ໃຫ້ກຽດມອບໂດຍ ທ່ານ ບຸນກັນ ກຸລະບຸດ ຜູ້ອຳນວຍກນຝ່າຍປະຊາສຳພັນ ແລະ ກິດຈະກຳເພື່ອສັງຄົມ ບໍລິສັດ ເບຍລາວ, ຮັບແມ່ນທ່ານ ພູໂຂງ ອິນທະປັນຍາ ຮັກສາການຫົວໜ້າຫ້ອງການວິຊາການ ມະຫາວິທະຍາໄລຈຳປາສັກ ແລະ ທ່ານ ພອນ ພູວັນໂນ ຜູ້ອຳນວຍການວິທະຍາໄລຄູປາກເຊ. ມີຄະນະຮັບຜິດໂຄງການໃຫ້ທຶນການສຶກສາ,ພະນັກງານຄູອາຈານ ແລະ ນັກສຶກສາທີ່ໄດ້ຮັບທຶນເຂ້າຮ່ວມ. ທ່ານ ບຸນກັນ ກຸລະບຸດ ຜູ້ອຳນວຍການຝ່າຍປະຊາສຳພັນ ແລະ ກິດຈະກຳເພື່ອສັງຄົມ ບໍລິສັດ ເບຍລາວ ກ່າວວ່າ: ບໍລິສັດ ເບຍລາວ ໄດ້ໃຫ້ທຶນການສຶກສາແກ່ສະຖາບັນການສຶກສາ 7 ສະຖາບັນທົ່ວປະເທດເລີ່ມແຕ່ປີ 2010 ເປັນຕົ້ນມາ, ມີຜູ້ໄດ້ຮັບທຶນການສຶກສາໄປແລ້ວ 2.064 ຄົນ. ເປັນເງິນທັງໝົດ 5 ຕື້ກ່ວາກີບ.ໃນນັ້ນສຳລັບສົກຮຽນ 2017 - 2018 ມີ: 330 ທຶນ ເປັນເງິນ 1 ຕື້ກ່ວາກີບ. ຊຶ່ງປະກອບມີ ມະຫາວິທະຍາໄລແຫ່ງຊາດ, ມະຫາວິທະຍາໄລສຸພານຸວົງ,ມະຫາວິທະຍາໄລສະຫວັນນະເຂດ,ມະຫາວິທະຍາໄລຈຳປາສັກ,ວິທະຍາໄລຄູສະຫວັນນະເຂດ,ວິທະຍາໄລຄູປາກເຊ ແລະ ສະຖາບັນວິຈິດສິນແຫ່ງຊາດ. .
ແຕ່ສຳລັບມະຫາວິທະຍາໄລຈຳປາສັກໄດ້ຮັບທຶນປີນີ້ເປັນປີທີ 8 ; ສ່ວນວິທະຍາໄລຄູເປັນປີທີ 4 ທັງປີນີ້. ທຶນການສຶກສາທີ່ບໍລິສັດເບຍລາວມອບໃຫ້ນັກສຶກສາແຕ່ລະສະຖາບັນ ແມ່ນຈຸດປະສົງເປົ້າໝາຍມອບໃຫ້ນັກສຶກສາທີ່ດ້ອຍໂອ ກາດ, ຮຽນເກັ່ງ, ຂາດທຶນຮອນ ແລະ ແມ່ນບຸກຄົນທີ່ຫ້າວຫັນຂະຫຍັນໝັ່ນຮຽນອີກດ້ວຍ.

Editor: ດາວໄຊ ສີວິໄລ