ກົມຮູບເງົາ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບສະຖານ ທູດຍີ່ປຸ່ນ ຈັດການແຂ່ງຂັນຮູບເງົາເລື່ອງສັ້ນ ຂອງນັກຮຽນມັດທະຍົມສົມບູນ ທົ່ວປະເທດ ຄັ້ງທີ 9 ປະຈຳ ປີ 2017 ພາຍໃຕ້ຫົວຂໍ້ “ຄູຢູ່ໃນໂຮງຮຽນຂອງຂ້ອຍ” ເຊິ່ງມີຄວາມຍາວບໍ່ເກີນ 3 ນາທີ.
ພິທີຄັດເລືອກຮູບເງົາເລື່ອງສັ້ນຂອງນັກຮຽນມັດທະຍົມ ຂອງ ສປປ.ລາວ ເພຶ່ອຄັດເລືອກເອົາຮູບເງົາເລື່ອງສັ້ນ 3 ເລື່ອງ ໄປເຂົ້າຮ່ວມງານມະຫາກຳຮູບເງົານັກຮຽນ ຢູ່ທີ່ປະເທດຍີ່ປຸ່ນ ປະຈຳປີ 2017 ໄດ້ຈັດຂຶ້ນໃນວັນທີ 12 ກັນຍາ 2017 ຢູ່ທີ່ກົມຮູບເງົາ ໂດຍການໃຫ້ກຽດເຂົ້າຮ່ວມເປັນປະທານ ຂອງ ທ່ານ ວິທູນ ສຸນດາຣາ, ຫົວໜ້າກົມຮູບເງົາ ແລະ ທ່ານ ນາງ ມິຊິໂກະ ນາກາໂນະ ເລຂາຜູ້ທີ່ 1, ຫົວໜ້າພະແນກວັດທະນະທຳ ແລະ ການພົວພັນ ຂອງສະຖານທູດຍີ່ປຸ່ນ ປະຈຳລາວ, ມີບັນດາທ່ານຄະນະກົມ, ຄະນະພະແນກ, ຄະນະກຳມະການຕັດສິນ, ຄູອາຈານ, ສື່ມວນຊົນ, ພະນັກງານວິຊາການ ແລະ ນັກສ້າງຮູບເງົາສັ້ນນັກຮຽນເຂົ້າຮ່ວມ.
ຂະນະທີທ່ານ ຄຳເພົ້າ ວັນນະວົງ ຮອງຫົວໜ້າກົມຮູບເງົາ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ການແຂ່ງຂັນຮູບເງົາເລື່ອງສັ້ນ ສຳລັບນັກຮຽນມັດທະຍົມສົມບູນ ໄດ້ຈັດຂຶ້ນໃນທຸກໆປີ ເຊິ່ງມີເປົ້າໝາຍສົ່ງເສີມການຜະລິດຮູບເງົາເລື່ອງສັ້ນ, ພ້ອມທັງໃຫ້ໂອກາດນ້ອງນັກຮຽນ ໄດ້ສະແດງຄວາມສາມາດ, ສ້າງ
ສັນຈີນຕະນາການ. ສຳລັບປີນີ້ ມີຮູບເງົາເລື່ອງສັ້ນ ເຂົ້າແຂ່ງຂັນທັງໝົດ 51 ເລື່ອງ. ໃນນັ້ນຈາກ ນະຄອນຫລວງວຽງຈັນ 49 ເລື່ອງ ແລະ ຕ່າງແຂວງ 2 ເລື່ອງ, ເຊິ່ງເກນການໃຫ້ຄະແນນ ຂອງຄະນະກໍາມະການ ແມ່ນເບິ່ງຈາກເນື້ອໃນບົດ ແລະ ກໍາກັບການສະແດງ, ການຖ່າຍທຳ, ການຕັດຕໍ່, ການສະແດງ, ການບັນທຶກສຽງ ແລະ ປະກອບສຽງ.
ຜ່ານການແຂ່ງຂັນເຫັນວ່າ ທີມທີ່ຊະນະເລີດການ ແຂ່ງຂັນຮູບເງົາເລື່ອງສັ້ນປີນີ້ ແມ່ນໂຮງຮຽນ ຫ້ອມສະຫວັນ, ໂດຍມີຊື່ເລື່ອງວ່່າ ຄູສາຍພັນໃໝ່, ອັນດັບ 2 ແມ່ນເລື່ອງໂອກາດ ຈາກໂຮງຮຽນຫ້ອມສະຫວັນ ແລະ ອັນດັບ 3 ແມ່ນເລື່ອງ ສໍດຳຂອງຄູ ຈາກໂຮງຮຽນ ມ.ສ ສາທິດ. ຜູ້ຊະນະເລີດທັງ 3 ທີມ ຄັ້ງນີ້, ແມ່ນຈະໄດ້ເຂົ້າຮ່ວມແຂ່ງຂັນ ບຸນມະໂຫລານ ຮູບເງົາເລື່ອງສັ້ນ ຂອງມັດທະຍົມສົມບູນ ອາຊີ-ສາກົນ ທີ່ເກາະຮ໌ອກໄກໂດ ປະເທດຍີ່ປຸ່ນ.

Editor: ຕະວັນ ແສງສະຫວັນ