ການໄຂສົກຮຽນໃຫມ່ 2017 – 2018 ໃນທົ່ວປະເທດ ກໍຄື ນະຄອນຫຼວງວຽງຈັນ ຈະເລີ່ມໄຂຂື້ນຢ່າງເປັນທາງການ ໃນວັນທີ ທີ 1 ກັນຍາ 2017 ນີ້, ເນື່ອງໃນໂອກາດ ດັ່ງກ່າວ ທ່ານ ຊົມພູ ແກ້ວປັນຍາ ຫົວຫນ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໃຫ້ສໍາພາດວ່າ: ສະເພາະການຫ້າງຫາກະກຽມການເປີດສົກຮຽນໃຫມ່ໃນປີນີ້ ໂດຍລວມແລ້ວ ພາຍຫຼັງທີ່ໄດ້ມີການຈັດກການສອບເສັງເລື່ອນຊັ້ນ ປ5, ມ4, ມ7 ໄດ້ອອກແຈ້ງການໃຫ້ກັບບັນດາ ໂຮງຮຽນແຕ່ລະແຫ່ງ ທີ່ ຂື້ນກັບເມືອງ ໃນນະຄອນຫຼວງວຽງຈັນ ໃຫ່້ມີການກະກຽມ ບູລະນະສ້ອມແຊມອາຄານ - ສະຖານທີ່ ຕະຫຼອດຮອດໂຕະຕັ່ງ ຄວາມພ້ອມຫຼາຍໆດ້ານ ໃນການກະກຽມເປີດສົກຮຽນໃຫມ່.
ພາຍຫຼັງໄດ້ມີການແຈ້ງການລົງໄປ ທາງພະແນກສືກສາທິການ ແລະ ກິລາ ນະຄອນຫຼວງວຽງຈັນ ໄດ້ມີການຈັດຕັ້ງຕິດຕາມກວດກາຊຸກຍູ້ວຽກງານດັ່ງກ່າວ ພ້ອມທັງເຜີຍແຜ່ຈຸດປະສົງ ທີ່ ກະຊວງສຶກສາທິການ ແລະ ກິລາໄດ້ແນະນໍາ ຈັດຕັ້ງເຜີຍແຜ່ໃຫ້ຄູບາ - ອາຈານ ແລະ ພະນັກງານ ໃນຫ້ອງການສຶກສາທິການ ແລະ ກິລາ ແຕ່ລະເມືອງໃຫ້ຮັບຊາບ ເຊິ່ງມໃນສົກຮຽນນີ້ ວຽກງານຈຸດສຸມ ແມ່ນຂະຫຍາຍໂອກາດ ການເຂົ້າຮຽນຂອງເດັກ ເດັກກ່ອນໄວຮຽນ ໂດຍສະເພາະ ແມ່ນເດັກ 5 ປີ ໃຫ້ໄດ້ເຂົ້າຮຽນຢ່າງທົ່ວເຖິງເພາະເປັນເດັກກຽມປະຖົມ ຖ້າຢູ່ໃນອະນຸບານກໍແມ່ນ ອະນຸບານ 3 ເພື່ອກຽມຄວມາພ້ອມໃນການເຂົ້າໂຮງຮຽນຊັ້ນປະຖົມ ພ້ອມລະດົມໃຫ້ພໍ່-ແມ່ຜູ້ປົກຄອງ ເວົ້າລວມ ເວົ້າສະເພາະ ຄະນະພັດທະນາການສຶກສາ ຂັ້ນບ້ານ ໃຫ້ເອົາໃຈໃສ່ພໍ່ - ແມ່ປະຊາຊົນໃນບ້ານຂອງຕົນ ນໍາເອົາລູກຫຼານ ເດັກ ອາຍຸ 6 ປີ ໃຫ້ໄດ້ເຂົ້າຮຽນເພື່ອເພີ່ມອັດຕາສຸດທິການເຂົ້າຮຽນ ໃຫ້ມັນສູງ ພ້ອມທັງປັບປຸງຄຸນນະພາບການຮຽນ-ການສອນ ໃນຂັ້ນປະຖົມ ໃຫ້ມີຄຸນນະພາບດີ ອີງໃສ່ອຸປະກອນການຮຽນ-ການສອນ ທີ່ທາງຂັ້ນເທິງສາມາດສະໜອງ ໃຫ້ຢ່າງພຽງພໍ ແລະ ກ່ອນການໄຂສົກຮຽນໃຫມ່ ໄດ້ມີການລະດົມນັກຮຽນ ທີ່ ຮຽນຈົບຊັ້ນ ປ5 ໃຫ້ໄດ້ເຂົ້າຮຽນມັດຖະຍົມຕົ້ນໄດ້ຫລາຍຂື້ນ ເຊິ່ງໄລຍະຜ່ານມາຍັງບໍ່ທັນໄດ້ດີເທົ່າທີ່ຄວນ ເພື່ອບໍ່ໃຫ້ປະລະການຮຽນ ແລະ ເອົາໃຈໃສ່ບັນຫາສົ່ງເສີມສຸຂະພາບເດັກ ໃນໂຮງຮຽນເປັນຕົ້ນ ການລ້າງມື, ຖູແຂ້ວ ແລະ ສຸຂະອານາໄມຕ່າງໆ ພ້ອມດຽວກັນວຽກງານກິລາມວນຊົນ ກໍໃຫ້ທົ່ວເຖິງ ໄປຄຽງຄູ່ກັນກໍຍົກລະດັບທາງດ້ານແນວຄິດການເມືອງ ດ້ານວິຊາສະເພາະ ໃຫ້ກັບຄູ - ອາຈານ ມີການກວດຄືນການປັບປຸງການຈັດຕັ້ງ ໃຫ້ເປັນລະບົບຄົບຊຸດ ກຽມພ້ອມທັງຄູອາຈານ ວັດຖຸອຸປະກອນຕ່າງໆ ໃຫ້ຄົບຖ້ວນສົມບູນ ແລະ ໂຮງຮຽນຫຼາຍແຫ່ງ ກໍມີການລົງຖະບຽນຮັບສະໝກນັກຮຽນເປັນທີ່ຮຽບຮ້ອຍແລ້ວ.
ມາຮອດປະຈຸບັນ ຖືວ່າການຫ້າງຫາກະກຽມການ ເປີດສົກຮຽນໃຫມ່ຂອງນະຄອນຫຼວງ ມີຄວາມພ້ອມໃນການໄຂສົກຮຽນໃຫມ່ຢ່າງເປັນທາງການ ພ້ອມກັນ ໃນວັນທີ 1 ກັນຍາ 2017 ນີ້ສ່ວນພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໂອກາດນີ້ທ່ານຍັງໄດ້ຮຽກຮ້ອງມາຍັງຄູ - ອາຈານ ໃຫ້ເອົາໃຈໃສ່ປະຕິບັດຕາມລະບຽບແບບແຜນ ຄົບຕາມ 5 ຫຼັກມູນການສຶກສາ 3 ລັກສະນະ ແລະ 3 ຂໍ້ແຂ່ງຂັ້ນຂອງກະຊວງ ວາງອອກ ລູຸກຫລານນັກຮຽນ ກໍ່ໃຫ້ຕັ້ງໃຈສຶກສາຄົ້ນຄົ້ວຮໍ່າຮຽນ ແລະ ຮຽກຮ້ອງມາຍັງແຕ່ລະພາກສ່ວນ ໂດຍສະເພາະພໍ່ - ແມ່ຜູ້ປົກຄອງໃຫ້ເອົາໃຈໃສ່ຕື່ມ ໃນການແນະນໍາຕິດຕາມໃກ້ຊິດ ແລະ ຮຽກຮ້ອງມາຍັງທຸກພາກສ່ວນເອົາໃຈໃສ່ດູແລລູກຫລານນັກຮຽນ ຖ້າເຫັນສິ່ງໃດບໍ່ຖືກຕ້ອງ ກໍ່ຊ່ວຍກັນຕັກເຕືອນ ເພື່ອປະກອບສ່ວນເຮັດໃຫ້ການພັດທະນາປັບປຸງຄຸນນະພາບ ການສຶກສາຂອງ ນະຄອນຫຼວງວຽງຈັນ ໃຫ້ນັບມື້ນັບດີຂື້ນ.
Editor: ກຳປານາດ ລັດຖະເຮົ້າ
