ທ້າຍຜ່ານມາ ຢູ່ທີ່ ໂຮງຮຽນມູນລະປະຖະບ້ານນາເລົາ ເມືອງວັງວຽງ, ແຂວງວຽງຈັນ, ໄດ້ມີພິທີມອບເຄື່ອງຊ່ວຍເຫຼືອ. ໂດຍການເຂົ້າຮ່ວມ ຂອງ ທ່ານ ບຸນຈັນ ມາລາວົງ ຮອງເລຂາພັກເມືອງ ຮອງເຈົ້າເມືອງໆວັງວຽງ, ມີ ທ່ານນາງ ຄໍາຮຸ່ງ ທິບພະວົງ ຄະນະປະຈຳພັກເມືອງ ປະທານກວດກາພັກ-ລັດເມືອງ, ມີບັນດາທ່ານຫົວຫນ້າກຸ່ມບ້ານນາມອນ, ອໍານາດການຈັດຕັ້ງບ້ານ, ຄູອາຈານ ແລະນ້ອງນ້ອຍນັກຮຽນເຂົ້າຮ່ວມ.

ການມອບເຄື່ອງຊ່ວຍເຫຼືອໃນຄັ້ງນີ້ ແມ່ນເພື່ອເປັນການສະເຫຼີມສະໜອງ ວັນຄູແຫ່ງຊາດ 7 ຕຸລາ ຄົບຮອບ 23 ປີ, ພ້ອມນີ້ຍັງເປັນການສົ່ງເສີ່ມໃຫ້ ໂຮງຮຽນ ໄດ້ມີຄອມພິວເຕີນຳໃຊ້, ປື້ມຕຳລາຮຽນ ແລະ ອຸປະກອນການຮຽນ. ເຄື່ອງທີ່ນຳມາມອບ ປະກອບມີ: ຄອມພິວເຕີ 1 ຊຸດ, ປິ່ນເຕີ 1 ໜ່ວຍ, ປື້ມຕຳລາຮຽນ ປໍ1-ປໍ3 ຈຳນວນ 50 ຫົວ, ປື້ມຂຽນ ຈຳນວນ 200 ຫົວ ແລະ ສໍດຳ, ຢາງລຶບ ລວມມູນຄ່າ 9 ລ້ານກວ່າກີບ.

ໃຫ້ກຽດມອບເຄື່ອງຊ່ວຍເຫຼືອ ໂດຍແມ່ນ ທ່ານ ຕຸ້ຍ ເຈົ້າຂອງຮ້ານອາຫານຊາກຸລະ ແລະ ໃຫ້ກຽດກ່າວຮັບໂດຍ ທ່ານ ອ່ອນຈັນ ຫົວຫນ້າໂຮງຮຽນມູນລະປະຖະບ້ານນາເລົາ ພ້ອມດ້ວຍອຳນາດການຈັດຕັ້ງບ້ານ. ຕອນທ້າຍ ທ່ານ ບຸນຈັນ ມາລາວົງ ຮອງເຈົ້າເມືອງໆວັງວຽງ ຍັງໃຫ້ກຽດໂອ້ລົມຕໍ່ພິທີວ່າ: ບ້ານນາເລົາ ຫຼື ໂຮງຮຽນມູນລະປະຖະບ້ານນາເລົາ ເປັນບ້ານໜຶ່ງ ທີ່ຫາຍ້າຍມາຕັ້ງ ໄດ້ພຽງ 1 ປີ. ແລະ ຍັງເປັນບ້ານທຸກຍາກຂອງເມືອງພຽງບ້ານດ່ຽວ ຂອງ ຈໍານວນ 63 ບ້ານ. ສະນັ້ນ ທາງ ອຳນາດການປົກເມືອງ ຈຶ່ງສຸມໃສ່ ການພັດທະນາພື້ນຖານໂຄງລ້າງຂອງບ້ານເປັນຕົ້ນ ລະບົບ ໄຟຟ້າ, ນ້ໍາລິນ, ໂຮງຮຽນ, ວັດວາອາຮາມ ແລະ ອື່ນໆ ທີ່ຈໍາເປັນຕ້ອງມີ ພ້ອມກັນນີ້ ຍັງຊອກຫາລະດົມແຫຼ່ງທຶນມາຊ່ວຍເຫຼືອ ບໍ່ວ່າຈະເປັນພາກລັດຫລືເອກະຊົນ ນັກທຸລະກິດ ບໍລິສັດ ເຮືອນພັກ ຮ້ານອາຫານ ໂຮງແຮມ ຕ່າງໆ ຂອງເມືອງ ແລະ ແຂວງ.

Editor: ກຳປານາດ ລັດຖະເຮົ້າ