ເມືອງວັງວຽງ ແຂວງວຽງຈັນ ໄດ້ມີພິທີສະເຫລີມສະຫລອງວັນຄູແຫ່ງຊາດ 7 ຕຸລາ ຄົບຮອບ 23 ປີ (07/10/1994-07/10/2017) ຂຶ້ນຢ່າງເປັນທາງການ ໂດຍການໃຫ້ກຽດເຂົ້າຮ່ວມຂອງ ທ່ານ ຄຳຜ່ອງ ດວງວິໄລ ກຳມະການພັກແຂວງ ເລຂາພັກເມືອງເຈົ້າເມືອງໆວັງວຽງ, ມີ ທ່ານ ພູວົງ ບັນນາວົງ ຫົວໜ້າຫ້ອງການສຶກສາທິການ ແລະ ກິລາເມືອງວັງວຽງ, ມີບັນດາທ່ານຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ,ພະນັກງານອາວຸໂສ ບຳນານ, ຄູ - ອາຈານ ແລະ ນ້ອງນັກຮຽນ ເຂົ້າຮ່ວມຢ່າງພ້ອມພຽງ.

ພິທີສະເຫລີມສະຫລອງຄັ້ງນີ້ ທ່ານ ຄໍາເພົາ ຈັນທິລາດ ພະນັກງານບໍານານ ຍັງໄດ້ໃຫ້ກຽດຂຶ້ນເລົ່າຄືນປະຫວັດຄວາມເປັນມາ ແລະ ມູນເຊື້ອແຫ່ງການກຳເນີດ ແລະ ເຕີບໃຫຍ່ຂອງວັນຄູແຫ່ງຊາດ ວັນທີ 7 ຕຸລາ ຕະຫລອດໄລຍະຜ່ານມາ ແລະ ສະແດງຄວາມຮູ້ບຸນຄຸນ ກະຕັນຍູ ຕໍ່ບັນດາຄູ-ອາຈານທີ່ໄດ້ຖ່າຍທອດວິຊາຄວາມຮູ້ ກ່ອນຈະມີວັນນີ້ກໍຍ້ອນມີຄູເປັນຜູ້ສິດສອນ ແລະ ໃນໂອກາດດຽວກັນ ທ່ານຍັງຍົກໃຫ້ເຫັນສະພາບການຈັດຕັ້ງປະຕິບັດການຮຽນ-ການສອນທົ່ວເມືອງວັງວຽງ ໃນສົກຮຽນ 2016-2017

ຜ່ານມາມີຜົນສຳເລັດຫຼາຍດ້ານເຊິ່ງມັນໄດ້ສະແດງອອກ ປະຊາກອນໃນໄລຍະເຂົ້າຮຽນໃນລະດັບຕ່າງໆມີໂອກາດໄດ້ເຂົ້າຮຽນຫຼາຍຂຶ້ນ, ແລະ ໃນນັ້ນກໍ່ມີຫຼາຍເປົ້າໝາຍໄດ້ບັນລຸຄາດໝາຍແລ້ວເຊັ່ນວ່າ: ອັດຕາເຂົ້າຮຽນຂອງເດັກເກນອາຍຸ 3-4 ປີ ບັນລຸ 61,91% (ຄາດໝາຍ 70%), ເດັກອາຍຸ 3-5 ປີ ບັນລຸ 81,3% ( ຄາດໝາຍ 90%), ເດັກເກນອາຍຸ 5 ປີ ບັນລຸ 98,75% ( ຄາດໝາຍ 100%), ອັດຕາເຂົ້າຮຽນສຸທິໃນຊັ້ນປະຖົມບັນລຸ 99,56% (ຄາດໝາຍ 100%), ອັດຕາຫຼອດເຫຼືອຂອງນັກຮຽນ ປໍ1 ຮອດ ປໍ5 100% (ຄາດໝາຍ 100%), ດັດສະນີຄວາມສະເໜີພາບດ້ານການສຶກສາລະຫວ່າງຍິງ-ຊາຍໃນເກນ 6-10 ປີຢູ່ລະຫວ່າງ 0,93%, ອັດຕາເຂົ້າຮຽນລວມມັດທະຍົມຕອນຕົ້ນບັນລຸ 103,07% (ຄາດໝາຍ 100%) ລື່ນຄາດຫມາຍ, ອັດຕາເຂົ້າຮຽນລວມມັດທະຍົມຕອນປາຍ 80,06% ( ຄາດໝາຍ 100% ). ພ້ອມນັ້ນ ທ່ານເຈົ້າເມືອງ ຍັງໄດ້ຮຽກຮ້ອງມາຍັງຜູ້ບໍລິຫານການສຶກສາ ແລະ ກິລາແຕ່ລະຂັ້ນ ໂດຍສະເພາະຫ້ອງການທີ່ກ່ຽວຂ້ອງ ຈົ່ງສືບຕໍ່ ຂະຫຍາຍຕະໜ່າງການສຶກສາກ່ອນໄວຮຽນໄປສູ່ເຂດຊົນນະບົດຫ່າງໄກ ດ້ວຍການຊຸກຍູ້ສົ່ງເສີມການລົງທຶນທາງພາກລັດ ແລະ ພາກເອກະຊົນ, ເອົາໃຈໃສ່ປັບປຸງດ້ານການບໍລິຫານຄຸ້ມຄອງ, ການຮຽນ-ການສອນ ໃຫ້ມີຄຸນນະພາບດີຂຶ້ນ.

ເພື່ອສະແດງຄວາມຮູ້ບຸນຄຸນຕໍ່ພະນັກງານຄູທ່ານເຈົ້າເມືອງໆວັງວຽງທ່ານຫົວໜ້າຫ້ອງການສຶກສາທິການ ແລະ ກິລາເມືອງວັງວຽງ ຍັງໄດ້ຜັດປ່ຽນກັນຂຶ້ນມອບໃບຍ້ອງຍໍ ຂັ້ນກະຊວງສຶກສາທິການ ແລະ ກິລາ,ຂັ້ນພະແນກສຶກສາທິການ ແລະ ກິລາແຂວງໃຫ້ຄູອາຈານທົ່ວເມືອງວັງວຽງຜູ້ທີມີຄຸນງາມຄວາມດີໃນການສິດສອນ ຈາກນັ້ນ, ບັນດາພາກສ່ວນຫ້ອງການຕ່າງໆພາຍໃນເມືອງພ້ອມກັບການນຳຂັ້ນເມືອງກໍ່ໄດ້ມອບກະຕ໋າຂອງຂວັນໃຫ້ກັບຄູ-ອາຈານ ເພື່ອອວຍພອນວັນຄູແຫ່ງຊາດດັ່ງກ່າວຕ່າງໜ້າຮັບຂອງຂວັນໂດຍແມ່ນ ທ່ານ ພູວົງ ບັນນາວົງ ຫົວໜ້າຫ້ອງການສຶກສາທິການ ແລະ ກິລາເມືອງວັງວຽງ ພ້ອມດ້ວຍຄະນະ.

ໃນຕອນທ້າຍພິທີຍັງໄດ້ຮັບຊົມການສະແດງສີນລະປະຂອງນ້ອງນ້ອຍນັກຮຽນຕື່ມອີກ

ທິມຂ່າວ ຫ້ອງການ ຖວທ ເມືອງວັງວຽງ

Editor: ກຳປານາດ ລັດຖະເຮົ້າ