ສູນຄະນິດຄິດໄວ ສະມາດແມ໊ດ ( Smart math ) ພະແນກສຶກສາທິການ ແລະ ກິລາ ນະຄອນຫຼວງວຽງຈັນ ຈັດການແຂ່ງຂັນຄະນິດຄິດໄວຊິງແຊ້ມວຽງຈັນ ຄັ້ງທີ III ຂຶ້ນໃນວັນທີ 17 ກັນຍາ 2017 ເພື່ອໃຫ້ເຍົາວະຊົນລາວໄດ້ມີເວທີ ແລະ ໂອກາດໃນການສະແດງຄວາມສາມາດທາງຄະນິດສາດ ແລະ ທັກສະການຄິດຄຳນວນເລກ, ມີໂອກາດໃນການແຂ່ງຂັນແລກປ່ຽນປະສົບການເພື່ອພັດທະນາຄວາມຮູ້ທາງຄະນິດສາດໃຫ້ຫຼາຍຂຶ້ນ ແລະ ເຮັດໃຫ້ເຍົາລະຊົນລາວ ມີຄວາມຮູ້ຄວາມສາມາດເທົ່າທຽບກັບກົນເທື່ອລະກ້າວ.
ທ່ານ ສຸລະໄຊ ຈົງຈິດໄພສານ ຜູ້ອໍານວຍການສູນຄະນິດຄິດໄວ ສະມາດແມ໊ດກ່າວວ່າ: ການຈັດການແຂ່ງຂັນໃນຄັ້ງນີ້ ເປັນການສົ່ງເສີມໃຫ້ເຍົາວະຊົນລາວມີຄວາມສົນໃຈ ແລະ ເຫັນເຖິງຄວາມສຳຄັນຂອງ ຄະນິດສາດ ທັງເປັນການວັດໄອຄິວຂອງສະໝອງນ້ອງໆນັກຮຽນໃຫ້ມີການພັດທະນາທັກສະ, ຄວາມໃສ່ໃຈ ແລະ ຮັກໃນການຮຽນຄະນິດສາດຫຼາຍຂຶ້ນ ພ້ອມທັງ ເປັນຝຶກທັກສະຄວາມສາມາດ ແລະ ພັດທະນາຄວາມພ້ອມຂອງເຍົາວະຊົນລາວໃຫ້ມີສະກາຍຍະພາບເທົ່າທຽມກັບພາກພື້ນ, ສາກົນ ແລະ ໃຫ້ເຕີບໃຫຍ່ໄປເປັນກຳລັງແຮງອັນສຳຄັນໃນການພັດທະນາປະເທດຊາດໃນອະນາຄົດ.
ສໍາລັບການແຂ່ງຂັນໃນຄັ້ງນີ້ມີນັກຮຽນເຂົ້າຮ່ວມແຂ່ງຂັນ ຈໍານວນ 225 ຄົນ, ໄດ້ແບ່ງເປັນ 3 ລະດັບ ຄື: ລະດັບ A ມີອາຍຸ 5-7 ປີ, ລະດັບ B ມີອາຍຸ 7-11 ປີ ແລະ ລະດັບ C ມີອາຍຸ 11-15 ປີ ເຊິ່ງທຸກລະດັບການແຂ່ງຂັນຈະເຮັດຂໍ້ສອບທັງ 2 ປະເພດ ຄື: ຂໍ້ສອບຕາມໂຈດບວກ ແລະ ລົບ ມີ 4 ຊັ້ນ 2 ຫຼັກ ຈໍານວນ 100 ຂໍ້ ໃຊ້ເວລາ 15 ນາທີ ສໍາລັບລະດັບ A, ສ່ວນລະດັບ B ແລະ C ແມ່ນໃຊ້ເວລາ 10 ນາທີ ແລະ ຂໍ້ສອບບອກຄໍາປາກເປົ່າ ຕາມໂຈດບວກ ແລະ ລົບ ມີ 4 ຊັ້ນ 2 ຫຼັກ ຈໍານວນ 50 ຂໍ້ ແລ້ວຄັດເອົາຜູ້ທີ່ມີຄະແນນສູງສຸດ 1-3 ຄື: ຜູ້ຊະນະເລີດທີ 1 ໄດ້ຮັບຂັນລາງວັນ ແລະ ທຶນຮຽນສະມາດແມ໊ດ 6 ເດືອນ ເປັນມູນຄ່າ 3.000.000 ກີບ, ຊະນະເລີດທີ 2 ໄດ້ຮັບຂັນລາງວັນ ແລະ ທຶນຮຽນສະມາດແມ໊ດ 4 ເດືອນ ເປັນມູນຄ່າ 2.000.000 ກີບ ແລະ ຊະນະເລີດທີ 3 ຮັບຂັນລາງວັນ ແລະ ທຶນຮຽນສະມາດແມ໊ດ 2 ເດືອນ ເປັນມູນຄ່າ 1.000.000 ກີບ ລວມເປັນທຶນຮຽນສະມາດແມ໊ດທັງໝົດ 18 ລ້ານກີບ ແລະ ຜູ້ເຂົ້າແຂ່ງຂັນທຸກຄົນແມ່ນໄດ້ຮັບຫຼຽນລາງວັນຊົມເຊີຍ; ຜົນການແຂ່ງຂັນຂອງລະດັບ A ຊະນະເລີດທີ 1 ແມ່ນ ນາງ ອະນິດາ ທໍາມະວົງ ໄດ້ 145 ຄະແນນ ໃນຄະແນນທັງໝົດ 150 ຄະແນນ, ຮອງຊະນະເລີດອັນດັບ 2 ແມ່ນນາງ ປະວິນາ ໄຊຍະວົງຄໍາດີ ໄດ້ 145 ຄະແນນ ແລະ ອັນດັບທີ 3 ແມ່ນທ້າວ ພາດາ ຈູນລະມະນີ ໄດ້ 144 ຄະແນນ; ລະດັບ B ຊະນະເລີດທີ 1 ແມ່ນນາງ ປາລະມີ ສີສຸທໍາມະນີ ໄດ້ເຕັມ 150 ຄະແນນ, ຮອງຊະນະເລີດອັນດັບທີ 2 ແມ່ນນາງ ສໍມະນີ ຂັນຈະເລີນ ໄດ້ 148 ຄະແນນ ແລະ ອັນດັບທີ 3 ແມ່ນທ້າວ ເອກ ຊາບັນດິດ ໄດ້ 148 ຄະແນນ; ສໍາລັບລະດັບ C ຊະນະເລີດທີ 1 ແມ່ນນາງ ສຸດາລັດ ສີຫາມະນີວົງ ໄດ້ 149 ຄະແນນ, ຮອງຊະນະເລີດອັນດັບທີ 2 ແມ່ນນາງ ອັກສອນສະຫັວນ ບຸນທະລັງສີ ໄດ້ 145 ຄະແນນ ແລະ ອັນດັບທີ 3 ແມ່ນນາງ ວິລະສິນ ອິນທະຈັກ ໄດ້ 144 ຄະແນນ.
Editor: ຕະວັນ ແສງສະຫວັນ
