ພິທີວາງສີລາລຶກໂຄງການກໍ່ສ້າງສະຖາບັນຂົງຈື ມະຫາວິທະຍາໄລແຫ່ງຊາດລາວ ທີ່ຮັບການຊ່ວຍເຫຼືອລ້າຈາກລັດຖະບານ ສາທາລະນະລັດ ປະຊາຊົນຈີນ, ໄດ້ຈັດຂຶ້ນໃນວັນທີ 30 ກັນຍາ 2017, ທີ່ມະຫາວິທະຍາໄລແຫ່ງຊາດ ຈັດໂດຍສະຖາບັນຂົງຈື ໂດຍເປັນກຽດຂອງທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ຫວາງ ເຫວີນທ່ຽງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ, ທ່ານ ສົມສີ ຍໍພັນໄຊ ວ່າການອະທິການບໍດີມະຫາວິທະຍາໄລແຫ່ງຊາດລາວ, ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍ ແລະ ແຂກຖືກເຊີນເຂົ້າຮ່ວມ.

ທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາກ່າວວ່າ: ໂຄງການດັ່ງກ່າວ ຖ້າສ້າງສໍາເລັດຈະປະກອບສ່ວນສໍາຄັນເຂົ້າໃນການພັດທະນາຊັບພະຍາກອນມະນຸດ ແລະ ການຮຽນ, ການສອນ ຂອງມະຫາວິທະຍາໄລແຫ່ງຊາດລາວ ກໍຄືທົ່ວສັງຄົມລາວ ແລະ ທ່ານຍັງໄດ້ຕີລາຄາສູງຕໍ່ລັດຖະບານຈີນ ໂດຍສະເພາະສະຖານທູດ ສປ ຈີນ ປະຈໍາ ສປປ ລາວ ທີ່ມີຄວາມມຸ້ງໝັ້ນສະເໝີຕົ້ນສະເໝີປາຍ ແລະ ຍັງຈະໄດ້ສືບຕໍ່ຢ່າງແຂງແຮງ ເພື່ອເຮັດໃຫ້ໂຄງການດັ່ງກ່າວສໍາເລັດຕາມແຜນການ ແລະ ສາມາດເປີດນຳໃຊ້ໄດ້ໂດຍໄວ ຕາມຄວາມມຸ້ງມາດປາດຖະໜາຂອງສອງລັດຖະບານລາວ-ຈີນ ໂຄງການກໍ່ສ້າງດັ່ງກ່າວໄດ້ເລີ່ມລົງມືກໍ່ສ້າງໃນແຕ່ວັນທີ 1 ເດືອນກັນຍາ 2017 ໂດຍບໍລິສັດວິສະວະກໍາກໍ່ສ້າງ ແຂວງຈຽງຊູ ຈໍາກັດ, ກວມເອົາເນື້ອທີ່ປຸກສ້າງ 15.600 ຕາແມັດ ເຊິ່ງປະກອບມີອາຄານຮຽນ 2 ຫຼັງ, ອາຄານຫ້ອງການ, ຫ້ອງສະໂມສອນ ແລະ ຫໍພັກຄູ-ອາຈານ ແລະ ຈະສ້າງໃຫ້ສໍາເລັດໃນເດືອນກຸມພາ 2019. ຖ້າໂຄງການດັ່ງກ່າວສໍາເລັດຈະສາມາດຮອງຮັບນັກສຶກສາໄດ້ 5.000 ກວ່າຄົນ.

Editor: ກຳປານາດ ລັດຖະເຮົ້າ